Read abua Emiighom 38 Bible Online

Emiighom 38 - abua bible

Emiighom 38

¹Ịdi emite mem mọ ọpo phọ, aJuda ạwile bumor phọ ọdi bịn akiton ạghi kꞌonhiin ọlo Ạdulam dị oghol mọ aHira.

²Ạrol sịphe phọ kụ ạmiin oniin ọnyani ọlo aKenanait ḍien ọde phọ ọdi ughol mọ ạSua. Aphin ọnyani phọ, kụ ịyal ạbidi ọrolan esi.

³Kụ aamor ạmar olephiri, kụ ọdi aghol ḍien ọony phọ mọ Er.

⁴Ạḅile kẹn aamor ạmar olephiri, kụ onhiin phọ aghol ḍien ọony phọ mọ Onan.

⁵Kụ ạḅile kẹn aamor ạmar olephiri kụ onhiin phọ aghol ḍien ọony phọ mọ aSela. Ọdi ạrol ẹpe Kezib kụ ạmar bọ nyọdi.

⁶Kụ aJuda aphinanaan Er ọkpana phọ ọdi ạnir dị oghol mọ ạTamar.

⁷Er ọkpana phọ aJuda oye ạsipioghom risigh Ọmoogh-we phọ, kụ Ọmoogh-we phọ aghiigh nyọdi.

⁸Kụ aJuda ạḅeni Onan mọ ạsighe ạnir phọ umor phọ ọdi aphin, ạmaraghinaan umor phọ ọdi nmụny.

⁹Onan alegheri ni mọ ạnmuny phọ ạbuphe kọmaraghi bọ kạ́buo ọno; kụ tọrobo amem lọ bịdi ọrolan esi, Onan azuughi ghan osiim aloor phọ ọdi ude, ọbo ọdi kạmaraghinaan bọ umor phọ ọdi nmụny.

¹⁰Ịphen phọ ọdi aḍighi ghan bọ ikia ni Ọmoogh-we phọ, kụ Ọmoogh-we phọ aghiigh aani kẹn nyọdi.

¹¹Kụ aJuda ạḅeni Tạmar ạnir ọony phọ ọdi mọ, “Keel kꞌọde ạna ạrol dọl ekpukele ạnir, tụtu aSela ọony phọ ạmi ạmanam.” Ọdi ạghaaph ịduon loor oghiilaan mọ ọphon phọ kạḅile amugh kẹn ịdipho abumor phọ ọdi. Kụ ạTamar agheel kꞌọde phọ ọdi.

¹²Ịman mem bịn ọnyani phọ ạSua, ạnir phọ aJuda, amugh, ọodereghi Juda. Kụ aJuda rꞌaHira ọlo Ạdulam ọyaghiri phọ ọdi ọghi ẹpe Timna ophogh ạbuphe rọsam bọ suphuugh iyool-ịga phọ ọdi.

¹³Kụ ọghi ọḅeni Tạmar mọ ọde olhom mọ ạna aten ni rạki Timna ọsam ghan asuphuugh iyool-ịga phọ ọdi.

¹⁴Kụ ọdi ạkaranaan rukpe arukpukele ạnmariir phọ, ạsighe ịnon arukpe aanmenaan, aakpereghian loor ọdi azua ghisigh ọdi ạmana kụ ạghi ạrol ẹpe eḍighom Enaim koten bọ kụ ọki Timna, ịdi eḍighi bọ ọdi mạmiin mọ aSela maphoph ạmanam, kụ ụ́sighe nyọdi ụngo mọ ọdi aphin.

¹⁵Mem dị aJuda ạmiin bọ nyọdi, bịn agbiom mọ ọdi oliom-ẹmha, ịdi eḍighi bọ ọdi aakpereghian risigh ọdi.

¹⁶AJuda akiton asoman nyọdi sịphe eten phọ kụ ạḅeni nyọdi mọ, “Seseeny tue, tue olegherian.” Ọdi ólhegheri rꞌẹnum mọ ọdi ạnir ọony phọ ọno. Kụ ạnir phọ mọ, “Nạ kụ́ngo ịmi eeghe kụ ịyal ayira ọtolan esi?”

