Read Zou RUTH 3 Bible Online

RUTH 3 - Zou bible

RUTH 3

¹A innpinu Naomi in ama kungah, “Ka tanu aw, na nopsah nadingin sil muonhuoi khat kang suipieh ding kisam hi.

²A nasem ngahnute tawh na nasepna i sanggampa Boaz tanah tu-in a om hi. En in, ama in tu zanin ancilna-ah mangbuham zoi-in a om hi.

³Kisilin sathau kinu inlen na puon hoipente silin ancilna lamah peisuh in; ahi vangin a neh a dawn a man masangsie ama kungah na pei lam kitheisah sin.

⁴Ama a lup ciengin a lupna encien in; tua ciengin, pei-in a keng lem inlen lum in; tuale ama in na bawl ding ang gen ding hi,” a ci hi.

⁵Ama in a kungah, “Na gen zosie ka bawl ding hi,” a ci hi.

⁶Tuaci’n ama ancilna-ah peisuhin a innpinu hil bang tehtehin a gamta hi.

⁷Boaz in a neh a dawn zaw ciengin a lung nuom a, a lum dingin anphuol gei-ah a pei hi.

⁸Zankim laitahin thakhatin khangloin a kihei leh a khawdop-ah numei khat na lum hi.

⁹Ama in, “Nang koi na hiei?” a ci hi. Tua nu in dawng a, “Kei na nasemnu Ruth ka hi hi; na puon tawh na nasemnu ei hui in, azieh pen ka tanau kinaipi pen[9] na hi hi,” a ci hi.

¹⁰Ama in, “TOPA in nang thupha hing pie taheh, ka ta nu aw; tam a nukhia pen na citahna in a cil lai-a sangin hoizaw peh hi; nang in a hau hitale a zawng hitale tangvalte’ nua po na zui sih hi,” a ci hi.

¹¹Tu-in ka tanu aw, zau sinlen na nget zosie kang seppieh ding hi. Azieh pen ka khuo-a mi zosie in numei kizen na hi lam a thei uhi,” a ci hi.

¹²Hinanle tu-in na sanggam kinaipi pen khat ka hi khu a man vangin kei sanga na kinaipizaw adang sanggam khat omlai hi.

¹³Tuzanin tanah om tadi inlen, zingmawng ciengin na tungah tanau kinaipi pente’[10] mawpuoh ang sep leh hoi hi; ama semsah in. Ama in nang tungah tanau kinai pente’ [11]mawpuoh ang sep nuom sih leh, TOPA a hing ahi ma bangin keima in nang tungah tanau kinaipi pente’[12] mawpuoh teng kang sem ding hi. Zingmawng dongin tam sungah lum in,” a ci hi.

¹⁴Tuaci’n zingmawng dongin a khawdop-ah tua nu lum a, ahi vangin mi mel kimucien thei masangin ama a tho hi; azieh pen Boaz in, “Ancilna phuol-a nang pei lam koima in kitheisah sin,” a ci hi.

¹⁵Tua ciengin ama in, “Na puon hing la inlen daw in,” a ci hi. Tuaci’n tua nu in daw a, ama in mangbuham law guh te-in a guonpieh hi; tua ciengin ama khuopi sungah a pei hi.

¹⁶A innpinu kungah ama a tun ciengin na dong a, ”Ka tanu aw, bang nang ci ei?”[13] a ci ciengin tua nu in zong ama’ tungah tuapa’ bawlna zosie gen a,

¹⁷“Tam mangbuham law guh ei guon hi, azieh pen ama in, ‘Na innpinu kungah na khutguohin pei sin,’ ei ci hi,” a ci hi.

¹⁸Naomi in, “Ka tanu aw, thu bang hing ci pien ding ci na thei masangin ngah tadi in, azieh pen ama ang mawh op sih ding a, tuni-in vai zosie ang siengsah na ding hi,” a ci hi.