Read Zou 1 SAMUEL 15 Bible Online

1 SAMUEL 15 - Zou bible

1 SAMUEL 15

¹Samuel in Saul kungah, “TOPA in ama’ mi Israel tungah kumpi dingin nang sathau nu dingin kei ei sawl hi; tua ahi ziehin tu-in TOPA’ thugen ngai in.

²Vanglien TOPA in tam bangin ci hi, ‘Egypt panin Israel-te a peito lai-un lam kalah Israel-te a langpan ziehun Amalek-te dan ka pie ding hi.

³Tu-in kuonin Amalek-te va sim unlen, a neisa zosie uh va susiemang ta un; amate hinkhawi loin numei le pasal, nausen le nawitep laite, bawngtang le tuu, kalaoh le laa-te that sieng un,’ ci hi,” a ci hi.

⁴Tuaci’n Saul in zong mi hlanin Telaim-ah mi phaza sim a, lei galkap mi tul zani le Judah mi tul sawm pha hi.

⁵Amalek khuopi-ah Saul pei a, kuom sungah a buhdap hi.

⁶Saul in Ken-te kungah, “Pei un! Dingdawh un! Amalek-te lah panin kihemkhie un, tua ahi sihle amate tawh kang susie ton ding hi; azieh pen Egypt panin a peito lai-un Israel mi zosie tungah migitna na lah uhi,” a ci hi. Tuaci’n Amalek-te lah panin Ken-te a kihemkhie uhi.

⁷Saul in Havilah panin Egypt gam nisuona lama om Shur dongin Amalek-te a zo hi.

⁸Ama in Amalek-te’ kumpipa Agag hingmat a, ahi vangin namsau tawh mi zosie that hi.

⁹Saul le mite in Agag, le tuu le bawng a hoi pente, bawngno le tuuno a thaute, le van manpha zosie hinkhawi-in a susie sih uhi; amate in a kithuse lo le bangma man lo zosie teng a susie uhi.

¹⁰Samuel kungah TOPA’ thu a tung hi:

¹¹“Kumpi-a Saul ka koikhah ka kisia hi, azieh pen keima ei zuina panin kinua hei-in ka thupiehte sem lo hi,” a ci hi. Samuel lungthah a, zan tungtawnin TOPA tungah a kiko hi.

¹²Zingmawngin Saul dawn dingin Samuel thobai a, tuale Samuel kungah, “Carmel-ah Saul pei-in tua munah ama dingin phawna muol suong khat phut a, a kilekia ciengin Gilgal-ah a peisuoh hi,” ci-in kigen hi.

¹³Saul kungah Samuel a pei ciengin Saul in ama kungah, “TOPA in nang thupha hing pie taheh; keima in TOPA’ thupiehna ka sem zo hi,” a ci hi.

¹⁴Ahi vangin Samuel in, “Tua ahile ka bila ka zah tuu hamte le bawng hamte bang ahiei?” a ci hi.

¹⁵Saul in, “Tuate Amalek-te kung pana ang peipi uh ahi hi; bangzieh ahei cile TOPA na Pasien tungah biehpiehna dingin mite in a tuituoh pen tuute le bawngte a hen uhi; hizongle adang teng ka that sieng ta uhi,” a ci hi.

¹⁶Tua ciengin Samuel in Saul kungah, “Khawl vawi! Tuzanin ka TOPA in ka kunga ei thugen pen nang kungah hing gen vang,” a ci hi. Ama in dawng a, “Hing gen in,” a ci hi.

¹⁷Samuel in, “Nangma mi neuno khatin na kingaisut vangin Israel minamte’ lutang na hi sih amah? TOPA in Israel tungah kumpi dingin sathau ang nu zo hi.

¹⁸Tuale TOPA in na sem dingin nangma ang sawl a, ‘Pei in; mawnei Amalek-te va thatgam sieng inlen, a si sieng dongun va sim tan,’ ei ci hi.

