Read abua Emiighom 31 Bible Online

Emiighom 31 - abua bible

Emiighom 31

¹ẠJekob ạnaghan dị alephiri ạnmuny ạLeban rọḅem ghan mọ, “ẠJekob mạsighiogh oomo aruphua ọde phọ ayira. Aruphua ọde phọ ayira kụ ịdi ọdi ạsighe bọ aḍumom aḍighinom ọdaam.”

²ẠJekob ạmiin mọ ạLeban óloghoma mun nyịno ịdipho ẹḅel amem mọ.

³Pọ kụ ẹdi Ọmoogh-we phọ ạḅeni Jẹkob mọ, “Ḅula ạghi ẹpe ẹmha phọ ạburude phọ ạna rꞌọto kꞌanyina. Mị kạtol li rꞌạna.”

⁴ẠJekob arom dom ạghiom Rechel rꞌaLia mọ bịdi ọteeny nyọdi ẹpe eḍum mọ aḍita ịnam mọ ọdi ẹrol bọ.

⁵Kụ ạḅeni bịdi mọ, “Mị mạmiin mọ ọde phọ anyina ịmi úloghoma mun ịdipho ẹḅel amem mọ, kụ Ẹnaan ọde phọ ạmi edianaan ni rꞌạmi.

⁶Ịyal phọ anyina elegheri ni mọ mị ụsighe ni oomo ịnyaam ạmi kụ akumu ọde phọ anyina.

⁷Kụ nyịidipho ọde phọ anyina ruugbegheḍiom ịmi, kụ masoph ikpoki ạrunwanyu phọ ạmi akpere ḍioph amem; kụ Ẹnaan ímeera mọ ọdi uḍighi ịmi ịkaraph.

⁸Kụ eru mạar dị ọdi ạḅem mọ, ‘Ịpe etiagha bọ kụ eru ikpoki arukumuan ạna,’ bịn oomo ạrutu-ịga phọ kẹmar ghan ịlo etiagha; eru mạar dị ọdi ạḅem mọ, ‘Ịpe ẹpoghogha bọ kụ eru ikpoki arukumuan ạna,’ bịn oomo ạrutu-ịga phọ kẹmar ghan nmụny dị ẹpoghogha.

⁹Pọ ịduon phọ Ẹnaan mẹsighe aḍita ịnam ọde phọ anyina ịngo ịmi.

¹⁰“Ẹteeny mem mọ ịga phọ rẹdaarogh bọ kụ mị ạmalha ụmalha kụ mị ạmiin dị oomo arekpe phọ rẹdaarogh bọ ịga phọ itiagha ni, ẹpoghogha ẹḅanana yogh.

¹¹Ọokpaany phọ Ẹnaan ụmagh ni ịmi ụmalha mọ, ‘Jẹkob,’ kụ mị ameera mọ, ‘Pọrono, mị odi ni sịen.’

¹²Ọdi ạḅem ạloghom mọ, ‘Poophe riḍien ạna ạmiin oomo idughuna phọ rẹdaarogh bọ ịga phọ ẹpoghogha ni, etiagha ẹḅanana, ịdi eḍighi bọ mị rạmiin ghan ni oomo ịpe ạLeban raḍighi bọ nyịna.

¹³Mị kụ Ẹnaan phọ emitenaan bọ nyịna ẹpe Bẹtel, sịphe nạ ạsighe bọ ḍighiigh phọ ạmeremi aḍighi ẹko ịlo ọotughianam ghan, nyẹpe nạ ạsagharan bọ mụnum mọ kụ uguanaan bọ ịmi. Nyịidipho, ḅetenu aakoroghian aḅula ẹpe ade phọ ạna.’”

¹⁴ARechel rꞌaLia ọphagharanaan nyọdi kụ ọḅem mọ, “Iyoor ísughanaan mun erua sịphe otu ọde phọ ayoor.

