Read abua Emiighom 25 Bible Online

Emiighom 25 - abua bible

Emiighom 25

¹Ebraham ạḅile aphin ọnon ạnir dị oghol mọ aKetura,

²kụ ạmaranaan nyọdi Zimran, Joksan, Medan, Mịdian, Isbak rꞌaSua.

³AJoksan ạmar Siba rꞌaDedan, kụ ạnmuny aDedan ạbuen: Ashurim, Letusim rꞌaLeumim.

⁴Ạnmuny ạMidian ạbuen: Efa, Efer, Hanok, Abida rꞌEldaa. Oomo phọ ạbuen phọ ạnmuny aKetura.

⁵Ebraham ạwilenaan ni oomo aruphua phọ dị ạmoogh bọ Ạizik.

⁶Kụ ọlo nmụny ạnmariir phọ Ebraham ạgaany bọ, ọdi ạsighe rạraar bịn ạngaani kụ, mem mọ ọdi odi bọ ni, aphoroghom bịdi sịphe otu phọ Ạizik ọony phọ ọdi, kụ bịdi ọghi rạmha ẹpe erumuḍio phọ remite ghan bọ kụ orughogh.

⁷Ebraham amugh mem dị mạkar ri ạkpo ạman oniin okuron oḍualdi rꞌoogh ạsia. Kụ ọto ạbidi ookpomoghan oḍi nyọdi.

⁹Ạizik rꞌỊsmael ạnmuny phọ ọdi ọsighe nyọdi ọghi oḍi ẹpe epogh asighiigh phọ ẹpe Makepela sịphe aleeny phọ Efron ọony phọ aZohar ọlo ạHitait phọ, koten bọ kụ ọteeny Mamre.

¹⁰Leeny phọ, ḍịphe Ebraham agho bọ ḍịghaagh ạHitait phọ, ịsiphe kụ ẹdi oḍi bọ Ebraham rꞌaSera ạnir phọ ọdi.

¹¹Reten ḍuugh phọ Ebraham kụ Ẹnaan ẹseph Ạizik ọony phọ ọdi, ọpo arugh bọ atuman “Ghuḍia ọpo odi ghan bọ kụ rụmiin ghan bọ ịmi”.

¹²Ịsmael, ọpo aHegar ọlo Ijipt phọ ọnyani-otu phọ aSera ạmaranaan bọ Ebraham,

¹³ạmoogh nmụny phọ ạbuen kọgo bọ sịen, ọony aruom mọony: Nebayot, Kedar, Ạdbeel, Mibsam,

¹⁴Misma, Duma, Mạsa,

¹⁵Hadad, Tẹma, Jetur, Nafis rꞌaKedema.

¹⁶Bụen phọ kụ abugbogh ạburude aḍioph rꞌịyal arughunughun phọ. Asiḍien ạbidi kụ ịdi ọsighe kụ ooghologhom iipolo phọ ạbidi rꞌạramha phọ ạbidi.

¹⁷Ạḍikpo Ịsmael sịen aḅirini phọ ẹman oniin okuron ịraardi rꞌoḍual ạsia. Kụ ọto ạbidi ookpomoghan oḍi nyọdi.

¹⁸Bịdi ụ́ḅar rꞌạbueri phọ ạnmuny phọ Ịsmael kụ orughan, ụghi ghụn de ịsiphe ịbaay aHavila rꞌaSur, koten kụ ọteeny Ijipt, ẹpe ḍịghaagh ẹlo Asiria, kụ orugh.

¹⁹Bụen kụ oghiil ạnmuny Ạizik, ọony phọ Ebraham. Ebraham kụ ọde Ạizik.

²⁰Ạizik ạman inyadi ạsia mem mọ ọdi aphin bọ Rịbeka ọnyani ạBetuel ọlo ạSiria ẹpe Mesopotamia, umarani ạLeban.

²¹Ạizik aghol ẹmhu ạnir phọ ọdi kụ ạaḅereghi Ọmoogh-we phọ, loor esi dị ạnir phọ ọdi ẹ́mar, kụ Ọmoogh-we phọ ạnaghanan ịiḅereghi phọ ọdi, kụ ạRibeka aamor.

²²Ạnmuny phọ ọrol sịphe ọkuruḅaka phọ kụ ronyuughian, kụ ọdi ạḅem mọ, “Iḍighi ika kụ ịyaar dị ẹrol ịduon kimitenaan bọ ịmi?” Kụ ọdi ạghi apuru Ọmoogh-we phọ.

²³Kụ Ọmoogh-we phọ ạḅeni nyọdi mọ, “Ịyal areelhe kụ edi bọ sịphe ọkuruḅaka phọ ạna. Ịyal phọ areelhe phọ nạ kạmar bọ kodia ni, oniin kụ kạmoogh ịikpo apu nyoniin, okumoor phọ kakumunaan ghan ọbam mọ.”

²⁴Kụ ariiḍio ẹmaria phọ ọdi remunughan, kụ ạmar ịyal alephiri ạnmuny.

²⁵Ọḅel ọony phọ aru amite kụ rạtogh, oomo phọ ọdi ạburu ạburu. Pọ kụ ẹdi oghol bọ nyọdi mọ Ịso.

²⁶Kụ umor phọ ọdi aru amite, ạpam eeghim Ịso; pọ kụ ẹdi oghol bọ nyọdi mọ ạJekob. Ạizik mạman odiinydi ạsia kụ ạmar nmụny.

²⁷Mem dị ạnmuny phọ ophoph ọmanam oḍighi we, Ịso ạmaar ịtaya, oye dị ạphomoghian rukumuan ologhi eḍum, kụ ọlo ạJekob onakara oye dị ạrol ghan ologhi otu bịn.

²⁸Ạizik ạphomoghian Ịso, ịdi eḍighi bọ ọpo kụ rạngo ghan nyọdi ịnam ạa; ạRibeka ạkaraghi ạsighe Jẹkob.

²⁹Eniin aḍio mem dị ạJekob ragir mooboph ọḍu, Ịso mạḍua ịtaya phọ atigheel aḍigh otu. Ọkoony rasiph nyọdi,

³⁰kụ ạḅeni Jẹkob mọ, “Ọkoony rughiigh ịmi. Ụngaani ẹnum ạmutogh-tọgh amooboph ọḍu phọ ạna mị ule.” (Ụtuan ịduon kụ oghol bọ ḍien phọ ọdi mọ Idom.)

³¹ẠJekob ạḅeni Ịso mọ, “Mị kạngo ni nyịna eru mạar dị nạ aalha ịmi ịkpana phọ ạna rodon.”

³²Ịso ạḅeni Jẹkob mọ, “Ẹnighe ni-a. Mị ramugh ni ịduon phọ; eeghe ạsuo kụ ẹdi ịkpana phọ kịngo ịmi nụun?”

³³ẠJekob ạḅeni Ịso mọ, “Kunya ụngo ịmi rodon,” kụ Ịso aghunya aalha ịkpana phọ Jẹkob.

³⁴Kụ ạJekob ạsighe ạbred akor mooboph phọ dị ạsa bọ ạngo Ịso, kụ ọdi alhe ạphughol mụum kụ aḅetenu ạḍua. Ịso ọ́maghami ịyaar ịkpana phọ ọdi.