Read abua Emiighom 15 Bible Online

Emiighom 15 - abua bible

Emiighom 15

¹Ịphen phọ reten, kụ Ebram ạmiin uḍien kụ ạnaghan dị Ọmoogh-we phọ ạḅeni nyọdi mọ, “Ebram, kákiilaan. Mị kụ ọsuaram ikpo ạna. Aruunmo phọ mị kạngo bọ nyịna kẹbugh ni iboom.”

²Kụ ọlo Ebram ạḅem mọ, “Ogbogh Ọmoogh-we, eeghe ịyaar kụ ẹdi nạ kụngo bọ ịmi, ịduon phọ mị ụ́moogh bọ nmụny, omuton Eliezer ọony-otu phọ ạmi ọpo ạDamaskos phọ?

³Nạ ịmi nmụny ụ́ngo, kụ oniin ọnyo ẹbene phọ ạmi kụ kale erua ạmina.”

⁴Kụ ikpo ọnhu Ọmoogh-we phọ eru ẹteeny Ebram kụ ẹḅeni mọ, “Ọphon phọ kụ kále erua ạna; ọkaraghi ọony ạna kụ kale ni erua ạna.”

⁵Kụ Ọmoogh-we phọ ạpham nyọdi amitenom erugh kụ ạḅeni nyọdi mọ, “Pogh okuaḍio phọ. Bạl rạanaan phọ, mụghumo nạ katue ni, agbi amuneni. Ịdipho kụ ẹdi ẹemara ẹemara ạna koleeny.”

⁶Ebram ameeraam ni Ọmoogh-we phọ, kụ loor esi omeeraam mọ ọdi kụ Ọmoogh-we phọ ạsighenom nyọdi mọ ọdi oye aruukuan ni.

⁷Kụ Ọmoogh-we phọ ạḅile ạḅeni nyọdi, “Mị kụ Ọmoogh-we phọ ọpo ạsighe bọ nyịna ẹpe Ur ẹmha phọ ạBabilon amitiom ọngo ạna de phọ ạḍien mọ mọogh.”

⁸Kụ Ebram apuru mọ, “Ogbogh Ọmoogh-we, eeghe ịyaar eḍeenaan kụ ẹdi mị kạsighe bọ alegheriom mọ mị kụ kạmoogh de phọ ạḍien?”

⁹Ọmoogh-we phọ ạphagharanaan mọ, “Kịa ạsighe uruom ịmi ḍịya ạnam, ạtu-ọga, rꞌodughuna tọrotoro ọnyo ạbidi ạman ghan ịraar-rạar ạsia, ạḅaram ọkurughozo rꞌọgaami eekumude.”

¹⁰Kụ Ebram ạghi ạsighe oomo ạraraar phọ ịphen phọ ạsighe aruom Ẹnaan; kụ aalemi ghan ịnam mọ ạay ịyal yạl ipoḍi, kụ aseere ghan ịdi opoḍi asoman opoḍi ịyal ạsikool; ịnun phọ kụ ẹdi ọdi ụ́baay aani.

¹¹Ạredelhe esoorom ịnam mọ, kụ Ebram aphorogh.

¹²Mem dị erumuḍio remeel ighool, akugbogh ạralha ạphu Ebram. Ebram rạnaani kụ ọkikiph ufiri aḍiigu aḍigh aakpereghiom nyọdi.

¹³Kụ Ọmoogh-we phọ ạḅeni Ebram mọ, “Legheri ịphen phọ mọ ẹemara ẹemara ạna koḍighi ni ruuruen ẹpe ẹnon eelhe dị ítu ẹlo ạbidi. Bịdi koḍighi rẹbene ẹpe phọ kụ kọmiine ni bịdi iboom esi inya okuron ạsia.

¹⁴Kụ ọlo mị kạliom ni eelhe phọ ẹpe koḍighi bọ bịdi rẹbene phọ. Ḅịle kẹn mem dị bịdi kọḍua bọ eelhe phọ ẹpe phọ, bịdi kọḍuanam ni igbogh aruphua.

¹⁵Kụ ọlo nạ rꞌaloor kạkpo ni igeny kụ nạ amugh rꞌẹepho kụ oḍi nyịna.

¹⁶Keḍighi ni inya oghiil kụ ẹemara ẹemara phọ ạna oḅula sịen phọ, loor esi dị mị káporogh Ạmorait phọ, tụtu ọḅaar ẹmhu phọ ạbidi ạbugh asi esi dị kótue ọbile dị ụliom bịdi.”

¹⁷Mem dị ọmu maḍim kụ meghul, ekperenom bịn aguugh ạnian rꞌạmughi dị rạdumughu amite, rꞌobula-bula ọmure aamor ạdaph igbo aritigh ịnam mọ aten.

¹⁸Ḍio phọ ạḍiphe phọ Ọmoogh-we phọ aghiran ịyo rꞌEbram, kụ ạḅeni nyọdi mọ, “Mị aguanaan ọngo ẹemara ẹemara ạna de phọ ạḍien, emiigh ẹpe Ọphiiny aNail phọ kụ esiemi ẹpe oboom Ọphiiny phọ aYufratis

¹⁹ẹḅaram de aKenait, rꞌade aKenizait, rꞌade aKadmonait,

²⁰rꞌade ạHitait, rꞌade ạPerezait, rꞌade Refaim,

²¹rꞌade Ạmorait, rꞌade aKenanait, rꞌade aGirgasait, rꞌade aJebusait.”