Read Zou 1 SAMUEL 13 Bible Online

1 SAMUEL 13 - Zou bible

1 SAMUEL 13

¹Saul kumpi a suo patin kum sawmthum[77] pha a, ama in kum sawmni le kum ni[78] sung Israel uh hi.

²Saul in Israel sung panin mi tul thum teel hi; tul nite Michmash le Bethel muoltung gamah Saul tawh a om vua, tul khatte Benjamin gam Gibeah-ah Jonathan tawh a om ton uhi; ama in mi a omlai teng a puonbuh vuah peisah hi.

³Jonathan in Geba-a om Philistia khuocingte zo hi; tuale Philistia-te in tua thu a na za uhi. Tuale Saul in gam zosie-ah pengkul mut a, “Hebrew-zosie zasah un!” a ci hi.

⁴Saul in Philistia khuocingte a zawna le Philistia-te adingin Israel huothuoi a hina zong Israel in a zah ciengin, Gilgal ah Saul panpi dingin mite kihlan hi.

⁵Israel tawh kido dingin Philistia-te a kikhawm vua, leeng tul sawmthum, sakol galkap tulguh, le a galkapte tuipi gei-a senel za-in a tam uhi; amate zong peito-in Beth-avan nisuona lam Michmasah ah giephuol a sat uhi.

⁶Philistia-te in Israel nah neh mama uh ahi ziehin lungkham mangbahna sungah a op lam uh a kithei ciengun suonghawm sung, leihawm sung, suong kawhawm lah, han lah le tuikhuh sung lah po-ah a kiphuol uhi.

⁷Hebrew mi pawlkhat in Jordan gun kantanin Gad le Gilead gamah a galkai uhi. Gilgal ah Saul om lai a, mi zosie in a citun sa-in ama a zui uhi.

⁸Ama in Samuel’ hun ciengtan ahi ni sagi sung a ngah hi; ahi vangin Gilgal ah Samuel pei nawn loin Saul kung panin mite a taimang sieng ta uhi.[79]

⁹Tuaci’n Saul in, “Kei kungah meihal biehna le thunuom biehnate hing tawi un,” a ci hi. Tuale ama in meihal biehna a pie hi.

¹⁰Ama in meihal biehna a man lien ciengin Samuel a tung hi; tuale ama a dawn ding le a muoh dingin Saul a pusuoh hi.

¹¹Samuel in, “Bang bawl na hiei?” a ci hi. Saul in dawngkia a, “Kei kung panin mite a taimang vua, a ni ciengtan hun sungin nang lah nang tung sih a, Michmash-ah Philistia-te a kikhop uh ka mu ciengin,

¹²keima in, ‘Tu-in Gilgal ah keima ei do dinga ang kumsuh ding uh ahi ta a, ken lah TOPA maipha ka ngen nai sih hi,’ ka ci hi; tuaci’n kei mama in meihal biehna ka na paupieh ta hi,” a ci hi.

¹³Samuel in Saul kungah, “Nang na mot gamtat ta hi; nang in thu ang pie TOPA na Pasien’ thupieh na zui ta sih hi. TOPA in Israel tungah na kumpi gam kipsah zing ding hi,

¹⁴ahi vangin tu-in na kumpi gam kizomsuoh lo ding a, TOPA in ama’ lunglamsu mi khat a sui zo hi. TOPA ang thupieh na zui lo ziehin ama’ mite tungah a uh dingin TOPA in ama a se zo ta hi,” a ci hi.

¹⁵Samuel ding dawhin Gilgal[80] panin Benjamin gam Gibeah ah peito a, a omlai mi teng in galkap lut dingin Saul nua zui uhi; Gilgal panin Bejamin gam Gibeah lam naw-in amate a peito uhi. Saul in ama tawh a omton mite sim a, pasal zaguh bang a pha hi.

¹⁶Saul, a tapa Jonathan, le a ompi mite Benjamin gam sung Gibeah ah a om uhi; ahi vangin Philistia-te in Michmash ah giephuol a sat uhi.

¹⁷Tuale Philistia-te’ giephuol panin galguh pawl thumin a kuonkhie uhi; pawlkhat Shual gam Ophrah lamah kihei-in,

¹⁸adang pawlkhat in Beth-horon lam manaw-in pawl khatte gamlah Zeboiim kuom a kimusuhna muoltung[81] lamah a kihei uhi.

¹⁹Khum hunin Israel gam sung zosie-ah siakheng khat zong kimu lo hi; azieh pen Philistia-te in, “Hebrew-te in namsau hile teipi hile kheng thei lo ding hi,” a ci uhi;

²⁰tuaci’n Philistia-te kungah amau’ bawng lohlawna tu, tuzum, hei, ahi sihle a phieukawi-te[82] uh kheng dingin Israel-te a peisuh let uhi;

²¹lohlawna tu le tuzum khenhiem man pen shekel sethum- suo-seni hi a, hei khenhiem man le ciengkhuta sia phu man shekel[83] khat sethum-suo-sekhat ahi hi.[84]

²²Tuaci’n gal a kisim ni-in Saul le Jonathan tawh a omton mi khat popo’ khut sungah namsau hile teipi hile a om sih hi; hinanle Saul le a tapa Jonathan in tuate a nei uhi.

²³Tu-in Michmash peina ciengkotah Philistia khuopicingte a cing dingin a pei uhi.