Read Zou 1 SAMUEL 31 Bible Online

1 SAMUEL 31 - Zou bible

1 SAMUEL 31

¹Tu-in Philistia-te in Israel a sim uhi; tuale Philistia-te mai-ah Israel mite a taimang vua, Gilboa Muol tungah tampitah a puamat[145] uhi.

²Philistia-te in Saul le a tapate a nuaphah uhi; tuale Philistia-te in Saul’ tapate ahi Jonathan, Abinadab le Malchishua a that uhi.

³Gal in Saul nahpitahin a neh hi; thalkapte’ thaltang in ama kha-in nah liem mama hi.

⁴Tua ciengin Saul in a galvan puopa kungah, “Tam tep tan lote ang pei-in ei dawtlia vua, apmaina-in ei nei lo nadingun na namsau dawh inlen ei dawtlia ta’n,” a ci hi. Hizongle tua galvan puopa in a bawl nuom sih hi; azieh pen ama a cimul a tho hi. Tuaci’n Saul in ama’ namsau la-in tua nam dawn tungah puasuhin a si hi.

⁵A galvan puopa in Saul si a mu bepin ama zong a namsau tungah puasuhin ama tawh a siton hi.

⁶Tuaci’n Saul le ama’ tapa thum teng le a galvan puopa le ama mi zosie nikhat thu-in a si sieng uhi.

⁷Jezreel kuom galkhat le Jordan galkhata om Israel mite in Israel mite taimangin Saul le a tapate kithat zo hi, ci a zah ciengun a khuopite uh nuasie-in a tai uhi; tuale Philistia-te pei-in tua khuopite a luo uhi.

⁸A zing ni-in misite’ puon hawhkhie dingin a kuon ciengun Saul le a tapa thum’ luong kilawmlia a mu uhi.

⁹Saul’ lu tanin a galhiem a hawhkhe vua, a milimte’ opna innte le mite kungah tam lungdamna thu a puoh dingin Philistia gam sung mun zosie-ah kamtaite a sawl uhi.

¹⁰Amate in Astarte[146] biehinn sungah a galhiemte a koi uhi; tuale amate in Beth-shan kulbangah a lu a khai uhi.

¹¹Ahi vangin Jabesh-gilead mite in Saul tunga Philistia-te bawldan a zah ciengun

¹²galhang pasal zosie a ding vua, tuaci’n zan tungtawnin pei-in Beth-shan kulbang panin Saul le a tapate’ luong a la uhi. Amate Jabeshah tungin tua munah a haltum uhi.

¹³Tua ciengin a gute la-in Jabesh-a makeng kung nei-ah vui-in ni sagi sung an a tang uhi.