Read abua Emiighom 29 Bible Online

Emiighom 29 - abua bible

Emiighom 29

¹ẠJekob aḅetenu erelhe phọ dị rạki bọ ẹpe erumuḍio phọ remite ghan bọ.

²Ekperenom bịn ạteeny ghuḍia sịphe ạraaghana phọ, rꞌịraar aḍita iyool-ịga dị ẹmina ekitonom. Rọkpa ghan mụum sịphe aghuḍia phọ kụ ọngo ịga phọ. Aḍighiigh phọ rookpereghiom ghan bọ ghuḍia phọ ẹbugh,

³kụ, mem lọ oomo iyool-ịga phọ meekpomoghan sịphe phọ, pụruku abukoriom ịga phọ kookilemi ghan ḍighiigh phọ ọsighe sịphe ọnhu aghuḍia phọ, ọngo mụum ịga phọ, ọḅile oḅulemi ḍighiigh phọ ookpereghiom ọnhu aghuḍia phọ.

⁴ẠJekob apuru bukoriom iyool-ịga phọ mọ, “Bumor ạmi, nyina ịḍua ẹghen kụ eru?” Kụ bịdi ọḅeni nyọdi mọ, “Yoor ụḍua Hạran.”

⁵Ọdi apuru bịdi mọ, “Nyina elegheri ni Lẹban ọony phọ aNahor?” Kụ bịdi ọphagharanaan nyọdi mọ, “Yoor olegheri ni nyọdi.”

⁶Kụ apuru bịdi mọ, “Amoon ni?” Kụ bịdi ọḅem mọ, “Amoon ni. Mịin, aRechel ọnyani ọdi ạpam ni ịga ratumom.”

⁷ẠJekob ạḅeni bịdi mọ, “Ipogh. Sịen aḍio phọ edi bọ ni, kụ kẹ̋teeny bọ mem ookpomoghi ịga phọ egina esi, eeghe kụ nyina ị́ngo bọ bịdi phọ, ẹḅile ẹsighe bịdi eḅulemi ẹḅal ịḅal.”

⁸Kụ bịdi ọḅeni nyọdi mọ, “Yoor kótue oḍighi ịdipho tụtu oomo ịga phọ mesiighi sịen kụ yoor mookilemi ḍighiigh phọ ọgbole sịphe ọnhu aghuḍia phọ. Pọ kụ amem dị yoor kọngo mụum ịga phọ.”

⁹Bịdi odi rọkaaph ghan bịn, pọrono aRechel mạpham ịga ọde phọ ọdi ratumom. Ọdi kụ rapogh ghan ịga phọ.

¹⁰Mem dị ạJekob ạmiin bọ Rechel ọnyani phọ ạLeban umor onhiin phọ ọdi, rꞌịga phọ ạLeban umor onhiin phọ ọdi, ạJekob ạghi ḍigina amem aakilemi ḍighiigh phọ ạgbole sịphe ọnhu aghuḍia phọ, ạngo mụum ịga umor onhiin phọ ọdi.

¹¹ẠJekob ạkpun Rechel bịn awagharan ramoghi.

¹²ẠJekob ạḅeni Rechel mọ, “Mị ọony ọnyani ọde ạna; ọony ạRibeka.” Kụ aRechel aghiil ạghi ạḅeni ọde phọ ọdi.

¹³Mem dị ạLeban ạnaghan bọ ịlo ạJekob ọony umarani phọ ọdi, ọdi aghiil li ạghi ạteeny nyọdi, aghurughi, ạkpun nyọdi, ạpham nyọdi asiom ologhi otu, kụ ạJekob ạghaaph oomo ịpe emiteghu bọ ạḅeni Lẹban.

¹⁴ẠLeban ạḅeni nyọdi mọ, “Ageny ni nạ ịḅarara ạmi ḅịle rꞌaḍizu ạmi,” kụ ạJekob ạrol pạ kꞌọdi okpom ụnwanyu.

¹⁵ẠLeban ạḅeni Jẹkob mọ, “Nạ kúkumu ịmi oopho bịn sịen dị nạ aru ọnyo asiya ạmi. Ụḅeni ịmi ịlo mị kạkpe ghan nyịna.”

¹⁶ẠLeban ạmoogh ịyal ạnmanyaan: ḍien okumoor phọ ughol mọ aLia, ọbam mọ mọ aRechel.

¹⁷ALia ạmoogh ni iidugha ariḍien; kụ ọlo aRechel kụ amite oye ạnighe.

