Read Zou 1 SAMUEL 5 Bible Online

1 SAMUEL 5 - Zou bible

1 SAMUEL 5

¹Philistia-te in Pasien’ singkuong a mat zaw ciengun, Ebenezar panin Ashdod ah a tut uhi;

²tua zaw ciengin Philistia-te in Dagon inn sungah Pasien’ singkuong puo-in Dagon gei-ah a koi uhi.

³A zing ciengin Ashdod-te a thobai vua, tuale TOPA’ singkuong mai lei lahah mai kunin Dagon na pua hi. Tuaci’n amate in Dagon a la vua, a opna ngai-ah a koikia uhi.

⁴Hinanle a zing cieng zingmawngin a thobai vua, TOPA’ singkuong mai lei lahah mai kunin Dagon na pua leuleu a, Dagon lutang le a khut tegel kisattanin sangkil tungah na om hi; Dagon pen a pumpi beh na omlai hi.

⁵Tua thu ziehin Dagon siempute le Ashdod-a Dagon inn-a lutte in tuni dongin Dagon sangkil tung a sia sih uhi.

⁶Ashdod-te tungah TOPA’ khut gih a, ama in uilut tawh Ashdod-te sung le a gam sung gawtin a zausah hi.

⁷Ashdod-te in sil omdan teng a mu bepun, “Eite tawh Israel-te Pasien’ singkuong om thei poma lo ding hi; azieh pen ama in eite le i Pasien Dagon ei genthei bawl hi,” a ci uhi.

⁸Tuaci’n mi sawlin Philistia ulien zosie a khawmtuo vua, “Israel-te Pasien’ singkuong bang i law diei?” a ci uhi. Gath-a tengte in a dawng vua, “Ko kungah Pasien’ singkuong koisah vai,” a ci uhi.[37] Tuaci’n Gath ah Israel-te Pasien’ singkuong a tuo uhi.[38]

⁹Hinanle amate in Gath ah[39] a tut zaw ciengun TOPA in tua khuopi langpanin zauna tampi piengsah hi; ama in a khuopi mite a teh a khangin gimsahin uilut a veisah hi.

¹⁰Tuaci’n Ekron ah Israel-te’[40] Pasien’ singkuong a puoh uhi. Hinanle Ekron ah Pasien’ singkuong a tun ciengin Ekron khuo mite a kiko vua, “Bang dingin[41] eite le i[42] mite that dingin Israel[43] Pasien’ singkuong i[44] kung vua ang tut uh ahei?” a ci uhi.

¹¹Tua ahi ziehin amate in mi sawlin Philistia uliente zosie a khawm vua, “Ko le ka mite a tha lo nadingin Israel-te Pasien’ singkuong puodawh ta unlen, a opna ngai-ah peisahkia ta un,” a ci uhi. Bangzieh ahei cile a khuopi sung mun zosie-ah sina cing patauna[45] a om hi. Pasien in khum munah amate a genthei bawl mama hi;

¹²a silo sunteng zong uilut a vei vua, tuaci’n khuopi sungah kaa le mau vantung dongah a kato hi.