Read Zou KILAHNA 9 Bible Online

KILAHNA 9 - Zou bible

KILAHNA 9

¹A ngana vantungmi in a pengkul a mut leh van panin lei ah aasi kiesuh khat ka mu a, mong nei lo kuohawm vang honna tawhtang ama kipie hi;

²ama in tua kuohawm vang ang hong leh meiphuolpi pana meikhu bangin tua a vang panin meikhu ang pusuoh a, tua a vang pana meikhu ziehin ni le van a miel hi.

³Tua meikhu sung panin leitungah kauphete ang pusuoh a, leitungah mom-aite’ thuneina bangin amate thuneina kipie hi.

⁴Leitunga a po lopate, sing hingte, le singkung khat popo susie loin, a talpang tung vua Pasien’ ciemtena a nei lote beh susie dingin amate thu kipie hi.

⁵Amate in tua mite that loin hla nga sung a bawlsiet nadingun phalna kipie a, amau’ thuoh gimna ahile mom-ai in mi a pe cienga a nat bang ahi hi.

⁶Khum ni ciengin mite in sina a sui ding vua, ahi vangin a mu sih ding uhi; a si nuom ding vua, ahi vangin amate kung panin sina a taimang ding hi.

⁷Tua kauphete’ melpuoh dan pen gal kuon dinga a kivon sakolte tawh kibang hi. A lu tung vuah kham lukhu tawh kibang a khu vua, a maitang uh pen mihing maitang tawh kibang hi.

⁸A sam uh numeite sam bang a, a hate uh humpite’ ha tawh kibang hi.

⁹Sia awmdal tawh a kibang awmdal a nei vua, a hlazap ging uh pen gal sim dinga a tai sakol leeng honpite’ gin tawh kibang hi.

¹⁰Mom-ai bangin mei nei-in mi de thei a, a mei vuah hla nga sung mite gimsah thei nading gu nei uhi.

¹¹Amate in kumpi-in mong nei lo tua kuohawm a uh vantungmi a nei uhi; a min Hebrew hamin Abaddon[21] kici a, Greek hamin Apollyon[22] kici hi.

¹²Gimna masa pen tawp zo hi. Gimna nam ni ang tung lai ding hi.

¹³Tua ciengin a guhna vantungmi in pengkul a tum leh Pasien mai-a om kham maitam’ ki li[23] panin awging ka za a,

¹⁴pengkul nei vantungmi a guhna kungah, “Euphrates gunpi-a kihen vantungmi lite hlakhie in,” ci hi.

¹⁵Tuaci’n mihingte sethum-suo-sekhat a tha ding uh a kum, a hla, a ni, a nai ngaha a baisa-a kikoi tua vantungmi lite a kihlakhie hi.

¹⁶Sakol tung tuong galkapte awn zani a pha hi; tuaci’n keima in a mi phaza ka za hi.

¹⁷Ka mangmuna sunga sakolte ka mu dan tam bang ahi hi: Sakol tung tuongte in mei, sapphire[24] suong manpha le kaat mel tawh a kibang awmdalte a sil uh ka mu hi. Tua sakolte’ lutang pen humpite’ lutang tawh kibang a, a kam panun meikuong, meikhu, le kaat a pusuoh hi.

¹⁸A kam pan vua a pusuoh meikuong, meikhu, le kaat, tam gimna thumte in mihingte sethum-suo-sekhat a thatlia hi.

¹⁹Bangzieh ahei cile sakolte’ vanglietna pen a kam le a mei vuah a om hi. A mei uh pen gul tawh kibangin lutang nei a, a meite utawh mi a liemsah uhi.

²⁰Tami gimnate ziehin a si lo a omlai mite in a khut vua a bawl uh nasepte panin a kisia sih vua, dawite le a mu thei lo, a za thei lo, le a pei thei lo kham, ngun, sumngo, le sing le suong milimte a bieh uh a tawp tuom sih uhi.

²¹A mi thana, a aisanna, a numei-pasal pahtathna, le a guhtatnate uh panin zong a kisia tuom sih uhi.