Read abua Emiighom 39 Bible Online

Emiighom 39 - abua bible

Emiighom 39

¹Kụ ọpham Jọsef osiom Ijipt. Kụ ạPotifar otelhedom ọdaam eelhe phọ ḅịle rꞌuwo ẹmhu ugheel ẹkpar phọ ọdi, agho nyọdi esi Ịsmaelait phọ.

²Ọmoogh-we phọ ạrolonaan ni rꞌạJosef, kụ ọdi ạmoogh edughom. Ọdi ạrol ghan sịphe kꞌọde-otu phọ ọdi ọlo Ijipt phọ.

³Ọde-otu phọ ọdi ạmiin mọ Ọmoogh-we phọ odianaan ni rꞌọdi, kụ ạngo ẹeḍiom oomo iiḍighi phọ ọdi.

⁴Eḍighinom ịyaar ạJosef ịḅeeraan ni Pọtifar, kụ ạsighe nyọdi aḍighi mọony-otu; kụ ạḅogh oomo aruphua phọ ọdi ạlogh ḍịghaagh ọdi.

⁵Emiigh kꞌamem mọ dị aḍighi bọ Jọsef uwo ẹmhu sịphe otu phọ ọdi, ạḅogh bọ oomo aruphua phọ ọdi ạngo Jọsef, bịn loor ẹmhu ạJosef Ọmoogh-we phọ ạseph otu phọ rꞌade phọ rꞌoomo aruphua phọ ọlo Ijipt phọ ạmoogh bọ.

⁶Kụ ạPotifar ạwilenaan oomo aruphua phọ ọdi ạḅogh ạngo Jọsef mọ ọdi kụ aphogh ghan, emuton eḍien lọ ọdi kale bịn. ẠJosef ọopho oye, ạḅile ạnighe ọmiin.

⁷Ịphen phọ reten, ạnir ọde-otu phọ akananaam aphogh ghan Jọsef, kụ ạḅeni Jọsef mọ, “Tue ọghi ọrolan esi.”

⁸ẠJosef ómeera, kụ ạḅeni ạnir ọde-otu phọ ọdi mọ, “Ọde-otu phọ ạmi ọ́maghami ịyaar oomo aruphua phọ edi bọ sịen otu phọ, ạḅogh oomo aruphua phọ ọdi ạlogh ḍịghaagh ạmi.

⁹Ọnon oye dị ạbugh upu ịmi sịen otu phọ ọphon ólho; ịyaar ílho dị ọdi ịmi ụ́ḅaram ụngoom emuton nyịna ạnir phọ ọdi. Kụ keḍighi bọ ika kụ mị ạpioghom sịpioghom dị eleeny ịduon, aḍighi ịkaraph risigh Ẹnaan?”

¹⁰Ḍio etum ḍio, ọdi ạḅeni ghan ni Jọsef mọ bụno ọghi ọrolan esi, kụ ạJosef ómeera.

¹¹Kụ ẹteeny eniin aḍio, ọdo phọ amem mọ kẹn, ạJosef maḍigh otu phọ oḍighi oḍighi phọ ọdi, rꞌọnon oye ọ́rol sịphe otu phọ.

¹²Ạnir phọ ạghi aḍigh ạkpaaghi ạsuoma ạJosef ạpham, kụ ạḅeni mọ, “Tue ọghi ọrolan esi.” Kụ ạJosef ạwilenaan nyọdi ạsuoma phọ ọdi, kụ amite ạḍua.

¹³Ọdi rọmiin bọ mọ ạJosef mạwilenaan ạsuoma phọ ọdi nyọdi, amite ạḍua,

¹⁴kụ ạamaghagh weye ịsiphe otu phọ, kụ ọḅeni mọ, “Ịmiin, dị ọnyo aHibru phọ olhom mọ ạmi ạsighe bọ ạlogh sịen maru uufolomi iyira. Ọdi ụtuonom ịmi ẹphen osoph phọ obiighi ạmi, kụ mị ạlooghi.

¹⁵Kụ mị rạlooghi bọ kụ ụwilenaan ịmi ạsuoma ọdi amite ạḍua.”

¹⁶Ạnir phọ ạpham ạsuoma phọ ọdi tụtu ọde-otu phọ arigheel,

¹⁷kụ ạtuugh ịphen phọ ạghaaph ạḅeni nyọdi mọ, “Ọnyo aHibru phọ nạ ạsighe bọ ạlogh sịen, ụtuonom ịmi kꞌẹpe osoph obiighi ạmi.

¹⁸Mị rạlooghi ramoghi yogh kụ ụwilenaan ịmi ạsuoma phọ ọdi amite ạḍua.”

¹⁹Mem dị olhom mọ ọdi ạnaghan bọ oomo ịphen ạnir phọ ọdi ạghaaph bọ ạḅeni nyọdi mọ, “Ịphen ịdi ẹbene phọ ạna aḍighi,” kụ ephin ologhi ọde-otu phọ iboom.

²⁰Ọde-otu phọ ạsighe ni Jọsef ạghi ạlogh otu ikoli phọ ọdi.

²¹Kụ Ọmoogh-we phọ ạrolonaan Jọsef, ạnma ghan nyọdi ighirigiir, aḍighi ịdi ọpo rapogh ghan bọ bụo ikoli phọ aphoghom ghan nyọdi egeny ekpeḍien.

²²Ọpo rapogh ghan bọ bụo ikoli phọ ạḅogh oomo ạbuo ikoli phọ ạlogh ḍịghaagh ạJosef. Tọro ịyaar lọ koḍighi sịphe phọ pọ ọdi kụ kaḍighi.

²³Ọpo rapogh bọ bụo ikoli phọ óphogh ghan mun tọrobo ịyaar lọ edi. Ọdi ạJosef kụ aphogh ghan, ịdi eḍighi bọ Ọmoogh-we phọ odianaan nyọdi, dị oomo ạraraar phọ ịpe ọdi raḍighi bọ, Ọmoogh-we phọ ạngo ghan ni ẹeḍiom.