Read abua Emiighom 16 Bible Online

Emiighom 16 - abua bible

Emiighom 16

¹ASerai ạnir phọ Ebram nmụny ọ́maranaan Ebram, kụ ọlo ọdi ạmoogh ni ọnyani-otu ọlo Ijipt dị oghol mọ aHegar. Kụ iḍighi kụ aSerai ạḅeni olhom mọ ọdi mọ, “Ọmoogh-we phọ musophoghom ịmi ọmaraghi ạnmuny, kụ seseeny, kịa ọnyani-otu phọ ạmi rꞌạna ẹrolan esi, ịduon sịen ọdi kụmaraghinaan ni ịmi nmụny.” Kụ Ebram ạnaghanan Serai ạnir phọ ọdi.

³(Mẹman ḍioph ạsia Ebram arugh bọ ẹpe ade phọ aKenan kụ aSerai ạḅogh bọ Hegar ọnyani-otu phọ ọdi ạngo olhom mọ ọdi.)

⁴Ebram rꞌaHegar ọrolan esi kụ ọnyani phọ asoph eghun. Mem dị aHegar aloghoma bọ mọ ọno raamor, bịn aphogh onhiin-otu phọ ọdi asooromi bịn ọ́man mun ịyaar esi ọdi.

⁵ASerai ạḅeni Ebram mọ, “Nạ kụ ụkom bọ ịiḅaghami phọ ạmi. Mị rꞌaloor kụ ụḅogh ọnyani-otu phọ ạmi ạngo nyịna mọ ịtolan esi, kụ emiigh kꞌamem mọ ọdi aloghoma bọ mọ ọno odi rꞌeghun, ọdi muphogh ịmi asooromi. Ọmoogh-we phọ kụ asoph ọoruen ạna rꞌạmi oye lọ odi riliom!”

⁶Kụ Ebram ạḅeni Serai mọ, “Pọrono ọnyani-otu ạna. Mị mạḅogh nyọdi ạngo nyịna. Ḍighi nyọdi ịlo ẹḅeeraan nyịna.” Kụ aSerai ạmiine Hegar, kụ ọnyani phọ aghiil asuma.

⁷Ọokpaany Ọmoogh-we phọ ạmiin Hegar ọgbal ọodu dị ạmuum odi ẹpe ẹdala phọ, ọodu phọ ọpo odi bọ ẹpe eten phọ rẹki bọ ẹpe Sur.

⁸Kụ ọdi apuru mọ, “Hegar ọnyani-otu phọ aSerai, nạ ụḍua ẹghen kụ aru bọ? Kụ nạ rạki ẹghen?” Kụ ọdi ạphagharanaan mọ, “Mị akiilaan Serai onhiin-otu phọ ạmi kụ mị rasuma.”

⁹Ọokpaany Ọmoogh-we phọ ạḅeni nyọdi mọ, “Ḅula agheel kꞌonhiin-otu phọ ạna, asooromi loor ạna esi ọdi.”

¹⁰Kụ ạḅaram mọ, “Mị kạbughe ni ẹemara ẹemara phọ ạna. Nạ kạmaraghi ni amuzeḍi ḍita dị kótue ọbal omuneni.”

¹¹Kụ ọokpaany Ọmoogh-we phọ ạḅile kẹn ạḅeni nyọdi mọ, “Nạ kạmar olephiri ọony. Kol nyọdi mọ Ịsmael ịdi eḍighi bọ Ọmoogh-we phọ mạmiin ni ịminimiin phọ ạna.

¹²Kụ ọlo ọony phọ ạna kaḍighi oye dị úsereghian, ạkigh ịdipho ẹnam adool. Ọlo ọdi ạmiin bịn ọdi kazuom ghan elephiri; ọlo ạmiin nyọdi bịn kazuom ni nyọdi elephiri. Ọdi kátughogh ghan atuman bumor ọdi.”

¹³Kụ aHegar apuruan mọ, “Ọkaraghi agey ni, mịna phọ kụ ụmiin Ẹnaan kụ odi ghan bịn úmugh?” Kụ iḍighi kụ ọdi ạta Ọmoogh-we phọ ạḅaanaan bọ nyọdi mọ “Ẹnaan dị rẹmiin ghan eten.”

¹⁴Kụ ọtuan ịduon phọ oghol ghuḍia phọ ọpo odi bọ igbo aKades rꞌaBered kꞌarodon mọ “Aghuḍia ọpo odi ghan bọ kụ rụmiin ghan bọ ịmi.”

¹⁵AHegar ạmaranaan Ebram olephiri ọony kụ Ebram aghol ḍien ọony phọ mọ Ịsmael.

¹⁶Ebram ạman bọ ọphaanyadi rꞌodiiny ạsia mem mọ ọmar bọ Ịsmael.