Read Zou 1 SAMUEL 9 Bible Online

1 SAMUEL 9 - Zou bible

1 SAMUEL 9

¹Benjamin-te sung panin Aphiah’ tapa Bekorath, a tapa Zeror, a tapa Abiel, a tapa Kish a kici Benjamin-te mihau khat a om hi.

²Ama in Saul kici tapa khat nei a, tangval meihoi khat ahi hi. Israel mite lahah ama sanga a melhoizaw koima om lo hi; midang zosie ama’ liengko cieng beh a pha uhi.

³Tu-in Saul’ pa Kish’ laate a mang hi. Tuaci’n Kish in a tapa Saul kungah, “Naupang khat zawpi inlen, laate va sui ta un,” a ci hi.

⁴Ephraim muoltung gam teng le Shalishah gam teng zawtin a sui vua, ahi vangin a mu sih uhi. Shaalim gam teng a nawh vangun khum gamah a om sih hi. Tua ciengin Benjamin gam teng a nawh vangun zong a mu tuom sih uhi.

⁵Zuph gamah a tun ciengun Saul in a zawpi naupangpa kungah, “Kia ta vai. Tua hi sihle ka pa in laate lunghimaw nawn loin ei gel ei lunghimawpi ta zaw ding hi,” a ci hi.

⁶Hizongle ama in, “Tami khuo sungah Pasien’ mi khat om a, ama pen a kizatah mi khat ahi hi; a gen popo a manin tung hi. Tu-in khumnah va pei ta vai; ama in i khuolzinna thu ei genthei kha ding hi,” a ci hi.

⁷Tua ciengin Saul in naupangpa kungah, “Ahi mawh vangin pei leih tua mipa bang i tut diei? Azieh pen i ip sunga i mohte lah tawp zo ta a, Pasien’ mipa kunga i tawi ding letsong a om sih hi. Ei gel in bang i nei ei?” a ci hi.

⁸Naupangpa in Saul dawngkia-in, “Tamnah ngun shekel seli-suo-sekhat ka nei hi. I lampi ang gen nadingin ama ka pie ding hi,” a ci hi.

⁹(Nidang lai-in Israel sungah mi khat in Pasien kungah thu dong dingin a pei ciengin, “Hing pei in, thumu pa kungah va pei ta vai,” ci hi; azieh pen tulai taha kamsang i cite pen nidang lai-in thumu pa kici hi.)

¹⁰Saul in naupangpa kungah, “Hoi hi; hing pei inlen va pei ta vai,” a ci hi. Tuaci’n Pasien’ mipa opna khuopi-ah a pei uhi.

¹¹Khuopi lam zuonin muol tungah a peito laitahun tui tawi dinga a kuon ngahnu pawlkhat tawh a kituoh vua, amate kungah, “Thumu pa tanah a om ei mah?” a ci uhi.

¹²Amate in, “Om ma, na mai diem vua pei ahi hi. Kinaw un; khuopi sungah tu mama-in ama pei zo hi, azieh pen tuni-in biehbuhno-ah mite in kithoina a nei uhi.

¹³Khuopi sung na lut behun biehbuhno-ah an ne dinga a peito masangin ama na mu ding uhi. Biehpiehna thupha pie ding ahi ziehin ama pei masangin mite in an a ne sih ding uhi. Tua zaw ciengin a kihlante in ne thei pan beh uhi. Tu-in peito un, bang ding ahei cile ama na tuoh pailien ding uhi,” ci-in a dawng uhi.

¹⁴Tuaci’n amate khuopi-ah a peito uhi. Khuopi sungah amate a lut laitahun biehbuhno lam zuona ang peito Samuel a mu uhi.

¹⁵Saul a pei masang a zani-in TOPA in Samuel kungah thu na gen zo ta hi:

¹⁶“Zing cieng tu bang hunin na kungah Benjamin gam panin mi khat kang sawl ding a, ka mi Israel tunga a uh dingin ama sathau na nu ding hi. Ama in Philistia-te’ khut sung panin ka mite a hunkhie ding hi; bangzieh ahei cile a kikona uh ka kungah hing tung zo ahi ziehin ka mite’ thuohna[55] ka mu zo hi,” a ci hi.

¹⁷Samuel in Saul a mu ciengin, TOPA in ama kungah, “Na kunga kang gen mipa tanah a om hi. Ka mite’ tunga a uh ding pa khu ama ahi hi,” a ci hi.

¹⁸Tua ciengin Saul in tunkot sung lamah Samuel nai-in ama in, “Kang thum hi, thumu pa’ inn hei sung ahiei?” a ci hi.

¹⁹Samuel in Saul dawngin, “Keima, thumu pa ka hi hi; ka masanga biehbuhno-ah peito in, azieh pen tuni-in kei tawh an na ne ding a, zingmawng ciengin nang hing peisahin, na lungsima om zosie kang gen ding hi.

²⁰A tawpsa ni thum lai-a a mang na laate uh ahile kimu zo ta ahi ziehin ngaisutin nei nawn vet sin. Nang tung le na pupa innkuon sung zosie tungah Israel mi zosiete’ lungtup a op sih leh koi pen tungah om tava na ci ahei?” a ci hi.

²¹Saul in, “Kei pen Israel minamte sung pan a citawm pen Benjamin-te ka hi a, keima’ innkuon zong Benjamin minam sunga innkuon zosiete sung pan a ginalo pen ka hi bo uhi. Tua ahile bang dinga tam banga nei hopi ahei?” ci-in a dawng hi.

²²Tua ciengin Samuel in Saul le a nasem naupangpa hlanin innkhan sungah zawpi a, mi sawmthum bang a pha a kihlan mite lahah tona thupi pen-ah ama a tosah hi.

²³Samuel in anhuon pa kungah, “Na tuom koi in ci-a kang pieh tanh pen hing la vawi,” a ci hi.

²⁴Anhuon pa in samal le tua[56] tawh a om teng la-in Saul mai-ah a lui hi. Samuel in, “En in, nang adinga kang tuomhenpieh teng na mai-ah kilui hi. Ne in; bang ding ahei cile a kise hun ciengin lenglate tawh na neh thei dinga na mai-a kikoi[57] ahi hi,” a ci hi.[58] Tuaci’n khumi ni-in Samuel in Saul tawh an a ne ton hi.

²⁵Biehbuhno panin khuopi sungah amate a peisuh ciengun innkhum zangah Saul[59] adingin lupna khat na kipha a, ama a kimu dingin a lum hi.[60]

²⁶Zingmawng khuo va zaw ciengin[61] Samuel in innkhum zanga Saul hlanin, “Na pei nading munah kang sawl thei nadingin tho in,” a ci hi. Saul zong tho-in khuopi gawlzin lamah ama le Samuel a pei uhi.

²⁷Khuopi gei lamah a peisuh laitahun Samuel in Saul kungah, “Tua naupangpa i mai-ah a peisuoh nadingin gen inlen, ama a peisuoh zaw ciengin nangma tungah Pasien’ kammal kang theisah thei nadingin tanah bakhat sung khawl phot in,” a ci hi.