Read abua Emiighom 11 Bible Online

Emiighom 11 - abua bible

Emiighom 11

¹Ẹḅel amem mọ oomo awe sịen aḅirini phọ ụḅa ghan oniin ọnhu, ọḅile oghol ghan rạraar eniin phọ egholom mọ.

²Kụ ịdipho bịdi ọḍuaghu ạga phọ erumuḍio phọ remite ghan bọ kụ rọki, kụ bịdi ọmiin ḍịyaghaghaany ade ẹpe Bạbilonia kụ ọghi orugh sịphe.

³Kụ oniin ạḅeni nyoniin mọ, “Itu ọḅol ọogha ọphophoghi dị ạmaar ạkpar.” Kụ iḍighi kụ bịdi ụmoogh ni iiḅoghoḍi ughol ọloghom aruutu, rꞌọogha ọḅiirom.

⁴Kụ bịdi ọḅem mọ, “Nyịidipho ọlogh otu ẹmha ẹedaneen dị kasi okuaḍio phọ pịdi yira omitiom ḍien ḅịle kọ́walala sịen aḅirini phọ.”

⁵Pọ kụ amem dị Ọmoogh-we phọ aru asoor ude kụ ạmiin otu ẹedaneen phọ awe phọ mọlhogh bọ,

⁶kụ ọdi ạḅem mọ, “Nyịidipho oomo awe phọ ạbuen moḍighi bụo eniin eelhe kụ rọḅa ghan oniin ọnhu. Ịmaar ephogh ịphen bịdi moḍighi yogh bọ. Ịphen kụ emiighom ạraraar dị bịdi koḍighi. Esi ekulha amem, bịdi kotue oḍighi ịyaar lọ bịdi rọwa oḍighi.

⁷Itu osoor ude ọghi ọgbaragbarami ọnhu phọ ạbidi, pịdi oniin ọnhu oniin kạ́naghan mun ạḅa.”

⁸Kụ iḍighi kụ Ọmoogh-we phọ ạawalami bịdi oomo aḅirini phọ; kụ bịdi ọwile ẹmha phọ ụ́logh mun.

⁹Ughol ẹmha phọ mọ ạBabilon: ịdi eḍighi bọ ịsiphe kụ esi phọ Ọmoogh-we phọ ạgbaragbarami bọ ọnhu oomo awe phọ, kụ amiigh sịphe ọowalami oomo awe aḅirini phọ.

¹⁰Bụen kụ ẹemara ẹemara phọ ạSem. Aḍigho phọ ẹḍua bọ ịyal ạsia kụ iten kụ ạSem ạmar olephiri ọony, Apaksad, mem dị ọdi mạman oniin okuron ạsia.

¹¹ẠSem ạmar bọ Apaksad, ọdi ạrol ịnon oogh okuron ạsia, ạḅile ạmaraghi bụnon ạnmuny.

¹²Mem dị Apaksad ạman ịraardi rꞌoogh ạsia, kụ ạmar olephiri ọony, Sela,

¹³Apaksad ạmar bọ Sela, ọdi ạrol ịnon inya okuron rꞌịraar ạsia, ạḅile ạmaraghi bụnon ạnmuny.

¹⁴Mem dị aSela ạman ịraardi ạsia, ọdi ạmar olephiri ọony, Eber;

¹⁵aSela ạmar bọ Eber, ọdi ạrol ịnon inya okuron rꞌịraar ạsia, ạḅile ạmaraghi bụnon ạnmuny.

¹⁶Mem dị Eber ạman ịraardi rꞌinya ạsia, ọdi ạmar olephiri ọony, Peleg;

¹⁷Eber ạmar bọ Peleg, ọdi ạrol ịnon inya okuron rꞌịraardi ạsia, ạḅile ạmaraghi bụnon ạnmuny.

¹⁸Mem dị aPeleg ạman ịraardi ạsia, ọdi ạmar olephiri ọony, Riu;

¹⁹aPeleg ạmar bọ Riu, ọdi ạrol ịnon ịyal okuron rꞌesugha ạsia, ạḅile ạmaraghi bụnon ạnmuny.

²⁰Mem dị aRiu ạman ịraardi rꞌịyal ạsia, ọdi ạmar olephiri ọony, Serug;

²¹aRiu ạmar bọ Serug, ọdi ạrol ịnon ịyal okuron rꞌoḍual ạsia, ạḅile ạmaraghi bụnon ạnmuny.

²²Mem dị aSerug ạman ịraardi ạsia, ọdi ạmar olephiri ọony, Nahor;

²³aSerug ạmar bọ Nahor, ọdi ạrol ịnon ịyal okuron ạsia, ạḅile ạmaraghi bụnon ạnmuny.

²⁴Mem dị aNahor ạman ịyaldi rꞌesugha ạsia, ọdi ạmar olephiri ọony, Tera;

²⁵aNahor ạmar bọ Tera, ọdi ạrol ịnon oniin okuron rꞌiḍioph rꞌesugha ạsia, ạḅile ạmaraghi bụnon ạnmuny.

²⁶ATera rọman oḍualdi ạsia, kụ ọdi aḍighi ọde Ebram rꞌaNahor rꞌạHaran.

²⁷Bụen kụ ẹemara ẹemara phọ aTera. ATera aḍighi ọde Ebram rꞌaNahor rꞌạHaran. ẠHaran aḍighi ọde ạLot.

²⁸ẠHaran ạrol ẹpe ẹmha Ur ẹpe ọmar bọ nyọdi ẹpe eelhe ạBabilon kụ ạphur amugh ọde phọ ọdi.

²⁹Ebram aphin Serai kụ aNahor aphin Milka, ọnyani ạHaran ọde phọ Iska.

³⁰ASerai ọ́mar nmụny.

³¹Kụ aTera ạsighe Ebram ọony phọ ọdi, rꞌọony oko phọ ọdi, Lọt, ọony ạHaran ọony phọ ọdi, rꞌaSerai ạnir Ebram ọony phọ ọdi, kụ ạpham bịdi ọḍuanam ẹpe ẹmha phọ Ur ẹpe eelhe phọ ạBabilon, agheel ẹpe eelhe aKenan, kụ bịdi ụkel li osi ẹpe Hạran kụ orugh sịphe.

³²ATera ạman ịyal okuron rꞌoogh ạsia, kụ agbi omugh ẹpe Hạran.