Read abua Emiighom 23 Bible Online

Emiighom 23 - abua bible

Emiighom 23

¹ASera ạman ni oniin okuron ịyaldi rꞌoḍual ạsia ḍịkpo: ịphen kụ ạsia dị aSera ạrol sịen aḅirini phọ.

²ASera amugh sịphe Kịriat Arba (egina ẹmha phọ oghol bọ mọ ạHebron) ẹpe eelhe phọ aKenan. Kụ Ebraham ạghi akughuḍi amoghi nyọdi.

³Kụ Ebraham aḅetenu sịphe ọmuneen bọ oḍim ạnir phọ ọdi, kụ ạtuonom bụo ạHitait phọ kụ ạḅeni mọ,

⁴“Mị ooruen dị atugh ni sịen rꞌanyina, ịma esi iḍeenaan ịmi, mị ụsighe nyọon umughanaan bọ ịmi ụki uḍi.”

⁵Kụ bụo ạHitait phọ ọphagharanaan Ebraham kụ ọḅeni nyọdi mọ,

⁶“Ụnaghanan iyoor. Nạ ogbogh oye dị ụmoogh iyoor. Sịghe oḍim mọ ạna ạghi ẹpe ẹkaraph eḍum mọ aphogh esi lọ ẹḅeeraan nyịna aḍi. Ọnyo ayoor dị kamirighan nyịna ólho.”

⁷Ebraham aḅetenu kụ ạseph we ạHitait phọ ọmoogh bọ de phọ.

⁸Kụ ọdi ạghaaphan rꞌạbidi kụ ạḅem mọ, “Eru mạar dị ịḅeeraan ni inyina mọ mị uḍi ni oḍim mọ umughanaan bọ ịmi sịen, iseseeny ịlom Efron ọony phọ aZohar,

⁹ịlo aalha ạmi epogh loor asighiigh phọ aMakepela edi bọ ẹpe eekuna aleeny phọ ọdi. Ọdi ạḅem sịen risigh anyina ọkar aḍighi esi phọ pịdi mị ạmoogh aḍighi ẹkaraph eḍum.”

¹⁰Efron rꞌaloor ạrol aani ni rꞌạbueri ạHitait phọ pạ esi aruupuruan phọ sịphe eḍighom ẹmha phọ kụ ạphagharanaan ịdi tọro lọ ạrol pạ ạnaghan ni mọ,

¹¹“Nạghan, oye dị ụmoogh ịmi, mị kạngo ni nyịna oomo aleeny phọ ạmi rꞌepogh loor asighiigh phọ. Sịen ghisigh awe ạbuo ade phọ ạmi, mị kạngo ni nyịna esi phọ, pịdi nạ aḍi ạnir ạna.”

¹²Ebraham azumeri ẹmhu ọdi ạseph bụo ade phọ.

¹³Kụ ọdi ạḅeni Efron, kụ ạghaaph adoghoḍi rụru oomo awe ạbuo ade phọ mọ, “Eru mạar dị ẹḅeeraan ni nyịna, pọ nạghan ịphen mị kạḅem bọ, mị ạngo nyịna ịlo ade phọ ẹman, ạar ịmi ẹrol dị mị ạsighe oḍim mọ ạmi aḍi sịphe.”

¹⁴Efron ạphagharanaan Ebraham kụ ạḅeni nyọdi mọ,

¹⁵“Oye dị ụmoogh ịmi. Ụnaghanan ịmi. Ade phọ ẹman inya okuron ipoḍi asilva bịn; kụ ịphen phọ ẹman eeghe ịyaar esi ạna rꞌạmi? Kịa aḍi oḍim mọ ạna sịphe phọ.”

¹⁶Kụ Ebraham ameeraam Efron kụ ạto amitiom ẹemor ịpe Efron amuul bọ mọ ẹman sịphe ogbo ạHitait phọ: inya okuron ipoḍi asilva, ọdaph ẹemor phọ ẹpe emeera bọ esi abumuul ḍighi.

¹⁷Ịpe kụ ịdi ọoghana phọ aḍighi ghan bọ ẹlo Efron pạ Makepela koten bọ kụ ọteeny Mamre ẹpe erumuḍio phọ remite ghan bọ, aḍighi bọ ẹlo Ebraham. Aleeny phọ rꞌepogh loor asighiigh phọ rꞌoomo ireeny phọ edi bọ sịphe aleeny phọ ụḅogh bịn ọngo Ebraham.

¹⁸Oomo ạbuo ạHitait phọ ọrol bọ pạ aruupuruan phọ sịphe eḍighom ẹmha phọ ụlogh ni elegh mọ esi phọ meḍighi ẹlo Ebraham.

¹⁹Ịphen phọ reten, kụ Ebraham ạsighe Sera ạnir phọ ọdi aḍi sịphe epogh loor asighiigh phọ ẹpe aleeny phọ aMakepela, koten bọ kụ ọteeny Mamre eelhe phọ aKenan.

²⁰Ịduon kụ iḍighi kụ ọoghana phọ aḍighi bọ ẹlo ạbuo ạHitait phọ rꞌepogh asighiigh phọ, eḍighi ephua Ebraham ịlo oḍiighi ghan awe.