Read Zou 1 SAMUEL 6 Bible Online

1 SAMUEL 6 - Zou bible

1 SAMUEL 6

¹Philistia-te gam sungah TOPA’ singkuong hla sagi sung a om hi.

²Tua ciengin Philistia-te in siempute le aisante hlanin, “TOPA’ singkuong bang i law diei? Ama opna munah bang tawh peisah ding i hei ei gen un,” a ci uhi.

³Amate in, “Israel-te’ singkuong na sawldawh ding uleh a guohin sawl sih un, bangbang hile khielna zieha biehna pie un. Tua ciengin na dam ding vua, bang zieha note kung pana a khut a khin nai lo lam na thei ding uhi,” a ci hi.[46]

⁴Amate in, “Khielna zieha ama tunga i pieh ding biehna khu bang ahiei?” a ci uhi. Amate in a dawng vua, “Philistia uliente phaza tawh kituohin kham uilut nga le kham simbeng nga hi ding hi; bangzieh ahei cile no tung le na uliente uh tungah a kibang gimna ang tung hi.

⁵Tuaci’n na gam sung uh ang susie na uilut limte ule na simbeng limte uh bawlin, Israel-te’ Pasien tungah minthanna na pie ding uhi; ama in note le na pasien-te ule na gam tung vuah a khut ang zangsah thei kha ding hi.

⁶Egypt-te le Pharaoh in a lungsim uh a khausah bangin bang dingin na lungsim uh khausah ding na hi uh ahei? Ama in amate a ki-apmaipi zaw ciengin, amate in peisah a, tuaci’n amate peikhie uh hi lo amah?

⁷Tua ciengin tu-in leeng tha khat le kol kivaw nai lo bawngpi no nei ni a baisa-in koi unlen, leengah tua bawngte vaw un. Ahi vangin a kung panun a note kai unlen inn ah peipi un.

⁸TOPA’ singkuong la-in leeng tungah koi unlen, khielna zieha biehna na pieh uh kham limte a singkuong khat sungah guongin a gei-ah koi un. Tua ciengin sawldawh unlen, a peina dingah peisah un.

⁹Tuale en khinkhien un; bawngte in a gam zuonin Beth-shemesh lamah a peito leh, sietna golpi a tungsah pa ama hi ding hi; ahi vangin a peito sih leh ei gawtpa ama ahi sih hi; eite tunga a pieng mawhmawh hi, ci-in i thei ding hi,” a ci uhi.

¹⁰Mite in tua bang ma-in a bawl uhi; a no nei bawngpi ni kai-in bawng leengah a vaw vua, inn ah a note a khum uhi.

¹¹TOPA’ singkuong pen kham simbeng le a uilut limte uh opna singkuong tawh leeng tungah a koiton uhi.

¹²Lamlien dung zui-in Beth-shemesh lam muhin bawngte tangtahin a pei vua, a pei kawmun a hamham uhi; zietlam hile veilam hile a kihei sih vua, tuale Philistia uliente in Bethshemesh’ gamgi dongin a nua a zui uhi.

¹³Tu-in Beth-shemesh mite in kuom sungah mangbu a at laitah uh ahi hi. Amate khuodahin singkuong a mu ciengun a en dingin kipahtahin a pei uhi.[47]

¹⁴Beth-shemesh mi Joshua lo-ah a leeng tung a, khum tahah a khawl hi. Khum tahah suongtum golpi khat a om hi; tuacin a leeng singte phelkehin TOPA tungah meihal biehna-in a bawngpite a pie uhi.

¹⁵Levi-te in TOPA’ singkuong le a panga kham milim opna singkuong la-in suongtumpi tungah a koi uhi. Tua ciengin Beth-shemesh mite in TOPA tungah meihal biehnate le biehpiehnate a pie uhi.

¹⁶Philistia ulien ngate in tua teng a mu bepun khum ni ma-in Ekron-ah a kilekia uhi.

¹⁷Philistia-te in khielna zieha biehna dinga TOPA tunga a pieh uh kham uilutte: Ashdod ading khat, Gaza ading khat, Ashkelon ading khat, Gath ading khat, Ekron ading khat;

¹⁸Ulien ngate’ uh Philistia-te khuopi kulpi nei le khuoneu kul nei lote adingin a khuo phaza utawh kizui-in kham simbengte tawh zong ahi hi. Amate in TOPA’ singkuong a koina gei vua suongtumpi pen Beth-shemesh mi Joshua’ lo-ah tuni dongin teci ahi hi.

¹⁹TOPA’ singkuong a muoh[48] ciengun Jeconiah’ suonlehlahte, Beth-shemesh mite tawh a lungdam ton sih uhi; tuale ama in amate sawm sagi that hi.[49] TOPA in mite lahah mi tampitah a tha tah ziehin mite da-in a kap uhi.

²⁰Tua ciengin Beth-shemesh mite in, “Tam a siengtho Pasien, TOPA mai-ah koi om zo ding ahei? I kung panun hemdawhin koi kungah i peisah diei?” a ci uhi.

²¹Tuaci’n Kiriath-earim a tengte kungah patong sawlin, “Philistia-te in singkuong ei puohkia zo ta uhi. Hing peisuh unlen na kung vuah puoto un,” a ci uhi.