Read Zou 1 SAMUEL 4 Bible Online

1 SAMUEL 4 - Zou bible

1 SAMUEL 4

¹Tuale Israel mi zosie tungah Samuel’ kammal a tung hi. Khum hun lai-in Israel-te do dingin Philistia-te a kikhawm vua, Israel-te[32] zong amate[33] do dingin kuon uhi; amate in Ebenezar ah giephuol satin Philistia-te in Aphek ah giephuol a sat uhi.

²Israel-te do dingin Philistia-te a kiguol dimdem vua, amate a kido uleh[34] Philistia-te in Israel-te zo-in galphuol sungah mi tulli kim bang that uhi.

³Giephuol sungah galkapte a pei ciengun Israel upate in, “Tuni-in TOPA in Philistia-te mai-ah bang dinga gal ei lelsah adiei? Eite lahah ama hing pei-in i galte’ khut sung panin ei hutdam thei nadingin Shiloh panin tam tahah TOPA’ thuciemna singkuong puo vai,” a ci uhi.

⁴Tuaci’n mite in Shiloh ah mi sawlin khumtah panin Cherub-te tunga to Vanglien TOPA’ thuciemna singkuong a puo uhi. Khum tahah Pasien’ thuciemna singkuong tawh Eli’ tapa tegel Hophni le Phinehas a omton uhi.

⁵TOPA’ thuciemna singkuong giephuol sung a tun ciengin Israel zosie nahpi-in a awng uhi.

⁶Philistia-te in kikona awging a zah ciengun amate in, “Hebrew-te’ giephuolah tam bang kikona awging vapuoh bang deina adiei?” a ci uhi. Giephuolah TOPA’ singkuong tung zo ta hi ci thu a thei ciengun,

⁷“Giephuol sungah amau’ pasien-te[35] tung zo hi,” a ci ziehun Philistia-te a zau uhi. Amate in, “Gim nga i hi ta uhi! Azieh pen nidangin tam bang pieng ngai lo hi.

⁸Gim nga i hi ta uhi! Koi in tami a thahat pasien-te’ khut sung panin ei hunkhie zo ding ahei? Tamte khu gimna a tuomtuomte tawh gamlahah Egypt-te a thatgam pasien-te ahi hi.

⁹Philistia-te aw, amate noma’ sila a suo ngai bangun Hebrew-te’ sila na suo lo nadingun hang unlen, kipasalsah un; kipasalsah unlen do un,” a ci uhi.

¹⁰Tuaci’n Philistia-te in a do uhi; Israel-te in gal lelin a inn ciet vuah a unpi-un a tai sieng uhi. Mi tampitah kithat hi, azieh pen Israel keng gakap mi tul sawmthum a si hi.

¹¹Pasien’ singkuong kiman hi; tuale Eli’ tapa tegel Hophni le Phinehas zong si hi.

¹²Benjamin mi khat galphuol panin tai-in a puon ehkehsa le a lutunga leivui bangsa-in tuami ni ma-in Shiloh ah a tung hi.

¹³Ama a tun ciengin Eli in Pasien’ singkuong lunghimawpi ahi ziehin lampi gei-a ama’ tona tungah to-in na khuodahdah hi. Khuopi sungah tua mipa pei-in a thu teng a gen ciengin khuopi sunga mi zosie a awng pai uhi.

¹⁴Eli in tua kikona a zah ciengin, “Tami gamlumna bang ahiei?” a ci hi. Tua ciengin tua mipa naw pei-in Eli kungah a gen hi.

¹⁵Tu-in Eli kum sawmkuo le kum giet pha a, a mit mangin khuo mu thei lo hi.

¹⁶Tua mipa in Eli kungah, “Keima, galphuol pana ang pei ka hi hi; tuni-in galphuol panin kang tai hi,” a ci hi. Ama in, “Ka tapa bang a ciei?” a ci hi.

¹⁷Kamtaipa in dawngin, “Philistia-te mai-ah Israel-te a taimang zo ta vua, galkapte lahah a kithat mi tampi om hi. Na tapa tegel Hophni le Phinehas si zo hi, Pasien’ singkuong zong galte in ei matpieh ta hi,” a ci hi.

¹⁸Ama in Pasien’ singkuong a genkhah laitahin tunkot gei ama’ tona panin Eli[36] thalpua-in a ngawng tawngin a si hi, azieh pen ama tehsie ahi ta a, a pumpi a gih hi. Ama in Israel-te kum sawmli sung thu a khen hi.

¹⁹Tu-in a monu Phinehas’ zi gai-in a suoh kuon ahi hi. Ama in Pasien’ singkuong a kimatna, le a innpipa le a pasal sina thu a zah ciengin kunin nau a suoh hi; azieh pen ama takeih natna in tun hi.

²⁰Ama a si dihtah bepin ama a kem naudom numeite in, “Zau sin, azieh pen tapa khat na nei hi,” a ci uhi. Hizongle ama in dawnglo-in zong thudon lo hi.

²¹Ama in, “Minthanna in Israel taisan zo hi,” a cinopna-in nausen’ min Ichabod phuoh hi, azieh pen Pasien’ singkuong a kimat zo zieh le a innpipa le a pasal zieh ahi hi.

²²Tua nu in, “Pasien’ singkuong kiman zo ahi ziehin minthanna in Israel taisan zo hi,” a ci hi.