Read Zou 1 SAMUEL 28 Bible Online

1 SAMUEL 28 - Zou bible

1 SAMUEL 28

¹Khum hun lai-in Philistia-te in Israel do dingin a galkapte a khawm uhi. Achish in David kungah, “Nangma le na mite, galkapte sungah keima tawh a kuonton ding na hi lam kithei in,” a ci hi.

²David in Achish kungah, “Hoi mama hi, na nasempa in bang bawl thei ahei ci na thei ding hi,” a ci hi. Achish in David kungah, “Hoi mama hi, khan tawntungin kei ei cingpa-in kang koi ding hi,” a ci hi.

³Tu-in Samuel si zo a, ama ziehin Israel zosie a kap vua, ama’ khuopi Ramah ah ama a vui uhi. Saul in a gam sung panin dawilawm neite le bumtawite a notmang hi.

⁴Philistia-te a kikhawm vua, Shunem ah pei-in giephuol a sat uhi. Saul in zong Israel zosie khawm a, Gilboa ah giephuol a sat uhi.

⁵Saul in Philistia galkapte a mu ciengin zau-in a lungsim a linglawng hi.

⁶Saul in TOPA thu a dawh ciengin TOPA in a mang tawh hile Urim tawh hile kamsangte tawh hile dawng lo hi.

⁷Tua bepin Saul in a nasemte kungah, “Ama kungah pei-in thu ka dawh thei nadingin dawilawm nei numei khat ei va suipieh ta un,” a ci hi. A nasemte in, “Endor ah dawilawm nei khat a om hi,” a ci uhi.

⁸Tuaci’n Saul in a mel selin puon dang sil a, ama le mi ni tawh khum mun a zuon uhi. Zanin amate kungah numei khat a pei hi. Ama in, “A sisa hlate khat tung panin thu ei dawhpieh inlen, nang kungah a min kang law popo ei hlatto pieh in,” a ci hi.

⁹Tua numei in ama kungah, “Saul in a gam sung panin dawilawm neite le bumtawite a hepkhietna thu na thei giagua ahi hi. Tua hi napi bang dinga ka si nading thang ei sie na hei?” a ci hi.

¹⁰Hinanle ama kungah Saul kiciem a, TOPA a hing ahi ma bangin tam thu ziehin na tungah gimna ang tung vawt sih ding hi,” a ci hi.

¹¹Tua ciengin numei in, “Koi pen kang hlatpieh diei?” a ci leh ama in, “Samuel ei hlatpieh in,” ci-in a dawng hi.

¹²Numei in Samuel a mu ciengin pengzah pai a, tuale numei in Saul kungah, “Bang dinga nei sol ahiei? Nang Saul na hi vele!” a ci hi.

¹³Kumpipa in ama kungah, “Zau sin, bang ahiei na mu?” a ci hi. Numei in Saul kungah, “Lei pana ang pusuoh hlagau[142] khat ka mu hi,” a ci hi.

¹⁴Ama in tua nu kungah, “A mel puoh dan bang a ci ei?” a ci hi. Ama in, “Puvuoi khat ang peito hi; ama in puontuolpi khat sil hi,” a ci hi. Tuaci’n Samuel ahi lam Saul in thei a, a mai tuolah kunin khupbawhin zatahna a pie hi.

¹⁵Tua ciengin Samuel in Saul kungah, “Bang dinga nei hlatto kia-a nei hici buoisah ahei?” a ci hi. Saul in dawng a, “Ka lung a kham mama hi, bangzieh ahei cile Philistia-te in ei simin ka kung panin Pasien a kihemdawh a, kamsangte tawh hile mangte tawh hile ei dawng nawn lo hi; tuaci’n bang bawl ding ka hei, ci ei hil dinga kang hlat ahi hi,” a ci hi.

¹⁶Samuel in, “TOPA in nang ang taisan a, ama na gal suoh zo napi bang dinga kei thu nei dawh lai ahei?

¹⁷TOPA in kei tung tawna ang gensa bangin na tunga ang sem ahi hi; azieh pen TOPA in na khut sung panin kumpi gam balkehin na vengpa David pie zo hi.

¹⁸TOPA’ thu mang loin Amalek-te tunga ama’ lungthah mama na tawh kizui-in sem lo na hi ziehin tuni-in TOPA in nang tunga tam bang ang sep ahi hi.

¹⁹Tham loin TOPA in Philistia-te khut sungah nang tawh Israel ang pieton ding hi; tuale zing ciengin kei tawh nang le na tapate i om ton ding uhi. TOPA in Philistia-te’ khut sungah Israel galkapte a pie ding hi,” a ci hi.

²⁰Samuel thugen teng ziehin zausi-in thakhatthu-in tuolah Saul a tawnpua pai hi; sun khuo zan khuo bangma a neh lo ziehin a tha a zawm hi.

²¹Saul kungah tua numei pei a, ama a zau seng lam a mu ciengin ama kungah, “Na nasemnu in na thu ka ngai zo hi; ka luong khamin keima kunga nang gen bangin ka bawl zo hi.

²²Tua ahi ziehin tu-in nang in zong na nasemnu’ thu ei ngai in; na mai-ah anlum halkhat ei luisah in. Na lampi-ah na pei ciengin na thahat nadingin ne in,” a ci hi.

²³Ama in niel a, “Ka ne sih ding hi,” a ci hi. Ahi vangin tua numei tawh kithuo-in a nasemte in a ci teitei uhi; tua bepin ama in a thu uh a mang hi. Tuaci’n lei panin ama tho-in lupna tungah a to hi.

²⁴Tu-in tua numei in a inn ah bawngno thau khat nei a, mallang tahin go-in annel la-in meh a, tol saw lo anlum a em hi.

²⁵Tua nu in Saul le a nasemte mai-ah lui a, tuale amate in a ne uhi. Tua ciengin khum zanin amate dingin a peikhie uhi.