Read abua Emiighom 28 Bible Online

Emiighom 28 - abua bible

Emiighom 28

¹Ạizik ạmagh Jẹkob kụ ạseph, kụ ạphur nyọdi rụru kụ ạḅeni mọ, “Úpin ghan ọnyani ọlo aKenan.

²Kịa ghụn ẹpe Mesopotamia kꞌạBetuel ọde onhiin phọ ạna kụ aphin ọnyani ạLeban umor onhiin phọ ạna.

³Ẹnaan Oomo Ịikpo phọ ẹseph nyịna, esu nyịna ọghor ẹmaria, ạmar amuzeḍi ạmoogh ḍita awe.

⁴Ẹnaan ẹngo nyịna ḍịseph phọ Ebraham, nạ rꞌọto ạna, ọbo nyina ẹmoogh de phọ ạḍien nạ odi bọ iiruen phọ; ḍịen Ẹnaan ẹngo bọ Ebraham.”

⁵Ạizik ạghiom Jẹkob ạkele kꞌẹpe Mesopotamia ạteeny Lẹban ọpo aḍighi bọ mọony ạBetuel ọlo ạSiria phọ kụ aru bọ umor ạRibeka onhiin phọ ạJekob rꞌỊso.

⁶Ịso ạnaghan mọ Ạizik mạseph Jẹkob, ạḅile ạḅem mọ ọdi ạkel ạghi Mesopotamia lọ kapin ạnir ẹpe. Ọdi ạnaghan kẹn mọ, mem mọ Ạizik ạseph bọ nyọdi, ạkpaariom ni nyọdi mọ kúpin ọnyani ọlo aKenan.

⁷Ọdi ạmiin ni mọ ạJekob ạnaghanan ni ọnhu ọde phọ ọdi rꞌonhiin phọ ọdi, kụ maten ạki Mesopotamia.

⁸Pọ kụ ẹdi Ịso alegheri mọ ạnmanyaan aKenan ụ́ḅeeraan Ạizik ọde phọ ọdi.

⁹Sịphe kụ ẹdi ọdi ạghi ạteeny Ịsmael ọony phọ Ebraham, kụ aphin aani Mahalat ọnyani ọdi, ọpo aḍighi bọ umarani phọ aNebayot.

¹⁰ẠJekob ạḍua ẹpe Beersheba kụ amiigh onyeene ạHaran.

¹¹Mem dị erumuḍio memeel ighool, ọdi masi eniin esi kụ ạrol sịphe dị meghul. Ọdi ạsighe ḍighiigh dị edi sịphe phọ aḅetenom ẹmhu ọdi rạnaani.

¹²Ọdi ạmalha kụ ạmiin ọgbada dị ạḍua ude kụ akhara kꞌạke, rꞌạruukpaany Ẹnaan dị rọsinyighu ḅịle rosoroghu ghan pạ ọgbada phọ.

¹³Kụ pạ phọ Ọmoogh-we phọ ạmeera ni ọogaany ạmi kụ ạḅem mọ, “Mị Ọmoogh-we phọ ni, Ẹnaan phọ Ebraham rꞌẠizik. De phọ ạḍien nạ ạmina bọ mị mạngo nyịna rꞌạnmuny ạna.

¹⁴Ạnmuny ạna koḍiza ịdipho ịisaar ade phọ, kụ nạ ạtara asi ẹpe erumuḍio phọ remite ghan bọ, rꞌẹpe remeel ghan bọ, ạtara ạki ephunom ạtara ạki esoorom; kọtuan nyịna kụ ọseph oomo arughunughun sịen aḅirini phọ.

¹⁵Kịom ologhi, mị odianaan ni rꞌạna. Mị kaako ni nyịna asiemi tọrobo ekpisi lọ nạ rạki, kụ mị kạḅile ni ạsighe nyịna aḅulemi sịen ade phọ ạḍien. Mị kạ́wile nyịna tụtu mị maḍighi oomo phọ ịphen mị aguanaan bọ nyịna.”

¹⁶ẠJekob ạsuma rạlha phọ kụ ạḅem mọ, “Ageny ni, Ọmoogh-we phọ odi ni sịen kụ mị úlegheri.”

¹⁷Aruugu rasiph nyọdi, kụ ọdi ạḅem mọ, “Esi phọ ịsien phọ eḍigh ịikia ruugu; esi phọ ẹphen kẹ́non esi, ịsien phọ otu Ẹnaan, ịsien phọ ọnhu-aḍibuo kꞌạke.”

¹⁸ẠJekob ạsuma eḅon ạḍiroor, kụ ạsighe ḍighiigh phọ ọdi aḅetenom bọ ẹmhu phọ ạmeremi, aḍighi ẹko ịlo ọotughianam ghan, kụ ạsighe mụnum ạsagharan ẹpe ạnyu phọ.

¹⁹Kụ ọdi aghol esi phọ mọ ạBetel abo; ḍịḅel aḍien esi phọ ịsien phọ ughol ghan mọ aLuz.

²⁰ẠJekob aghunyian kụ ạḅem mọ, “Eru mạar dị Ẹnaan ịrolonaan ni ịmi, kụ uuko ịmi erelhe phọ mị rạki bọ, kụ ụngo ịmi eḍien olhe rꞌarukpe omuuna,

²¹eru mạar dị mị kạḅile ni aḅula kꞌọde phọ ạmi rꞌedughom, pọ Ọmoogh-we phọ kaḍighi ni Ẹnaan ạmi.

²²Pọ aḍighiigh ọotughianam mọ ạḍien mị ạmeremi bọ ịdipho ẹko, keḍighi otu Ẹnaan, kụ oomo ạraraar phọ ịpe nạ kụngo bọ ịmi, mị kadi ghan ḍioph abin ạngo nyịna bin.”