Read Zou RUTH 4 Bible Online

RUTH 4 - Zou bible

RUTH 4

¹Kulpi tunkotah Boaz peito-in khumnah a to zaw lienin, a tanau a kinaipi pen,[14] Boaz in a gen mipa a pei hi. Tuaci’n Boaz in, “Lawm aw, hing pei in; tanah hing to in,” a ci hi. Tuale ama pei-in a to hi.

²Tua ciengin Boaz in khuo upa sawm zawpi-in ama in, “Tanah to un,” a ci hi; tuaci’n amate a to uhi.

³Tua ciengin ama in a tanau kinaipi pen[15] kungah, “Moab gam pana ang kilekia Noami in i sanggampa Elimelech’ leitang phalkhat a zua hi.

⁴Tam thu nang kungah gen dingin ka ngaisun a, ‘Tam sunga a to mite’ mitmu le ka upate’ mitmu-in lei in,’ kang ci hi. Na tat ding le tan in; na tat sih ding leh a thu ka thei nadingin ei gen in; bangzieh ahei cile nang masangah a tan ding mi koima om lo hi. Nang zom kei ka hi hi,” a ci hi. Tuaci’n ama in, “Keima’n tan vang,” a ci hi.

⁵Tua ciengin Boaz in, “Naomi khut sung pan tua leitang na lei ni-a kipanin a sipa’ gamh pen a sipa’ min tawh a op suoh thei nadingin a sipa’ zi meigongnu Ruth[16] zong a leitha na hi pai ta hi,” a ci hi.

⁶Tuale a tanau kinaipi pen pa[17] in, “Keima’ gouluo kisusie loin keima adingin tam ka tan thei sih ding hi. Ka tat theina khuon nang mama-in kilah tan, azieh pen ke’n ka tan thei sih hi,” a ci hi.

⁷Nidang lai-a Israel-te sungah tatna le kikhelna thu tawh kisai ngaina tam bang ahi hi: vaihawmna khat a kip ahi nadingin mi khat in a kedap suo-in adang khat tungah a pie hi; tam pen kipsahna bawldan ahi hi.

⁸Tuaci’n a tanau kinaipi pen pa[18] in Boaz kungah, “Nangma dingin kilei in,” a ci ciengin ama in a kedap a sut hi.

⁹Tua ciengin Boaz in upate le mi zosie kungah, “Tuni-in Naomi tung panin Elimelech, Chilion le Mahlon’ neisa zosie ka lei zawhna thu teci na hi uhi.

¹⁰A tanaute le a pienna khuo tunkot panin misi pa’ min a kisuhmang lo nadingin, ama’ gamhluona-ah misi pa’ min a kizop thei nadingin Mahlon’ zi meigong Moab mi Ruth zong ka zi dingin ka la zo ta hi; tuni-in no teng tecite na hi uhi,” a ci hi.

¹¹Tua ciengin tunkota om mi zosie le upate in, “Ko teci ka hi uhi. TOPA in Israel minam a piengsah Rachel le Leah bangin na inn sunga ang lut numei nu hing bawl taheh. Ephrathah ah ta le nau nei inlen, Bethlehem ah na minthang taheh.

¹²TOPA in tam numeino tungtawna ang pieh ding tate, Judah in Tamar tawh a nei Perez innkuon bang taheh,” a ci uhi.

¹³Tuaci’n Boaz in Ruth la-in ama a zi a suoh hi. Ama gel a lupton ciengun TOPA in ama gaisah a, tapa khat nei hi.

¹⁴Tua ciengin nupite in Naomi kungah, “Tuni-in tanau kinaipi pen[19] nei loin ang omsah lo TOPA in thupha nga ta hinlen; tuale Israel-te sungah ama’ min thang taheh!

¹⁵Ama pen hinna ang piekia pa, le na vuoi cienga ang va pa hi ding hi; azieh pen na tapa sagi sangin a thupizaw, nang ang it na monu’ nei tapa ahi hi,” a ci uhi.

¹⁶Tua ciengin Naomi in nausen la-in a kang sungah tawi a, nau cingnu a suoh hi.

¹⁷A veng nupite in ama’ min a phuo pieh vua, “Naomi sung pan tapa khat suoh,” a ci uhi. Amate in a min Obed a phuo uhi; ama pen Jessi’ pa suoh a, Jessi pen David’ pa a suoh hi.

¹⁸Tu-in tam teng pen Perez’ suonlehlahte ahi hi: Perez pen Hezron’ pa,

¹⁹Hezron pen Ram’ pa, Ram pen Amminadab’ pa,

²⁰Amminadab pen Nahshon’ pa, Nahshon pen Salmon’ pa,

²¹Salmon pen Boaz’ pa, Boaz pen Obed’ pa,

²²Obed pen Jessi’ pa, Jessi pen David’ pa ahi hi.