Read Zou 1 SAMUEL 11 Bible Online

1 SAMUEL 11 - Zou bible

1 SAMUEL 11

¹A hla khat bang zaw ciengin[67] Ammon mi Nahash peito-in Jabesh-gilead a imtawm hi; tuale Jabesh mi zosie in Nahash kungah, “Ko tawh thukimna hing bawl in. Na na kang sem ding uhi,” a ci uhi.

²Ahi vangin Ammon mi Nahash in amate kungah, “Tam thu hangin no tawh thukimna ka bawl ding hi. Keima in mi zosie’ mit zietlam kheipieh dawhin Israel zosie tungah simmawna ka omsah ding hi,” a ci hi.

³Jabesh upate in ama kungah, “Israel gam sung zosie-ah kamtai ka sawl thei nadingun khuo ngai hun ni sagi sung ei pie’n. Tua ciengin ko ei hun ding mi khat zong a op sih leh na khut sungah kang kipie ding uhi,” a ci uhi.

⁴Saul’ khuo Gibeah ah kamtaite a tun ciengun amate in mite zahin thu a gen uhi; tuale mi zosie nahpitahin a kap uhi.

⁵Tu-in bawngtangte nua zui-in lo panin Saul a pei hi; tuale Saul in, “Bang thu om a mite hici kaa ahi vuoi?” a ci hi. Tuaci’n Jabesh mite’ thute ama kungah a gen uhi.

⁶Saul in tam thu teng a zah ciengin ama tungah Pasien’ hlagau khautahin tungin nahpitahin a sin a so hi.

⁷Ama in bawng lengkai kap khat la-in tuate go-in semnen a, kamtaite sawlin Israel gam mun zosie-ah hlah a, “Saul le Samuel nua zui-a kuon lo poma a bawngte tunga a kibawl bangin kibawl ding hi!” ci-in a gen hi. Tua ciengin mite tungah TOPA giinna tung a, mihing khat bangin kithutuohin a kuonkhie uhi.

⁸Ama in Bezek ah mite a kaikhop ciengin Israel-te tul zathum pha a, Judah panin tul sawmsagi[68] pha hi.

⁹Amate in kamtai-a peite kungah, “Jabesh-gilead a tengte kungah gen un: ‘Zing sun ciengin hutkhietna na nga ding uhi,’ ci-un,” a ci hi. Kamtaite tungin Jabesh-a tengte kungah a gen ciengun amate a lungdam mama uhi.

¹⁰Tuaci’n Jabesh-a tengte in Nahash kungah, “Zing ciengin na kungah kang kipie ding vua, hoi na sah bangin ka tung vuah nei bawl ding hi,” a ci uhi.

¹¹A zing ciengin Saul in mite pawl thumin a khen hi. Giephuol sungah zingmawng tungin a pei vua, sun nisat dongin Ammon-te a satlia uhi; tuale mi ni nangawn omton thei lo ding za dongin a suohta sunte a kithezah uhi.

¹²Mite in Samuel kungah, ‘Saul in eite ei uh ding amah?’ a ci pen khu, “Koi na hi vuoi? Amate i tha thei nadingin ka kung vuah ei pie’n,” a ci uhi.

¹³Ahi vangin Saul in, “Tuni-in mi khat zong kithat lo ding hi. Bangzieh ahei cile tuni-in TOPA in Israel tungah hutkhietna ei puoh hi,” a ci hi.

¹⁴Samuel in mite kungah, “Hing pei un, Gilgal ah peito vai-in khum munah kumpi dingin Saul kipsah phakia vai,” a ci hi.

¹⁵Tuaci’n Gilgal ah mi zosie a pei vua, amate in tua mun TOPA mai Gilgal ah kumpi-in Saul a koi uhi. Khum tahah amate in TOPA mai-ah thunuom biehna a pie vua, khum tahah Saul le Israel-te zosie nahpitahin a kipah uhi.