Read abua Emiighom 20 Bible Online

Emiighom 20 - abua bible

Emiighom 20

¹Ebraham ạḍua ni sịphe arelhe ạghi asi ẹpe eelhe phọ aNegeb, kụ arugh ogbo aKades rꞌaSur. Mem dị ọdi ạrol iiruen ẹpe Gerar,

²kụ ạḅem mọ aSera ạnir phọ ọno mọ umarani ọno. Ạbimelek ọdaam mọ aGerar arom kụ ọsighe Sera ọghiom nyọdi.

³Ḍiniin aḍughul kụ Ẹnaan egananami loor esi Ạbimelek ụmalha kụ ẹḅem mọ, “Nạ kamugh ni, loor ạnir phọ ọphon nạ ạsighe bọ. Ọdi ạbal li ilom.”

⁴Ạbimelek rꞌaSera kọ̋rolan esi, kụ ọdi ạḅem mọ, “Ọmoogh-we, mị úḍighi ịyaar! Nạ kapiemi we phọ ạmi rꞌạmi?

⁵Ebraham kụ ịmina ụ́ḅeni bọ mọ ạnir phọ ọphon mọ umarani ọno? Ạnir phọ rꞌaloor ọdi kẹn ụḅeni ịmi mọ oye phọ mọ umor ọno. Ologhi ạmi aseleman ni; ạraghaagh ạmi ẹḅaal li esi ịphen.”

⁶Ẹnaan ẹphagharanaan ụmalha phọ mọ, “Ii, mị alegheri ni mọ nạ ụsighe ni ogeny ologhi kụ aḍighinom. Ịpe kụ ịdi mị úmeera bọ mọ nạ aḍighi ịkaraph ghisigh ạmi. Pọ kụ ịyaar phọ mị úmeera bọ mọ nạ ạḅogh nyọdi.

⁷Nyịidipho ḅulemi ạnir ạngo olhom ọdi. Oye phọ oyil ịmiin ni kụ kạaḅereghi ni ạngo nyịna bịn nạ kámugh. Kụ ọlo eru mạar dị ạnir phọ ọphon nạ úḅulemi, pọ legheri mọ nạ rꞌoomo ọto kꞌạna komuughu ni.”

⁸Ạbimelek aḅetenu esoph ạḍiroor kụ ạmagh oomo kꞌọdi aakpomoghi, kụ ạghaaph oomo ịphen phọ emiteghu bọ, kụ eḍigh ruugu esi ạbidi.

⁹Kụ Ạbimelek ạmagh Ebraham kụ apuru mọ, “Ịphen phọ nạ muḍighi bọ iyoor ịghen? Mịna ụpiom nyịna eeghe kụ nạ ruruom bọ ịmi rꞌọto kꞌạmi muphe dị aleeny ịduon? Nạ muḍighi ịmi ịdi ị́kpianaan oye oḍighi.

¹⁰Uḍighi ika kụ nạ aḍighi bọ ịphen phọ?”

¹¹Kụ Ebraham ạphagharanaan mọ, “Mị ạtu bọ kụ aḍighi ịphen phọ: mị ugbiom mọ awe ekpisi phọ ẹphen Ẹnaan rókiilaan ghan, kụ ịduon sịen kughiigh ịmi kụ ọsighe ạnir phọ ạmi.

¹²Ọkar igey ni, ọdi phọ umarani ạmi. Ọdi ọony ọde ạmi kọ́ony onhiin ạmi, kụ mị aphin bọ.

¹³Mem mọ Ẹnaan eḍighi bọ ịdi mị ạḍua sịphe amarugh ọde phọ ạmi kụ rakiraan, kụ mị ạḅeni nyọdi mọ, ‘Ịphen phọ bịn kụ iiḅi dị nạ kuḍighi ịmi: tọrobo ekpisi lọ yira ọghi osi kụ opuru nyịna, ḅẹni ghan mọ mị umor ạna.’”

¹⁴Kụ Ạbimelek aḅulemi Sera ạngo Ebraham kụ mem mem mọ ạḅaram iyool-ịga rꞌạsinam rꞌạrebene, alephiri rꞌạnmariir.

¹⁵Ạbimelek ạḅeni Ebraham mọ, “Pọrono oomo ade phọ ạmi. Pin esi lọ ẹḅeeraan nyịna arugh.”

¹⁶Kụ ạḅeni Sera mọ, “Mị rạngo umor ạna oniin ọonir ipoḍi asilva esi oḍeenaan oomo phọ ạbuen odi bọ sịen, mọ nạ ọ́pioman, mọ ạraghaagh ạna ẹḅaal esi ịphen phọ.”

¹⁷Loor ịpe emitenaan bọ Sera ạnir phọ Ebraham, Ọmoogh-we phọ aghughiom ni ọophi ẹmaria oomo ạnmariir phọ ọrol bọ kꞌẠbimelek. Kụ iḍighi kụ Ebraham ạaḅereghinaan Ạbimelek kụ Ẹnaan eekonom nyọdi rꞌạnir phọ ọdi rꞌạrebene ạnmariir phọ ọbo bịdi orue ọmaraghi nmụny.