¹⁵Ọdi ụpham iyoor mụdi aruuruen. Ọdi aal iyoor, kụ nyịidipho ọdi malhiom oomo ikpoki phọ ọkpe bọ ẹmhu ayoor.

¹⁶Oomo aruphua phọ ịpe Ẹnaan ạar bọ ọde phọ ayoor, ịlo ayira rꞌạnmuny ayira. Nyịidipho ịpe Ẹnaan ẹḅeni bọ nyịna pọ tụugh aḍighi.”

¹⁷ẠJekob aakolobian oḅula kꞌẠizik ọde phọ ọdi ẹpe ade phọ aKenan kụ ạsighe nmụny phọ ọdi rꞌạnmariir phọ ọdi ạsaany ạnyu ạsikamel,

¹⁸kụ ạsighe oomo aḍita ịnam mọ ọdi, rꞌoomo aruphua phọ ịpe ọdi ạmoogh bọ, ịnam mọ ịpe eru bọ ịlo ọdi rꞌịpe ọdi ạmoogh bọ ẹpe Mesopotamia, ạpham rakeelom.

¹⁹ẠLeban maten ọsam asuphuugh iyool-ịga phọ ọdi, kụ mem dị ọdi ụ́tol aRechel amiighi rạraar aghuḍum otu phọ eḍighi bọ ịpe ọde phọ ọdi.

²⁰ẠJekob amian aḍighi ịlo ạLeban ọlo ạSiria phọ kálegheri, ọ́ḅeni nyọdi mọ ọno kakeel.

²¹Ọdi ạpham oomo aruphua phọ ọdi bịn aagborion asumanam. Ọdi ạḅeeny Ọphiiny aYufratis kụ anyeene ạghi ẹpe aroogbolom mọ ạGiliad.

²²Mem dị ịraar aḍughul-otu meten kụ ọghaaph ọḅeni Lẹban mọ ạJekob masuma.

²³ẠLeban rꞌabumor ọdi ophorogh nyọdi oḍual aḍughul-otu, kụ bịdi osoph nyọdi osoor ẹpe ạraaḅaraph phọ ạGiliad.

²⁴Ụmalha Ẹnaan eru esi ạLeban ọlo ạSiria phọ, kụ ẹḅeni nyọdi mọ, “Gona loor ạna, ụ́kiom ghan ọnhu Jẹkob mꞌigeny mꞌịkaraph.”

²⁵ẠLeban asoph Jẹkob asoor. ẠJekob mạlhogh ogbogo ọdi ạnyu eegum mọ; kụ ạLeban rꞌabumor phọ ọdi ọlogh ogbogo ọlo ạbidi ẹpe aroogbolom mọ ạGiliad.

²⁶ẠLeban apuru Jẹkob mọ, “Uḍighi ika kụ nạ uukeleghi bọ ịmi kụ ạsighiogh nmạnyaan ạmi ịdipho ạnmariir dị bụo ẹgham kụ uwum.

²⁷Uḍighi ika kụ nạ uukeleghi bọ ịmi bịn ạaran ạḍua dị mị úlegheri? Mụghumo nạ ụḅeni ịmi, mị mụpam ephegh rꞌiitia rꞌạsuor kụ arororiom nyịna.

²⁸Nạ óḍighi kẹn ịlo mị kạkpun nmụny phọ ạmi rꞌạnmanyaan phọ ạmi ạḅeni bịdi mọ ẹghi ẹnighe? Ịphen nạ aḍighi bọ ịlo elologhi,

²⁹Ọbo mị ạmoogh ni ịikpo oḍighi ạna ịyaar, kụ Ẹnaan ọde phọ ạna ịḅeni ịmi ḍughul phọ mọ gona loor mọ mị nyịna ọnhu kụ́kiom mꞌigeny mꞌịkaraph, mị nyịna kụ́ḅeni ịyaar.

