Read Zou 1 SAMUEL 22 Bible Online

1 SAMUEL 22 - Zou bible

1 SAMUEL 22

¹David in khum mun a nuasie a, Adullam leihawm-ah a suohta hi; a sanggamte le a pa’ innkuon zosie in tua thu a zah ciengun khum mun ama kungah a peisuh uhi.

²A lungkham poma, leiba nei poma, le a lungkim lo poma ama kungah a kituo uhi; tuale amate tungah ama makai a suoh hi. Ama tawh a omton mi zali tang bang pha hi.

³Khum mun panin Moab gam Mizpah ah David a pei hi. Ama in Moab kumpipa kungah, “Pasien in keima dingin bang ei bawlpieh ding ahei ci ka thei masangin na kungah ka nu le ka pa hing omsah[125] in, kang thum hi,” a ci hi.

⁴Ama in Moab kumpipa kungah ama gel nuasie a, mun muonhuoi sungah David a om hun sung zosie-in ama tawh a omton uhi.

⁵Tua ciengin kamsang Gad in David kungah, “Mun muonhuoi-ah om den sin; nuasie inlen Judah gam sungah pei in,” a ci hi. Tuaci’n David peikhie-in Hereth gammang lahah a pei hi.

⁶David le a mite a opna kithei zo ci thu Saul in a za hi. A khut sungah a teipi tawi-in a kimvelah a nasemte zosie a ding vua, tuale Gibeah-a makeng singkung sang nei-ah Saul a to hi.

⁷Saul in a kimvela a ding a nasemte kungah, “Tu-in ngai un, no Benjamin-te aw; Jessi’ tapa in note zosie tungah lo le lengga umte hing pie-in a tul uh, a za uhin ang koi ding uh amah?

⁸Bang dingin na unpi-un kei ei sawmdap na hi uh ahei? Ka tapa in Jessi’ tapa tawh kipawlna a bawl ciengin koima khat beh in nei theisah sih vua, tuni-a kibawl bangin ka tapa in kei ei do-in ei na lambuh nadingin ka nasempa a hantawhna vai-ah zong koima na da vateh sih vua, ka kungah zong nei gen vawt sih uhi,” a ci hi.

⁹Edom mi Saul’ nasemte makai Doeg in dawng a, “Nob khuo-a Ahitub’ tapa Ahimelech kungah Jessi’ tapa a haw lam ka mu hi.

¹⁰TOPA kungah ama adingin thu a dawhpieh a, neh le tah pie-in Philistia-pa’ namsau zong ama a pie hi,” a ci hi.

¹¹Kumpipa in Ahitub’ tapa Ahimelech le a pa’ innkuonte ahi Nob khuo-a siempu zosie hlansah hi; tuale amate a unpi-un kumpipa kungah a pei uhi.

¹²Saul in, “Ahitub’ tapa aw, tu-in ngai in,” a ci hi. Ama in dawng a, “Tanah om ing, ka pu aw,” a ci hi.

¹³Saul in ama kungah, “Bang dingin nang le Jessi’ tapa kidap kupin kei ei do na hi uh ahei? Ama in tuni-a a bawl bangin kei ei ledo-in ei na buh thei nadingin an le tui le namsau pie-in bang dingin TOPA kungah ama ading thu dawhpieh na hei?” a ci hi.

¹⁴Tua ciengin Ahimelech in kumpipa dawng a, “Na nasem zosie lahah David bangin koi thuman ahei? Ama kumpipa’ tupa ahi a, sep dinga na sawlte ama in nawsep[126] a, na inn sungah ama a kipatawi hi.

¹⁵Ama dingin Pasien kungah thu ka dawhpieh tuni a masa pen ahi amah? Hi vawt lo hi! Kumpipa in a nasemte tungah hile ka pa’ innkuonte khatpo tungah hile mawsah sin; azieh pen na nasempa in tam thute khat popo-ah a tam hile a tawm hile bangma a thei sih hi,” a ci hi.

¹⁶Kumpipa in, “Ahimelech, nang le na pa’ innkuonte a si valon ding na hi uhi,” a ci hi.

¹⁷Kumpipa in ama’ kiima ading a cingte kungah, “Kihei-in TOPA’ siempute that un, azieh pen amate zong David tawh pangton uhi; amate in ama a tai lam a thei geguh uh kei ei ko lo uhi,” a ci hi. Ahi vangin TOPA’ siempute do dingin kumpipa’ nasemte in a khut uh a lamto sih uhi.

¹⁸Tua bepin kumpipa in Doeg kungah, “Doeg, nangma kihei inlen siempute that in,” a ci hi. Edom mi Doeg kihei pai-in siempute a phiel hi; khum ni-in ama in saihadiel siempu puontuol a sil mi sawmgiet le nga tah that hi.

¹⁹Ama in siempute’ khuo ahi Nob khuo namsau tawh a vatmai hi; ama in namsau tawh numei le pasal, naupang le naungeh, a bawngtang, a laa le a tuute dongin a that sieng hi.

²⁰Ahi vangin Ahitub’ tapa, Ahimelech’ tapate lahah Abiathar a kici khat suohta a, David kungah a tai hi.

²¹Abiathar in David kungah Saul in TOPA’ siempute a tha lam a gen hi.

²²David in Abiathar kungah, “Khum ni-in Doeg khum tahah om ahi ziehin ama in Saul kungah gen valon va, ci ka thei hi. Na pa’ innkuonpi mi zosie’ sina khu keima zieh ahi hi.

²³Keima kungah om inlen zau sin; bangzieh ahei cile tha dinga kei ei suite in nang zong tha dinga ang sui ahi hi; Keima tawh bihtahin na om ding hi,” a ci hi.