¹⁷Kụ ọdi ạḅeni nyọdi mọ, “Mị kạngo nyịna mọony ạtu-ọga.” Ạnir phọ apuru nyọdi mọ, “Nạ kạpaghan eeghia, tụtu nạ ạsighe aru?”

¹⁸Kụ ọdi apuru mọ, “Eeghe ịyaar kụ ịnighe dị mị kạphaghan bọ nyịna?” Kụ ạnir phọ ạphagharanaan nyọdi mọ, “Agulu rꞌịkuta orum mọ ạna, rꞌịkpara phọ ạna.” Kụ ọdi ạsighe rạraar phọ ạngo ạnir phọ, kụ bịdi oḍigh otu ọrolan esi, kụ ọdi ạamoromi nyọdi.

¹⁹ẠTamar aḅetenu agheel ạkaranaan ibura phọ, ạsighe rukpe arukpukele ạnmariir phọ ọdi amunughian.

²⁰AJuda ạsighe ạtu-ọga phọ ạngo ọyaghiri phọ ọdi ọlo Ạdulam phọ, mọ ạsighe ạghi ạngo, ạsighenom rạraar phọ dị ạphaghan bọ ḍịghaagh ạnir phọ. Ạki, ọ́miin.

²¹Ọdi apuru we Enaim mọ, “Odi ẹghen oliom-ẹmha ạnir phọ ạrol ghan bọ sịen eten phọ?” Kụ bịdi ọphagharanaan mọ, “Oliom-ẹmha ạnir ẹphen ólho ghan.”

²²Ọdi aḅula kụ ạḅeni Juda mọ, “Mị ụ́miin ạnir phọ. Awe ẹmha phọ ụḅeni ịmi mọ olhiom ẹmha ạnir ólho ghan ẹmha ạbuno.”

²³AJuda mọ, “Bịle ọdi ạsighe aani ọbo umugholoor kusiph ghan bọ iyira. Mị mạngo ọga phọ mọ ọghiomonaan nyọdi kụ nyọdi ụ́miin.”

²⁴Esi ịraar ụnwanyu kụ oru ọḅeni Juda mọ, “ẠTamar ạnir ọony phọ ạna kụ aphegh bọ ịlo olhiom ẹmha phọ, kụ nyịidipho malhe ẹmha raamor.” Kụ aJuda ạḅem mọ, “Ịsighe nyọdi emitiom ọkpooniom nịan.”

²⁵Kụ ọsighe Tạmar omitiom, kụ ọdi arom ạghiomonaan ọde olhom mọ ọdi kụ ạḅem mọ, “Oye phọ ạmoogh bọ rạraar phọ ịphen kụ uumoromi bọ ịmi. Ḅẹeḅeghion aphogh gulu phọ rꞌịkuta orum mọ rꞌịkpara phọ ịphen mọ nạ kalegheri ni uwo ạraraar phọ.”

²⁶AJuda ameeraam mọ ịlo ọno ni, kụ ạḅem mọ, “Ạnir phọ kụ aakuan loor upu ịmi, ịdi eḍighi bọ mị úmeera ụsighe nyọdi ụngo Sela phọ ọony phọ ạmi.” Kụ ọdi ọ́rolan mun ạnir phọ.

²⁷Kụ ẹteeny mem dị oghunughun rakun Tạmar, kụ ọmiin mọ ịyal ạnmuny kụ odi ọkuruḅaka phọ ọdi.

²⁸Mem mọ oghunughun phọ rakun bọ nyọdi, kụ oniin ọony phọ amitiom ḍịghaagh, kụ ọmaramia phọ ạsighe ịtogh-tọgh iri ạkagh ḍịghaagh ọony phọ kụ ạḅem mọ, “Ọphon kụ ọḅel.”

²⁹Ịdipho dị aḍur bọ ḍịghaagh phọ ọdi ạlogh ologhi, íbia bịn ọmar umor phọ ọdi, kụ ọmaramia phọ ạḅem mọ, “Ẹphen phọ eeghe ọdo ịyaar dị nạ mạkoghoronu bọ ịduon.” Kụ ọtuan ịphen phọ oghol ḍien ọdi mọ ạPerez.

³⁰Kụ ogbi ọmar umor phọ ọdi rꞌiri phọ ọkagh bọ ḍịghaagh phọ ọdi; kụ oghol ḍien ọdi mọ aZera.