Read abua Emiighom 32 Bible Online

Emiighom 32 - abua bible

Emiighom 32

¹ẠJekob aten rakeel kụ ạruukpaany Ẹnaan ozuan nyọdi.

²Mem dị ạJekob ạmiin bọ bịdi kụ ạḅem mọ, “Bụen phọ awe ẹgham kꞌẸnaan.” Kụ ọdi aghol ḍien esi phọ mọ aMahanaim.

³ẠJekob arom butelhedom ọphur ọghi ọteeny Ịso umor phọ ọdi ẹpe de aSeir ẹpe eelhe phọ Idom,

⁴kụ aroma bịdi mọ ọḅem ịduon: “Mị ạJekob, otelhedom phọ ạna ọpo asooromi bọ loor, rạwa ni ọghaaph ọḅeni Ịso ọde-otu phọ ạmi mọ mị odianaan ghan rꞌạLeban kụ mị aabinyemi erigheel phọ kꞌạnyiidipho.

⁵Mị ạmoogh sịnam, ịnam adool, iyool-ịga rꞌạrutu-ịga, rẹbene alephiri rꞌạrebene ạnmariir. Mị atom bọ dom raruom nyịna mọ ụnma ịmi ighirigiir, ạmoogh ghụsan.”

⁶Mem dị abutelhedom mọ oḅula ọteeny Jẹkob, bịdi ụḅem mọ, “Yoor ụghi ni ọteeny umor phọ ạna, kụ ọdi rꞌaloor rꞌinya okuron awe ọdi, oten oru ọteeny ạna.”

⁷Kụ aruugu asiph Jẹkob iboom, oḅio ọdi ọ́pho. Kụ ọdi adi we phọ ọrolan bọ rꞌọdi ịyal aḍita. Ịduon kẹn kụ ẹdi odi adi iyool-ịga rꞌạrutu-ịga phọ, sịnam mọ rꞌạsikamel phọ.

⁸Ọdi ạatughian mọ, “Eḍighi ịyaar dị Ịso aru azuom ḍịḅel aḍita phọ, pọ ạḍieri phọ kekpetenaan ni esugha.”

⁹ẠJekob ạaḅereghi mọ, “Nạ Ẹnaan phọ Ebraham ọde ọde phọ ạmi rꞌẸnaan Ạizik ọde phọ ạmi, ụnaghan ịmi. Nạ Ọmoogh-we phọ ọpo ụḅeni bọ ịmi mọ keel ẹpe ẹmha phọ anyina rꞌawe phọ ạna, nạ kụrolonaan ni ịmi.

¹⁰Mị ụ́man rꞌẹnum oomo ẹphomoghian rꞌighirigiir phọ nạ ụnma bọ ịmi otelhedom mọ ạna. Oopho ịkpara phọ ạmi bịn kụ ịdi mị ạsighe ạḅeenyom Ọphiiny ạJodan, kụ nyịidipho mị maḍighi ịyal aḍita.

¹¹Kụ mị rạaḅereghi ni nyịna mọ ụphel ịmi ạsighe esi ạḍighaagh phọ Ịso umor phọ ạmi. Mị rakiilaan ni nyọdi, ịduon dị ratu bọ ozuom ayoor ọḅile ophiemi oomo ayoor rꞌạnmariir rꞌịbam ạnmuny phọ.

¹²Tụutughian mọ nạ uguanaan ịmi mọ nạ kaḍighi ịdi oomo ạraraar kịnighenom ịmi kụ mị ạmoogh nmụny ạnmuny dị kótue ogbi, dị kọtomaam ịdipho ịisaar ọgbal ogbogh ọphiiny.”

¹³Ọdi rọmina sịphe phọ rẹḅaal, kụ ạJekob ạsaḅar sịphe aḍita ịnam mọ ruunmo ọngo Ịso umor phọ ọdi:

¹⁴Ịyal okuron ịya ạrutu-ịga, ịyaldi arekpe, ịyal okuron ịya iyool-ịga rꞌịyaldi idughuna,

¹⁵Ịraardi ạsikamel rꞌịdi mạmaam ke̋ghin, inyadi ạrutu-ạsinam rꞌiḍioph ilephiri ạsinam, ịyaldi ịya ịnam adool rꞌiḍioph ilephiri ịnam adool.

¹⁶Ọdi adiighi oomo phọ ịne rịikpigh kụ ạḅogh tọro ẹkpigh ạngo oniin otelhedom ọdi; kụ ạḅeni bịdi mọ, “Idiemi ghan ghisigh kụ epholopool ẹrol ogbo ẹkpigh aghisigh rꞌẹlo ọman.”

