Read Zou 1 SAMUEL 12 Bible Online

1 SAMUEL 12 - Zou bible

1 SAMUEL 12

¹Samuel in Israel-te zosie kungah, “Ka kunga na thugen zosie uh ka ngai zo ta a, na tung vuah kumpi khat ka koi ta hi.

²En un, tu-in na makaipa uh kumpi ahi hi; kei vuoi-in ka sam kang zo a, hizongle ka tapate note tawh a om uhi. Ka neu lai-a kipan tuni tanpha-in note kang makai zo ta hi.

³Tanah kei ka om hi; TOPA mai le a sathau nu pa mai-ah ka mawna[69] hing pulah un. Koi bawngtang ka lahpieh ahei? Ahi sihle koi laa ka lahpieh ahei? Ahi sihle koi ahei ka sol? Koi ahei ka bawlsiet? Ahi sihle ka mit tawt nadingin koi khut sung panin guhgol la ka hei? Ka langkhatah teci hing pang unlen, tua teng kang dinkia ding hi,” a ci hi.

⁴Amate in a kungah, “Nang in kote nei sol sih a, zong nei bawlsie sih a, mi khat popo kung panin zong guhgol na la sih hi,” a ci uhi.

⁵Ama in a kung vuah, “Ka khut sungah bangma na mu lona uh na langkhat vuah TOPA teci ahi a, ama’ sathau nu pa zong tuni-in teci ahi hi,” a ci hi. Amate in, “Ama teci ahi hi,” a ci uhi.

⁶Samuel in mite kungah, “Moses le Aaron a na se,[70] Egypt gam pan na pu na pate uh a na peipi TOPA khu teci ahi hi.

⁷Tua ziehin tu-in note le na pu na pate adingin TOPA’ hutdamna nasep zosie TOPA mai note tungah[71] hing pulahin kang mawsah thei nadingin na ding lai tadi un.

⁸Egypt gamah Jacob a pei ciengin Egypt-te in na bawlsie-in,[72] tua ciengin TOPA tungah na pu na pate a na kiko vua, ama in Egypt panin na pu na pate peipi-in tam munah amate a tengsah ahi Moses le Aaron, TOPA in a sawl hi.

⁹Ahi vangin amate in TOPA a Pasien uh a mangngil uhi; tuale ama in Hazor kumpipa Jabin’ [73]galkapmangpa Sisera’ tung, Philistia-te, tung le Moab kumpipa tungah amate zua a, tam mite in amate a sim uhi.

¹⁰Tua ciengin TOPA kungah amate kiko-in, ‘Kohaw ka khiel ta uhi, bangzieh ahei cile TOPA ka taisan ta vua, Baal-te le Ashtaroth-te’ na ka sem ta uhi; ahi vangin tu-in ka galte’ khut sung panin ei hunkhie in, na na ka sem ding uhi,’ a ci uhi.

¹¹TOPA in Jerubbaal, Barak,[74] Jephthah le Samson[75] sawlin na kim na pam zosie vua na galte uh’ khut sung panin note ang hunkhie hi; tuale lungmuongin na teng uhi.

¹²Hizongle note sim dingin Ammon kumpipa Nahash ang kuon na mu ciengun, TOPA na Pasien uh pen na kumpi uh hi napi note in kei kungah, ‘Hi sih, kumpi khat ma in ei uh ding hi bo,’ na ci uhi.

¹³En un, noma’ teelsa, noma’ ngetsa kumpipa tanah a om hi; en un, TOPA in na tung vuah kumpi khat koi zo hi.

¹⁴TOPA zatahin a na semin a thu zong mangin, TOPA’ thupieh na langpan sih vua, noma le ang uh kumpipa in na ni-un na TOPA Pasien uh’ nua na zui uleh thu ang hoi ding hi;

¹⁵ahi vangin note in TOPA’ thu na man sih vua, TOPA’ thupieh na langpan uleh TOPA’ khut in note le na kumpipa[76] uh ang langpan ding hi.

¹⁶Tua ahi ziehin tu-in dai dide-in om unlen, na muna vuah TOPA in ang bawl ding ahi tam na lienpi en un.

¹⁷Tuhun pen mangbu at laitah hi lo amah? Van ang tosah nading le guo ang zuhsah nadingin TOPA kungah thu ka ngen ding hi; tuale noma adinga kumpi khat na ngetna ziehun TOPA muna-ah na gitlo gamtatnate uh a lien mama ahi lam mu-in na thei ding uhi.

¹⁸Tuaci’n Samuel in TOPA tungah thu ngen a, khum ni-in TOPA in van tosahin guo zusah hi; tuale mi zosie in TOPA le Samuel zatah citahin a zatah uhi.

¹⁹Mi zosie in Samuel kungah, “Na nasemte ka si lo nadingun TOPA na Pasien tungah thu ei ngetpieh in; azieh pen ka mawnate uh banah koma adingin kumpi khat ka nget ziehun sietna ka belap lailai uhi,” a ci uhi.

²⁰Samuel in mite kungah, “Zau sih un; tam gitlona zosie na bawl zo ta uhi, hinanle TOPA na zuina uh pan piel sih unlen na lungsim zosie utawh TOPA’ na sem un;

²¹tuale hattuomna ei pie thei lo, ei hunkhie thei lo, kimanna a nei lo nate lamah piel sih un, azieh pen tuate in kimanna nei lo hi.

²²TOPA in ama’ min lienpi a khuolna-in a mite nolh lo ding hi. Azieh pen ama’ mi-a note ang bawl ding TOPA’ deilam ahi hi.

²³Tua tham loin kei ka hi leh note adingin TOPA kungah thungetpieh lona tawh ka na maw vawt sih ding hi; tuale keima in a hoi le a man lampi note kang hil ding hi

²⁴TOPA beh zatah unlen na lungsim zosie utawh citahin ama’ na sem un; azieh pen ama in note dinga ang bawlpiehsa na lienpite ngaisun un.

²⁵Ahi vangin sietna na bawl nah lai uleh, note le na kumpipa uh na ni-un ang kisumaimang ding hi,” a ci hi.