Read abua Emiighom 37 Bible Online

Emiighom 37 - abua bible

Emiighom 37

¹ẠJekob arugh ẹpe Kenan ẹpe ọde phọ ọdi ạrol bọ iiruen phọ.

²Bụen kụ oghiil ọto ạJekob. ẠJosef ạman ḍioph rꞌoḍual ạsia kụ ạdaph ghan bumor phọ ọdi aphogh aani ghan iyool-ịga rꞌạrutu-ịga. Ọdi kụ ọbumoony sịphe ạnmuny phọ aBilha rꞌạnmuny phọ aZilpa ạnmariir ọde phọ ọdi. ẠJosef ạghi ghan ạghaaph ạḅeni ọde phọ ọdi, ịdi bịdi roḍighi ghan ịdi ị́nighe.

³Ịzirel ạphomoghian Jọsef apu oomo ạnmuny phọ ọdi, ịdi eḍighi bọ ọdi ạmar Jọsef mem dị ọdi mạkpo, kụ ạkolonaan nyọdi ạsuoma ạko kịrokiro.

⁴Mem dị bịdi ọmiin bọ mọ ọde phọ ạbuno ạpomoghian Jọsef apu bụno, kụ bịdi ọlogh ḍien Jọsef; kụ bịdi rꞌọdi ọrol ẹpomoghian ụ́kaaph ghan ọghaaph ẹphomoghian.

⁵Ḍiniin aḍughul ạJosef ạmalha mạlha, kụ ạghaaph ạḅeni bumor phọ ọdi, kụ bịdi ọlogh nyọdi ḍien bịn ọkpaariom.

⁶Kụ ạḅeni bumor phọ ọdi mọ, “Iseseeny, ịnaghan mạlha dị mị ạmalha.

⁷Yira rọgba ghan ịbiakpa ẹpe ozo phọ, kụ odi ropogh bịn ạḍigba ịbiakpa phọ ḍịphe ạmi ẹmeera zẹm, kụ ạsigba ịbiakpa phọ ịpe anyina ẹmeregha eko ḍịphe ạmi ẹlhogh ogbo, kụ ekpuḍian ẹeḅereghi ghan ḍịphe ạmi.”

⁸Abumor phọ ọdi opuru nyọdi mọ, “Ịduon phọ tọ nạ rạḅem ghan mọ nạ kụ kụda iyoor? Ịduon phọ tọ nạ rạḅem ghan mọ yoor kọtol eeḍian ạna?” Kụ bịdi olegheri bịn ọlogh nyọdi ḍien ọloghori loor ạmalha phọ ọdi rꞌikpo ọnhu ọghaaph phọ ọdi.

⁹Kụ ọdi ạḅile ạmalha mụnon ạmalha, kụ ạghaaph ạḅeni bumor phọ ọdi. Ạḅem mọ, “Ịnaghan, mị mạḅile kẹn ạmalha mụnon ạmalha. Erumuḍio phọ rꞌụnwanyu phọ rꞌiḍioph rꞌoniin ạraanaan kụ ekpuḍian ghan rịiḅereghi ghan ịmi.”

¹⁰Kụ ạghaaph ạḅeni ọde phọ ọdi rꞌabumor phọ ọdi, kụ ọde phọ ọdi ạḅaam nyọdi mọ, “Ạmalha phọ ạmuen nạ ạmalha bọ ạmughen? Mị rꞌonhiin phọ ạna rꞌabumor phọ ạna kụ kokpuḍian ọoḅereghi nyịna?”

¹¹Abumor phọ ọdi ọlogh nyọdi ḍien, kụ ọde phọ ọdi ạphamanam mạlha phọ.

¹²Abumor phọ ạJosef ọghi ẹpe Sẹkem ọngo aḍita ịga ọde phọ ạbidi ịḅal.

¹³Ịzirel apuru Jọsef mọ, “Abumor phọ ạna úlho ẹpe Sẹkem ọngo ịga phọ ịḅal? Tue, mị karom nyịna ạghi aphogh bịdi.” Kụ ọdi mọ, “Mị odi ni sịen.”

¹⁴Kụ ọdi arom nyọdi mọ, “Kịa aphogh bịdi mụghumo bịdi rꞌịga phọ edi ni igeny, kụ aru ụḅeni ịmi.” Kụ ọde phọ ọdi arorori nyọdi amitiom ẹpe Eḍiiny phọ ạHebron, kụ ọdi ạghi asi Sẹkem.

¹⁵Oniin oye ạḅom nyọdi dị aphe ẹpe eḍum mọ rayeela kụ apuru nyọdi mọ, “Nạ rạwa ghan eeghia?”

¹⁶Kụ ọdi ạphagharanaan mọ, “Mị rạwa ghan bumor ạmi, dị oru ọngo ịga ịḅal. Seseeny, ụḅeni ịmi ekpisi phọ bịdi ọdi bọ.”

