Read abua Emiighom 2 Bible Online

Emiighom 2 - abua bible

Emiighom 2

¹1 Ịduon kụ ẹdi ọlhem aḅirini phọ aru amuneen. Ịduon kụ ẹdi ọlhem aḅirini phọ aru amuneen.

²Omuneniom oḍual aḍio phọ kụ ẹdi Ẹnaan ekureri iiḍighi phọ ọdi.

³Ẹnaan ịseph ni ḍio phọ ạḍiphe kụ ẹsaḅar eseere mọ aḍio iigbia, ịdi eḍighi bọ aḍio phọ ạḍiphe kụ ẹdi odi akureri bọ ọlhem mọ.

⁴Kụ ịpe kụ ịdi ọlhem bọ aḅirini phọ. Mem mọ Ọmoogh-we Ẹnaan phọ ạlhem bọ aḅirini phọ,

⁵ịizupha ị́tol de phọ, kụ ikpo iimuma ísi ịdi eḍighi bọ Ọmoogh-we Ẹnaan phọ kőruom ọlophia, oye ọ́rol dị kaḅeph ozo.

⁶Kụ ọlo ạmuum ạḍua ghan ni ọlha-ude ạḅore ghan oomo ade phọ.

⁷Kụ Ọmoogh-we Ẹnaan phọ ạsighe ọposo sịphe ade phọ ạlhemom oye, kụ aphooghu ḍiphooghu aghuḍum ạlhogh ropogh izon ọdi; kụ oye phọ amiigh ọmoogh aghuḍum.

⁸Kụ Ọmoogh-we Ẹnaan phọ amitiom oghoony ẹpe Iden ẹpe erumuḍio phọ remite ghan bọ, kụ aseere sịphe oye phọ ọpo ọdi mạlhem bọ.

⁹Ọdi aḍighi ni ịdi ịdo kịrokiro ịma ireeny kesi sịphe phọ kụ emuum ịma iimuma. Sịphe ogbo oghoony phọ oreeny ạrol li dị aḍighi oreeny ọngo aghuḍum, rꞌọnon oreeny ọlo olegheri igey rꞌịkaraph.

¹⁰Okol ạmuum akiil ghan ni sịphe Iden dị aleenye mụum sịphe oghoony phọ; otenom Iden okol phọ adia aḍighi inya ạriphiiny.

¹¹Kụ ḍien ọḅel ọphiiny phọ ughol mọ aPison; ọphiiny phọ ọphon rakil ghan kaaghironom eelhe phọ aHavila.

¹²(Ẹpe phọ ogey agol rꞌelho eeḅi eḍu rꞌịbekulari kụ edi ghan.)

¹³Ḍien ọphiiny phọ amuneniom bọ ịyal phọ ughol mọ aGihon. Ọphiiny phọ ọphon rakil ghan kaaghironom eelhe phọ aKus.

¹⁴Ḍien ọphiiny phọ amuneniom bọ ịraar phọ ughol mọ ạTaigris. Ọphiiny phọ ọphon rakil ghan kasi eelhe Asiria ạga emitenom erumuḍio phọ; kụ ọphiiny phọ amuneniom bọ inya phọ ughol mọ aYufratis.

¹⁵Kụ Ọmoogh-we Ẹnaan phọ aseere oye phọ sịphe oghoony phọ Iden, mọ aphogh ghan aselemi.

¹⁶Kụ ạḅeni nyọdi mọ, “Le ghan tọrobo eemuma ạtorotoro oreeny sịen oghoony phọ,

¹⁷epel oreeny olegheri igey rꞌịkaraph phọ. Kále eemuma oreeny phọ ọpo; eḍighi ịyaar dị nạ alhe, nạ ramugh ni mem mem mọ.”

¹⁸Kụ Ọmoogh-we Ẹnaan phọ ạḅem mọ, “Ị́nighe dị oye phọ kạtol dọl igini. Mị kạlem ọḅarama dị kạloghonaan ghan nyọdi ḍịghaagh.”

¹⁹Kụ Ẹnaan ẹsighe ọposo sịphe ade phọ ẹlemom oomo ịnam eḍum rꞌịnun okuaḍio phọ, kụ ẹsighe eruom oye phọ mọ ọdi aaghologh siḍien; kụ ịpe kụ ịdi bịdi ọmoogh bọ siḍien phọ ạbidi.

²⁰Kụ oye phọ aaghologh siḍien oomo ịnun phọ rꞌịnam mọ, kụ rꞌoniin ọnyo ạbidi ọ́rol dị ạkpe oḍighi ọḅarama oye phọ.

²¹Kụ Ọmoogh-we Ẹnaan phọ aḍighi ịdi oye phọ ameel tugbogh ạralha kụ sịphe ọdi rạnaani bọ, kụ Ọmoogh-we Ẹnaan phọ ạsighe oniin ọkala oku oye phọ kụ ạḅile aḍueghiom esi phọ ḍizu.

²²Ọkala oku phọ ọpo Ọmoogh-we Ẹnaan phọ ạsighe bọ loor oye phọ kụ edi ọdi ạlhemom ạnir-ephoph, kụ ạḅogh nyọdi ạngo oye phọ.

²³Kụ oye phọ ạḅem mọ, “Mị mamuzaan! Ọphon ọdo ạmi — ọḅarara dị ọsighe esi ọḅarara ạmi, rꞌiphulupul dị ọsighe esi iphulupul ạmi. Kokol nyọdi mọ ạnir-ephoph, ịdi eḍighi bọ ụsighe nyọdi loor olephiri ọony.”

²⁴Ịduon kụ iḍighi bọ kụ oye rạbile ghan bọ ọde rꞌonhiin ọdi kạḅophoghan rꞌạnir ọdi; bịn bịdi oḍighi iniin iphulupul.

²⁵Oye phọ rꞌạnir phọ ọdi ụrologhu ẹdaḅa; kụ ọlo bịdi úkiil umugholoor.