¹⁸ẠJekob ạphomoghian Rechel, kụ ọdi ạḅem mọ, “Mị kakumu nyịna oḍual ạsia, loor ẹmhu aRechel ọbam ọnyani phọ ạna.”

¹⁹ẠLeban ạḅem mọ, “Ẹnighe ni ọngo ạna nyọdi epu lọ mị kạngo nyọdi ọnon oye; tọl sịen rꞌạmi.”

²⁰Kụ ạJekob akumu Lẹban oḍual ạsia pịdi ọdi ạmoogh aRechel, kụ amem mọ ẹghigh ịphurukpu asuḍughul-otu bịn esi ọdi loor ẹphomoghian phọ dị ạphomoghian bọ Rechel.

²¹ẠJekob ạḅeni Lẹban mọ, “Ạsia phọ memunughan. Meera mị upin ọnyani phọ ạna.”

²²ẠLeban ạamaghagh oomo awe ẹmha phọ kụ ole ẹyaal apinien.

²³Kụ ọlo ḍughul phọ ạḍiphe, kpạripe rꞌaRechel, ạLeban ạḅogh Lia ọḅel ọnyani phọ ọdi kụ ạngo Jẹkob, kụ bịdi ọrolan esi.

²⁴(ẠLeban ạsighe Zilpa ẹbene-ọnyani ọdi ạngo Lia ịdipho ọnyani-otu.)

²⁵Mẹḅaal li ḍịroor, kụ ạJekob akiton ạmiin mọ aLia kụ ọnyani phọ ọngo bọ nyọdi. Kụ ạJekob ạghi apuru Lẹban mọ, “Ịphen nạ uḍighi bọ ịmi ịghen? Mịna úkol ẹmhu aRechel kụ akumu bọ nyịna? Uḍighi ika kụ nạ uugbegheḍiom bọ ịmina ịduon?”

²⁶ẠLeban ạphagharanaan mọ, “Íḍighi eḍighinom ịyaar ẹphen ọphur ọnughenyan ọbam ọony kụ egbi osi okumoor.

²⁷Kori amuneni eeḍio ọḍe apinien phọ, kụ mị ạngo nyịna nyọori phọ, lọ nạ kukumunaan ni ịmi ịnon oḍual ạsia.”

²⁸ẠJekob ạtuugh ịpe ọḅeni bọ nyọdi aḍighi amuneni riiḍio phọ, kụ ạLeban agbi ọḅogh aRechel ọnyani phọ ọdi ọngo ạJekob aḍighi ạnir.

²⁹(ẠLeban ạsighe Bilha ẹbene-otu ọdi ạngo Rechel ịdipho ọnyani-otu.)

³⁰Ọdi rꞌaRechel ọrolan esi kụ ọdi ạphomoghian Rechel apu Lia. Pọ kụ ẹdi ọdi ạḅophoghan ạrol ạḅile akumu Lẹban ịnon oḍual ạsia.

³¹Mem dị Ọmoogh-we phọ ạmiin mọ Lia ụ́pomoghian, ọdi adughe ọophi aLia, kụ aRechel ạrol ẹ́mar.

³²ALia aamor kụ ạmar olephiri, kụ aghol ḍien ọony phọ ọdi mọ aRuben. Ọdi ạḅem mọ, “Ageny ni, Ọmoogh-we phọ mạmiin ịminimiin phọ ạmi; nyịidipho mẹteeny dị olhom mọ ạmi kụphomoghian ịmi.”

³³Kụ ọdi ạḅile aamor kụ ạmar kẹn olephiri kụ ạḅem mọ, “Ọmoogh-we phọ mạnaghan mọ ụlogh ni ịmi ḍien, kụ ạtu bọ ạḅile ụngo ịmi mọony phọ ọphon,” kụ ọdi aghol ḍien ọony phọ mọ ạSimion.

³⁴Kụ ọdi ạḅile aamor kụ ạmar olephiri, kụ ạḅem mọ, “Mẹteeny dị olhom mọ ạmi rꞌạmi kọḅophoghan, ịdi eḍighi bọ mị mạmaranaan bọ nyọdi sịen ịraar ạnmuny,” kụ ọdi aghol ḍien ọony phọ mọ aLivai.

³⁵Ọdi ạḅile aamor kụ ạmar olephiri kụ ạḅem mọ, “Egi phọ ẹphen mị kạseph Ọmoogh-we phọ,” kụ ọdi aghol ḍien ọony phọ mọ aJuda. Kụ asophe ẹmaria.