¹⁷Kụ oye phọ ạḅeni nyọdi mọ, “Bịdi mọḍua ẹphen. Mị ụnaghan ghan dị bịdi ọḅem ghan mọ, ‘Itu ọghi Dotan.’” ẠJosef ạwa bumor phọ ọdi, kụ ạteeny bịdi ẹpe Dotan.

¹⁸Mem dị bịdi ọmiin nyọdi egher, kụ bịdi oopuruan ọḅoph ọnhu mọ oghiigh nyọdi.

¹⁹Kụ oniin ạḅeni nyoniin mọ, “Ịmiin, uwo ạramalha phọ ratu-o.

²⁰Itu oghiigh nyọdi, osumeeny nyọdi ologhi ooni, kụ ọgba mọ elhom ẹnam kụ ighiigh nyọdi, kụ yira ọrol kụ ọmiin ịpe ạramalha phọ ọdi keḍighi bọ.”

²¹ARuben ạnaghan kụ rạwa ọphel ạJosef ọsighe. Kụ ạḅeni bịdi mọ kúkiigh nyọdi,

²²kúzu ịḅaal, osiph nyọdi bịn osumeeny ooni phọ ọphon sịen ẹdala phọ. Oye nyọdi kụ́ḅogh uḍighi ịyaar. Ọdi ạtuan ọphel ọdi ọsighe rạghaagh ạbidi, ọtophoron ọdi ophune ọghiom ọde ọdi kụ ạghaaph bọ ịphen phọ.

²³ẠJosef ạghi ạteeny bumor phọ ọdi, kụ bịdi osiph nyọdi ọkporion ạsuoma ạko kịrokiro phọ dị ạkpologhian bọ.

²⁴Kụ bịdi ọsighe nyọdi osumeeny ologhi ooni, dị ạmuum úlho ologhi.

²⁵Bịdi ọrologhu ude role eḍien kụ bịdi ọmiin ḍita abumuul ḍighi ạbuo Ịsmaelait rꞌasidool dị ọḍua ẹpe Gịliad, rꞌạsikamel ạbidi, ọsaany rolho rꞌamaa eeḅi eḍu rọkimom Ijipt.

²⁶AJuda apuru bumor phọ ọdi mọ, “Eeghe ạsuo kụ ẹdi yira kọmoogh, eru mạar dị yira oghiigh umor phọ ayira, kụ ạaghi ịḅaal phọ ọdi?

²⁷Itu ọsighe nyọdi oola bụo Ịsmael phọ. Ạraghaagh ayira kị́ḅogh nyọdi. Ọdi umor ayira. Ọdi rꞌayira iniin ịḅaal.” Kụ abumor phọ ọdi omeeraam.

²⁸Abumuul ḍighi ạMidian phọ roten kụ abumor phọ ọghi ọsighe Jọsef ophune, ọsighe nyọdi oola ịyaldi ipoḍi asilva, kụ bịdi ọpham nyọdi osiom Ijipt.

²⁹Mem dị aRuben ạghi bọ ẹpe ooni phọ kụ Jọsef ụ́miin, ọdi arunyian ni ibura odi loor ọto,

³⁰kụ roḅula ẹpe abumor phọ ọdi ọrol bọ, kụ ạḅem mọ, “Ọony phọ ólho sịphe ologhi ooni phọ, kụ mịna kakeel ẹghen?”

³¹Kụ bịdi ọsighe ạtu-ọga oghiigh, ọsighe ạsuoma phọ ạJosef ookilighiom ịḅaal phọ.

³²Bịdi ọsighe ạsuoma ạko kịrokiro phọ ọpham oruom ọde phọ ạbidi kụ ọḅeni mọ, “Ẹphen ịyaar dị yoor ọmiin. Mạar aphogh mụghumo ọphon ạsuoma ọony phọ ạna ni.”

³³Ọdi alegheri ni ạsuoma ọony phọ ọdi, kụ ạḅem mọ, “Ọphon phọ odi ni; elhom ẹnam meghiigh mọony phọ ạmi, ẹkiriph Jọsef ịpherepe iikia ílho.”

³⁴ẠJekob ạphanyi ibura ọdi loor ọto, amunughian rukpe-ọto, ạto mọony phọ ọdi ịminighan ariiḍio.

³⁵Oomo ạnmuny phọ ọdi rꞌạnmanyaan phọ ọdi ọghi ghan ọodereghi ghan ọdi, kụ ọdi ómeera mọ ọodereghi nyọdi, kụ ạḅem mọ, “Mị kạdaph ni mọony phọ ạmi akeel aani ẹpe oḍi phọ ạto nyọdi.” Ịdipho kụ ẹdi ọde phọ ọdi amoghi.

³⁶Mem mọ ạmuen phọ, ẹpe Ijipt, awe ạMidian ọsighe Jọsef ọolha Pọtifar, otelhedom ọdaam eelhe phọ aḍighi bọ uwo ẹmhu ugheel ẹkpar phọ ọdi.