³⁰Mị alegheri mọ nạ rakeel ịdi eḍighi bọ inyaam ọto kꞌạna resiph nyịna, kụ ịlo eeghe nạ ami bọ rạraar aghuḍum otu phọ ạmi ịlo eeghe?”

³¹ẠJekob ạphagharanaan Lẹban mọ, “Mị ugbi mọ nạ kạsighe ịikpo bịn ụaanyiom ịmi nmạnyaan phọ ạna. Pọ kụ ịyaar phọ mị aghiilaan bọ.

³²Kụ nạ ạmiin mọ oniin odi sịen dị ạpham rạraar aghuḍum mọ ạna, kokiigh ni nyọdi. Sịen ogbo aḍita abumor ayira, tue ạmaaghi sịen ạraraar phọ ịphen ạmi ịlo eru ịlo ạna, ạsighe.” ẠJekob ólhegheri mọ aRechel kụ mamiighi bọ rạraar phọ.

³³ẠLeban ạghi aḍigh ogbogo nyọpo ạJekob, aḍigh nyọpo aLia rꞌịlo ạnmanyaan-otu phọ, kụ mạar ọ́miin; ạḍua kꞌaLia amite, ạghi aḍigh kꞌaRechel.

³⁴Pọ ịduon phọ aRechel ạsighe rạraar aghuḍum mọ ạLeban bịn adoghoḍi ologhi okuru ẹtolom-ade ạsikamel phọ bịn ạtolom, ạLeban ạwaaghi oomo phọ ogbogo phọ aRechel kụ mạar ọ́miin.

³⁵Kụ aRechel ạḅeni ọde phọ ọdi mọ, “Mị ạpioman ni nyịna: nạ aḍigh sịen kụ mị úḅetenu úmeera. Mị odi ẹmha ạnmariir.” ẠLeban ạwaaghi kụ rạraar aghuḍum mọ ọdi ọ́miin.

³⁶Kụ ẹghagh ologhi ạJekob kụ ạḅaam Lẹban mọ, “Mị ụpiom nyịna eeghe? Eeghe ịkaraph kụ ịdi mị aḍighi bọ nyịna kụ nạ ạsighe bọ ọghagh ologhi kụ ruusophoghian bọ ịmi?

³⁷Nạ mạwaaghi ni sịen oomo aruphua phọ ạmi. Nạ ạmiin ni sịen oomo phọ aruphua phọ ạmi ẹlo eru ẹlo ạna edi ni ḍụghum? Pọ usoorom ịmi erugh sịen ogbo abumor phọ ạna rꞌạbuen ạmi bịdi osoph ọoruen oye lọ ạmoogh akeel.

³⁸Sịen ịyaldi ạsia mị ạrol bọ kꞌạna. Kꞌamem mọ ọpo mị aru bọ kꞌạna, iyool-ịga phọ ạna rꞌạrutu-ịga phọ ạna kẹ̋rol dị ụ́maraghi kụ mị kőghiigh ghan oniin ạa sịphe idughuna phọ ạna.

³⁹Oomo ịpe ilhom ịnam mọ ẹze bọ, mị ụ́sighe ghan útuom. Mị kụ uphinom ghan muphe phọ. Nạ ụsighe ghan ạḅam ẹmhu ạmi. Mꞌumi ḍughul mꞌumi ootaany, nạ ụḅam ghan ẹmhu ạmi.

⁴⁰Dọl phọ ạmi, ootaany ogogo ụsel ịmi, ḍughul ooto usoroghuom ịmina; mị útue ghan ụ́naani.

⁴¹Esi ịyaldi ạsia phọ mị ạrol bọ kꞌạna, mị akumu bọ nyịna ḍioph rꞌinya ạsia ịlo ịyal phọ ạnmanyaan phọ ạna, odiiny ạsia ịlo aḍita ịnam mọ ạna, nạ asoph ghan bọ ikpoki arukumuan phọ ạmi asooromi ḍioph amem.

