Read abua Emiighom 17 Bible Online

Emiighom 17 - abua bible

Emiighom 17

¹Mem dị Ebram mạman esughadi rꞌesugha ạsia, kụ Ọmoogh-we phọ amite egaan esi ọdi kụ ạḅeni mọ, “Mị kụ Ẹnaan Oomo Ịikpo phọ. Ụnaghanan ịmi aḍighi oye dị ịḍagha ílho.

²Mị kakiran ịyo rꞌạna kụ mị ạngo nyịna ọoloogh ẹemara ẹemara.”

³Ebram azumeri ẹmhu ọdi tụtu aghisigh ọdi ạḅogh ude, kụ Ẹnaan ẹḅem mọ

⁴“Mị rakiran ịyo phọ ịphen rꞌạna: Mị aguanaan mọ nạ kaḍighi ni ọde ịminighan areelhe.

⁵Ḍien ạna kókol ghan mun mọ Ebram, kokol mọ Ebraham, ịdi eḍighi bọ mị raḍighi nyịna ọde ịminighan areelhe.

⁶Mị kạbughe ni ẹemara ẹemara phọ ạna. Areelhe kẹḍua esi ạna kụ emite; ạbudaam kọḍua ọkuruḅaka ạna kụ omite.

⁷“Mị kạkparami ni ịyo phọ ạmi rꞌạna, rꞌẹemara ẹemara phọ ạna, rꞌarighiil ạna ghisigh. Ịyo phọ ạmi kẹtol li kꞌagee-pọ. Mị kaḍighi Ẹnaan ạna rꞌẸnaan ẹemara ẹemara phọ ạna.

⁸Mị kạngo nyịna rꞌẹemara ẹemara phọ ạna de phọ ạḍien nạ aḍighi bọ ooruen nyịidipho; oomo ade phọ aKenan keḍighi ḍịo ana kꞌagee-pọ kụ mị aḍighi Ẹnaan ạbidi.”

⁹Ẹnaan ẹḅeni Ebraham mọ, “Tụugh ịduon aako ịyo phọ ạmi, nạ rꞌẹemara ẹemara ạna rꞌarighiil ạna ghisigh.

¹⁰Ịphen kụ ịyo phọ ạmi nạ kaako ghan bọ; ịyo phọ ạmi rꞌạna rꞌẹemara ẹemara ạna ghisigh: tọrobo olephiri ọony lọ nyina ẹmar iḍun ghan.

¹¹Ḍun ghan oodu phọ ạsighe loor iphulupul phọ. Ẹphen phọ kụ keḍighi ghan eḍeenaan ịyo phọ mị rꞌạna oghiran bọ.

¹²Tọrobo olephiri ọony lọ nạ ạmar kụ rẹman ọphaanya aḍughul-otu bịn aḍun ghan; tọrobo olephiri ọony sịphe oomo arighiil phọ ạna, mọ ọlo ọmar kꞌạna, mọ ẹbene lọ oghoom ikpoki lọ útu ọto ọophi ạna.

¹³Mọ ọlo ọmar sịphe kꞌạna, mọ ọlo oghoom ikpoki, pọ iḍun ghan ni. Ịduon kụ ịdi ịyo phọ ạmi kẹtol loor ạna kꞌagee-pọ.

¹⁴Tọrobo olephiri ọony lọ úḍuna, dị údun oodu phọ ọdi ụ́sighe, pọ awe phọ omutonaan nyọdi, pọ ọdi mạapu ịyo phọ ạmi.”

¹⁵Ẹnaan ẹḅeni Ebraham mọ, “Kákol ghan mun ḍien ạnir phọ ạna mọ aSerai. Emiigh nyịidipho kụ ẹghi, aSera kụ aḍien ọdi.

¹⁶Mị kạseph ni nyọdi kụ ọdi kạmaranaan ni nyịna olephiri ọony. Mị kạseph ni nyọdi ọdi aḍighi onhiin areelhe, ạraalha kọḍua ẹemara ẹemara ọdi kụ omite.”

¹⁷Ebraham azumeri ẹmhu ọdi tụtu aghisigh ọdi ạḅogh ude kụ ạmilogh kụ apuruan loor ọdi mọ, “Okumor oye oniin okuron ạsia phọ kụ kạmar mọony? Okumor ạnir esughadi ạsia kụ kạmar mọony?”

¹⁸Kụ Ebraham apuru Ẹnaan mọ, “Nạ ọwile ghan Ịsmael alhe erua phọ ạmi?”

¹⁹Ẹnaan ẹḅeni Ebraham mọ, “Ịdipho kéḍighi. ASera ạnir phọ ạna kạmaranaan ni nyịna mọony. Nạ kakol ḍien ọdi mọ Ạizik. Mị kạpamanam ni ịyo phọ ạmi esi ọdi, ịyo dị kẹtol kꞌagee-pọ ẹgbaam ẹemara ẹemara ọdi.

²⁰Mị mạnaghan ni ịlom mọ ạna ịlo Ịsmael. Mị mạseph ni nyọdi asu nyọdi ọghor ẹmaria mọ ọdi ạmar amuzeḍi. Ọdi kạmar bọ ḍioph rꞌịyal ạnmuny dị koḍighi bụo ịtooghi. Bụo ẹemara phọ ọdi kọda ghan eboom eelhe.

²¹Kụ ọlo mị kạpamanam ịyo phọ ạmi rꞌẠizik ọony phọ aSera kạmaranaan bọ nyịna ọdo phọ oogho phọ ọphon nana.”

²²Rọghaaph bọ ọghaaph phọ rọmadan kụ Ẹnaan ẹwile Ebraham ẹḍua.

²³Eniin phọ aḍio phọ, Ebraham ạnaghanan ni Ẹnaan kụ ạsighe Ịsmael ọony phọ ọdi rꞌoomo ạnmuny phọ ọmar bọ sịphe kꞌọdi, ọḅaram oomo ạbuphe ọdi aghoom bọ ikpoki rꞌoomo alephiri ạnmuny phọ ọrol bọ sịphe kꞌọdi kụ aḍunogh bịdi.

²⁴Ebraham ạman bọ esughadi rꞌesugha ạsia mem mọ oḍun bọ nyọdi.

²⁵Ịsmael ọony phọ ọdi ạman bọ ḍioph rꞌịraar ạsia mem mọ oḍun bọ nyọdi.

²⁶Egina phọ aḍio phọ kụ ẹdi oḍunogh bọ Ebraham rꞌỊsmael ọony phọ ọdi.

²⁷Ụḅaram bịdi oḍunogh oomo alephiri ạnmuny phọ ọrologhu bọ kꞌọdi.