¹⁹Tuale bang dinga TOPA’ thu mang lo na hei? Bang dingin van kinuasiete zamin TOPA’ mitmu-in a sie gamta na hei?” a ci hi.

²⁰Saul in Samuel kungah, “TOPA’ thu ka mang zo a, TOPA in ka sep dinga ei sawl nasepna-ah ka pei zo hi. Amalek-te’ kumpipa Agag kang peipi zo a, Amalek-te zong ka sumang zo hi.

²¹Ahi vangin mite in gal vanlahte, tuute le bawngte, suhsiet dinga ki-ap sil hoi pente, Gilgal-a TOPA tungah biehpiehna dingin a la uhi,” a ci hi.

²²Tuale Samuel in, “TOPA in meihal biehnate le biehpiehnate, TOPA thu man ding za-in dei luo ahi amah? Biehpiehna sangin thu man ding hoizaw tahtah a, tuutang thaute sangin thu ngai ding hoizaw hi.

²³Bangzieh ahei cile ledona pen aisan mawna sangin neuzaw tuon lo a, lungkhauhna zong khielna le milim biehna ma tawh kibang ahi hi. Nang in TOPA’ thu niel zo na hi ziehin, ama’n zong kumpi hina panin ang nuol ta hi,” a ci hi.

²⁴Saul in Samuel kungah, “Kei ka khiel zo hi; bangzieh ahei cile mite giingin a thu uh ka man khah ziehin TOPA’ thupiehna le nangma’ thute ka palsat zo ta hi.

²⁵Tua ahi ziehin tu-in kang thum hi, ka khielna ei ngaidam inlen, TOPA ka bieh thei nadingin ei zuikia ta’n,” a ci hi.

²⁶Samuel in Saul kungah, “Kang zuikia sih ding hi; azieh pen nangma in TOPA’ thu na niel zo ta a, TOPA in Israel tunga kumpi na hina panin ang nuol zo ta hi.

²⁷A pei dingin Samuel a kihei ciengin Saul in a puontuolpi mongah a nua mat leh a puon a ehkeh hi.

²⁸Samuel in ama kungah, “Tuni ma ma-in TOPA in nang kung panin Israel’ kumpi gam botkehin nang sanga a hoizaw na vengpa tungah a pie zo ta hi.

²⁹Tua banah Israel’ Minthanna Pa in a thu dawhkia[97] lo ding a, a lungsim zong a khel sih ding hi. Azieh pen a lungsim khel dingin ama mihing hi lo hi,” a ci hi.

³⁰Tua ciengin Saul[98] in, “Kei ka maw zo ta hi; hinanle tu-in ka mi upate mai le Israel mai-ah ei patawi inlen, TOPA na Pasien ka bieh thei nadingin kei ei zuikia ta’n,” a ci hi.

³¹Tuaci’n Saul’ nua zui-in Samuel a kilekia hi; tuale Saul in TOPA a bie hi.

³²Tua ciengin Samuel in, “Amalek kumpipa tam sung keima kungah hing peipi in,” a ci hi. Tuale a citunsa-in[99] ama kungah Agag a pei hi. Agag in, “Tam pen sisie-a sina tahtah ahi hi,” a ci hi.[100]

³³Ahi vangin Samuel in, “Na namsau in nute ta nei lo-a a koi bangin, na nu zong numeite lahah ta nei loin a om ding hi,” a ci hi. Tuale Samuel in Gilgal-a TOPA mai-ah Agag a tuntan hi.

³⁴Tua ciengin Ramah ah Samuel a pei hi; tuale Gibeah-a ama’ inn ah Saul a pei hi.

³⁵Samuel in a si dongin Saul mu nawn lo hi, ahi vangin Saul tungtangah Samuel da mama hi. Tuale TOPA in Israel tungah kumpi dingin Saul a koi khah a kisia hi.