¹⁷Kụ ạto ạḅeni ọḅel otelhedom mọ, “Mem dị Ịso umor phọ ạmi ạteeny nyịna kụ apuru nyịna mọ, ‘Nạ ọlo kꞌạnhian? Nạ rạki ẹghen? Ịnam mọ ịphen edi bọ risigh ạna ịlo ạnhian?’

¹⁸ḅẹni nyọdi mọ, ‘Ịphen phọ ịlo ạJekob otelhedom mọ ạna. Ịphen phọ aruunmo dị ọdi rạkiomonaan ọde-otu ọdi. ẠJekob ọ́kelan sịen ọman ayoor.’”

¹⁹Kụ ạḅile ạtuugh ịphen phọ ạḅeni nyọpo atum bọ nyọdi rꞌọpo amuneniom bọ ịraar phọ, rꞌạbuphe rọdaph bọ sita ịnam mọ, mọ, “Iniin phọ ịphen kụ ịdi nyina kẹkaaph mem lọ nyina kezuan bọ nyọdi,

²⁰ẹḅile kẹn ẹḅeni nyọdi mọ, ‘ẠJekob otelhedom mọ ạna ọ́kelan sịen ọman ayoor.’” Ọdi ạatughian mọ, “Mị ạsighe ruunmo phọ ịphen aruom nyọdi ịlo ọophoomiom ologhi ọdi kụ mị agbi ọmiin ọdi, oḍighom ịyaar ọdi kụsighenom ni ịmi rꞌogeny ologhi.”

²¹Ọdi ạngo ruunmo phọ oḍiemiom ghisigh kụ ọdi ạmina sịphe ogbogo phọ ḍughul phọ ạḍiphe.

²²Ḍiniin aḍughul phọ ạḍiphe ạJekob aḅetenu ạpham ịyal phọ ạnmariir phọ ọdi rꞌịyal ạnmanyaan-otu phọ ọdi rꞌiḍioph rꞌoniin ạnmuny phọ ọdi ạḅeenye okol ạmuum mọ ạJabok aphune.

²³Mem dị ọdi mạḅeenye, ọdi ạḅile ạḅeenye oomo ạraraar phọ ọdi.

²⁴Ogina ạJekob bịn asugha ọman, kụ oniin oye aru eenaan rꞌọdi tụtu ạḍiroor retu ọḅaal.

²⁵Mem dị oye phọ ạmiin mọ ọkpar opu nyịno rạ́tolonaan, kụ akuph olo ạJekob akpoton sịphe amatul phọ, sịphe bịdi rọgba bọ ịnugh phọ.

²⁶Kụ oye phọ ạḅeni mọ, “Ụwile ịmi mị kakeel; ạḍiroor rẹḅaal.” Kụ ạJekob ạḅem mọ, “Mị nyịna rạ́wile emuton dị nạ mụngo ịmi ḍịseph.”

²⁷Kụ oye phọ apuru mọ, “Ḍịen ạna ughol ika?” Kụ ọdi ạḅem mọ, “Jẹkob.”

²⁸Kụ oye phọ ạḅeni nyọdi mọ, “Kọ́magh ghan mun nyịna mọ ạJekob; ḍien ạna kokol mọ Ịzirel, ịdi eḍighi bọ nạ mạgba ịnugh rꞌẸnaan ḅịle rꞌawe kụ ạkpar apu bịdi.”

²⁹Kụ ạJekob ạḅeni nyọdi mọ, “Seseeny, kola ḍien ạna ụḅeni ịmi.” Kụ ọdi ạphagharanaan mọ, “Esi ika kụ ẹdi nạ ạtu bọ apuru ḍien ạmi?” Kụ ọdi ạngo ḍịseph Jẹkob.

³⁰ẠJekob ạḅem mọ, “Mị mạmiin Ẹnaan ghisigh rꞌaghisigh kụ mị odi ni rapooghu,” kụ ọdi aghol ḍien esi phọ mọ ạPenuel.

³¹Ọdi rotenom Pẹnuel bịn ogogo amite, kụ ọdi amiigh okpeku loor ịtaany phọ ọdi.

³²Loor ịduon phọ ạnmuny Ịzirel rọ́ba ghan ephulupul olo ạnam kꞌarodon, loor esi dị olo phọ kụ ẹdi okuph bọ.