Read Zou RUTH 2 Bible Online

RUTH 2 - Zou bible

RUTH 2

¹Tu-in Naomi in a pasal lam panin a sanggam, Elemelech innsung mi Boaz a kici mihau mi thupi khat nei hi.

²Moab numei Ruth in Naomi kungah, “Lo-ah ei kuonsah inlen, maipha ka muna popo pa’ nua-ah ansangh va khon ta vang,” a ci hi. Ama in, “Va pei tan, ka tanu aw,” a ci hi.

³Tuaci’n ama kuonin anlate nua-ah ansangh a khon hi. Tuale Elimelech’ innkuon Boaz’ lo ah a va kuonkha ta hi.

⁴Tua zaw lienin Bethlehem panin Boaz ang pei a, ama in anlate kungah, “Note tawh TOPA hing om taheh” a ci hi. Amate in zong, “TOPA in nang thupha hing pie taheh,” ci-in a dawng uhi.

⁵Tua ciengin anlate a uh a nasempa kungah, “Tam koi’ ngahnu ahiei? a ci hi.

⁶Anlate a uh a nasempa in, “Moab gam pana Naomi tawh ang kilekia Moab numei ahi hi.

⁷Tua numei in, ‘Kang thum hi, ansangh ei khonsah inlen anlate’ nua-a bulomte lahah a tuolkiete ei tungsah in,’ ei ci hi. Tuaci’n ama ang pei-in zingmawnga kipanin tu cieng dongin bakhat sung nangawn khawl loin a sem hi,” a ci hi.[6]

⁸Tua ciengin Boaz in Ruth kungah, “Tu-in ngai in ka tanu aw, ansangh khon dingin lo dangah kuon sin, tam lo nuasie sinlen ka nasem numeite gei-ah om lenlon in.

⁹Lolai-ah an kilahna sa en lenlon inlen, amau’ nua zui in. Tangvalte in nang ang bawlsiet lo nadingin thu ka pie zo hi. Na dang a ta leh pei inlen tui beel sunga tangvalte’ tui tawisa dawn in,” a ci hi.

¹⁰Tua ciengin tuol kunsuhin khupbawh a, “Kei gamdang mi khat hi lel bo ing a, bang dinga kei nei hici phaw a, na maipha ka mukhah adiei?” a ci hi.

¹¹Ahi vangin Boaz in ama dawngin, “Na pasal a si zaw-a kipanin na innpinu na limbawlna le na nu na pa le na pienna gam nuasie-in na thei ngai lo mite kunga nang peina thu a kimin ei kigen zo hi.

¹²TOPA in na silbawlte ziehin thaman hing pie-in, ama’ hla hlim nei bel dinga nang zot Israel-te’ Pasien TOPA tung panin thaman bucing nga ta in!” a ci hi.

¹³Tua ciengin Ruth in, “Ka pu aw, na mai-ah maipha ei ngasah zom lai in. Azieh pen kei na nasem numeite lahah khat zong ahi lo kimlai, na nasemnu tungah nang kamsiem a, nei hlamuongsah hi,” a ci hi.

¹⁴Boaz in anneh hun ciengin tua nu kungah, “Tanah hing pei in, anlum pawlkhat ne inlen, lenggazu sungah na an die in,” a ci hi. Tuaci’n anlate gei-ah ama to-in tua pa in bukan kimkhat a pie hi. Ama in a kham masangsie ne a, khamval pawlkhat omlai hi.

¹⁵Ansangh khonin ama a dinkia ciengin Boaz in a tangvalte hil a, “Buphai lahte nangawnah na khonsah unlen na maizumsah sih un.

¹⁶Anlom kihensate lah panin zong kimkhat ladawhin ama’ khon dingin na nuasie unlen ama na phawhsie sih un,” a ci hi.

¹⁷Tuaci’n ama in nitah dongin lolai-ah ansangh a khon hi. Tua ciengin ama in a khonsate cil a, mangbuham ephah[7] khat bang a pha hi.

¹⁸Ama in tuate puo-in khuo sungah a pei a, ama in ansangh bangza khon ci a innpinu in a mu hi. Tua ciengin ama in a an khawnla teng zong la-in a innpinu a pie hi.

¹⁹A innpinu in ama kungah, “Tuni-in hei sungah ansangh na va khon tai? Koi’ lo-ah na kuon ei? Nang ang phawhkha pa in thupha nga taheh,” a ci hi. Tuaci’n ama in a innpinu kungah a naseppite thu gen a, “Tuni-a ka na sepna pa’ min Boaz ahi hi,” a ci hi.

²⁰Tua ciengin Naomi in a monu kungah, “A migitna in a hinglaite ahi a, a sisate ahi zongin a nuasiesah vawt lo TOPA in ama thupha pie taheh!” a ci hi. Naomi in ama kungah, “Tua mipa khu i tanaute, i kinaipi pente lahah khat ahi hi,” zong a cibe lai hi.[8]

²¹Tua ciengin Moab numei Ruth in, “Ama in ka kungah, ‘Ka anlah sieng zaw masangsie ka nasemte kungah om in,’ ei ci lai hi,” a ci hi.

²²Naomi in a monu Ruth kungah, “Ka tanu aw, a numeite tawh na kuonton pen hoizaw hi. Tua hi sihle lo dangah ang kibawlsie kha ding hi,” a ci hi.

²³Tuaci’n Boaz’ numeite nai-ah Ruth om a, mangbu le mangbuham lah zo masangsie ansangh khonin a innpinu tawh a omton hi.