Read Zou 1 SAMUEL 7 Bible Online

1 SAMUEL 7 - Zou bible

1 SAMUEL 7

¹Tuale Kiriath-jearim mite pei-in TOPA’ singkuong a puoto vua, muol tunga Abinadab’ inn sungah a tut uhi. Amate in TOPA’ singkuong kem dingin a tapa Eleazar a siensuo uhi.

²Kiriath-jearim ah singkuong a om ni-a kipanin hun saupi sung, kum sawmni kim bang, Israel innkuon zosie in TOPA ngai-in a thum[50] vangut uhi.

³Tua ciengin Samuel in Israel innkuon zosie kungah, “Na lungsim zosie utawh TOPA lamah a kiheikia na hi uleh, gamdang pasien-te le note lah panin Astartes-te paimang un. Na lungtang uh TOPA lam ngatin ama’ na beh sem un, tua hile ama in Philistia-te’ khut sung panin ang hunkhie ding hi,” a ci hi.

⁴Tuaci’n Israel mite in Baal-te le Astartes-te a paimang vua, TOPA’ na beh a sem uhi.

⁵Tua ciengin Samuel in, “Mizpah-ah Israel zosie a unpi-in khawm unlen, note dingin TOPA tungah thu ka ngen ding hi,” a ci hi.

⁶Tuaci’n Mizpah ah a kikhawm vua, tui sawhin TOPA mai-ah a sung uhi. Khum ni-in an a tang vua tuami munah, “TOPA mai-ah i khiel ta uhi,” a ci uhi. Tuale Samuel in Mizpah ah Israel mite thu a khen hi.

⁷Mizpah ah Israel mite kikhawm zo hi, ci thu Philistia-te in a zah ciengun Israel do dingin Philistia uliente a kuonto uhi. Israel mite in tua thu a zah ciengun amate in Philistia-te a giing uhi.

⁸Israel mite in Samuel kungah, “TOPA i Pasien in Philistia-te’ khut sung panin ei hunkhiet thei nadingin ama tungah thunget khawl vawt sin,” a ci uhi.

⁹Tuaci’n Samuel in nawi ne lai tuuno khat la-in TOPA tungah meihal biehna-in a buppi-in a pie hi; TOPA tungah Israel adingin Samuel kiko a, tuale TOPA in ama a dawng hi.

¹⁰Samuel in meihal biehna a pieh laitahin Philistia-te in Israel do dingin a nai uhi; ahi vangin tua ni-in vanto tawh a kibang awging tawh TOPA in Philistia-te do-in a amkhamsah gawp hi; tuale Israel mai-ah amate kinotmang hi.

¹¹Mizpah panin Israel mite peikhie-in Philistia-te a nuadel vua, Beth-car galkhat cieng dongin a vatmai uhi.

¹²Tua ciengin Samuel in suong khat la-in Mizpah le Jeshanah[51] kikalah phut a, a min Ebenezer[52] phuoh hi. Bangzieh ahei cile ama in, “TOPA in tu cieng dong ei panpi hi,” a ci hi.

¹³Tuaci’n Philistia-te kizo a, Israel gam sungah a lutkia nawn sih uhi; Samuel hun sung zosie TOPA’ khut in Philistia-te a langpang hi.

¹⁴Philistia-te in Israel tung pana a lahsa uh khuopite, Ekron pan Gadth dong kikal sung teng, Israel tungah kipiekia hi; tuale Philistia-te’ khut sung panin Israel in a gam uh a ngakia hi. Israel le Amor-te kikalah zong kilemna a om hi.

¹⁵Samuel in a hin sung tungtawnin Israel tungah thu a khen hi.

¹⁶A kumkumin Bethel, Gilgal, le Mizpah ah zin kawikawi hi; tuale ama in tam munte zosie-ah Israel mite thu a khen hi.

¹⁷Tua ciengin khum munah a inn a op ziehin Ramah ah a pei zel hi; ama in khum muna Israel tungah zong a dihin thu khen a, TOPA adingin maitam khat zong khum munah a lam hi.