⁴²Mọ Ẹnaan ạburude phọ ạmi, Ẹnaan phọ Ebraham rꞌOghiilaan phọ Ạizik, mụ́rolonaan bọ ịmi, ọbo nạ muphorogh ni ịmi bịn mị ạḅaph oopho agheel. Ẹnaan mẹmiin ni ịminimiin phọ ạmi rꞌarukumuan phọ ạmi kụ ọdi ạḅaam nyịna ḍughul phọ.”

⁴³ẠLeban ạphagharanaan Jẹkob kụ ạḅeni mọ, “Ạnmanyaan phọ ạbuen mị kụ ụmar; ạnmuny ạbidi ạbuo ạmi, kụ aḍita ịnam mọ ịlo ạmi. Oomo ịphen phọ nạ rạmiin bọ ịlo ạmi. Kụ rodon loor esi dị mị kátue bọ ạpam nmạnyaan phọ ạmina rꞌạnmuny phọ ạbidi,

⁴⁴mị ạnya oghiran ịyo rꞌạna. Tue, ịyal ayira okpol sighiigh ọotughianam ịyo phọ ayira.”

⁴⁵ẠJekob ạsighe ḍighiigh ạmeremi ịdipho ẹko.

⁴⁶ẠJekob ạḅeni bumor phọ ọdi mọ, “Ịki eekpomoghi sighiigh erool ẹsighe eru ekpol sịen,” kụ bịdi orool sighiigh phọ okpol eḅum, kụ bịdi ọrol ghan ọgbal asighiigh phọ kụ ole ghan eḍien.

⁴⁷ẠLeban aghol ḍien esi phọ mọ aJegar Sahaduta; kụ ạJekob aghol mọ aGaleed.

⁴⁸ẠLeban ạḅem mọ, “Egu asighiigh phọ ịphen keḍighi ọghiom ologhi ịyal ayira.” Ịduon kụ iḍighi kụ oghol bọ esi phọ mọ aGaleed.

⁴⁹ẠLeban ạḅile ạḅem mọ, “Ọmoogh-we phọ akori ghan ạḅile ạrol ogbo ạna rꞌạmi mem lọ yira ọgbaranaan.” Ịduon kụ iḍighi kụ oghol aani bọ esi phọ mọ aMizpa.

⁵⁰ẠLeban ạḅeni Jẹkob mọ, “Eru mạar dị nạ ạmiine nmạnyaan phọ ạmi, ḅịle nạ apinogh bụnon ạnmariir, ọnon oye sịen phọ ólho, pọ legheri mọ Ẹnaan phọ kụ kẹkaaph ịlo ịyal ayira.

⁵¹Mịin egu asighiigh phọ ịphen rꞌẹko phọ ẹphen mị ạmeremi bọ ogbo ịyal ayira.

⁵²Egu asighiigh phọ ịphen ẹmeera ọotughianam. Mị kátenom egu phọ ẹphen ozuom ạna, kụ nạ kẹn kátenom sighiigh phọ ịphen ozuom ạmi.

⁵³Ẹnaan phọ Ebraham rꞌaNahor kụ kesoph ọoruen ịyal ayira.” ẠJekob aghol ḍien Oghiilaan Ạizik ọde phọ ọdi kụ aghunya.

⁵⁴ẠJekob ạphighiron ẹkia ịkpuy sịphe ạnyu ẹeḅaraph phọ kụ ạamaghagh bumor phọ ọdi mọ itu olhe eḍien. Bịdi ụrol sịphe eegum mọ ḍiniin aḍughul-otu kụ olhe bọ eḍien phọ.

⁵⁵ẠLeban aḅon aḅetenu esoph ạḍiroor, kụ ạkpunogh nmụny ạnmanyaan phọ ọdi rꞌạnmanyaan phọ ọdi, kụ ạngo bịdi ọghor eeḅi erelhe kụ ạḍua agheel ẹmha.