Read abua Emiighom 45 Bible Online

Emiighom 45 - abua bible

Emiighom 45

¹ẠJosef órue mun ọkparam ọ́phama loor ọdi esi ạbuphe ọmeregha bọ otuman nyọdi. Kụ ọdi ạlho kụ ạḅem mọ, “Tọro oye lọ odi sịen ạḍua.” Kụ oomo awe phọ ọrol bọ rꞌọdi ọḍuaghu. Oye ọ́rol sịphe phọ mem mọ ạJosef aḍeenaan bọ bumor phọ ọdi loor mọ ọno.

²Kụ amoghi yogh amitiom kụ bụo Ijipt rꞌọto ọdaam eelhe phọ ọnaghan.

³ẠJosef ạḅeni bumor phọ ọdi mọ, “Mị ạJosef. Ọde phọ ạmi odi ni?” Kụ abumor phọ ọdi nyọdi útue ụ́pagharanaan ịdi eḍighi bọ ịpher ri bịdi bịn.

⁴ẠJosef ạḅeni bumor phọ ọdi mọ, “Iḍuraan ẹebeeph ẹphen mị odi bọ, mị rịiḅereghi ni inyina,” kụ bịdi oḍuraan ọobeeph. Kụ ọdi ạḅeni bịdi mọ, “Mị ạJosef umor phọ anyina ọpo nyina aal bọ ẹphen Ijipt.

⁵Nyịidipho kẹ́eḅaghamian loor, kíbeeph esi anyina mọ nyina ịtuan ika kụ aal bọ ịmi ẹphen: ịdi eḍighi bọ Ẹnaan ịtuan ọphel asughuḍum awe, kụ ẹphur bọ ịsighe ịmi esiemi ẹphen.

⁶Sịen ịyal ạsia ịgbakuro, kụ esugha oogh ịnon ạsia dị eḍien késoor, ibugha kẹ́tol.

⁷Kụ Ẹnaan irom bọ ịmi mọ mị uḍiemi ghan bọ ẹphen, kụ nyina egbi oru, ẹrol dị mị iseleminaan inyina dọl edughom sịen aḅirini phọ, rꞌooko asughuḍum anyina, pịdi nyina ekpetenaan eḍum.

⁸Nyina kụ ịmi íḍighi, nyịna kụ ịmi ị́sighe bọ ísiemi ẹphen; Ẹnaan phọ miḍighi ịmi ọde ọdaam eelhe phọ, miseere kẹn ịmi ophogh oomo ọto kꞌọdaam eelhe phọ, mị kụ ụda oomo eelhe phọ Ijipt.

⁹“Ụgua, iḅerenu, eegborion egheel, esi ẹteeny ọde phọ ạmi, ẹḅeni nyọdi mọ, ‘ẠJosef ọony phọ ạna ạḅem ịduon, mọ Ẹnaan mẹdaami nyịno oomo areelhe phọ Ijipt. Kákim ẹda, nụun aru ụteeny ịmi.

¹⁰Nạ katugh ẹpe Gosen utuman ịmi, nạ rꞌạnmuny phọ, rꞌạnmuny ạnmuny phọ ạna, rꞌiyool-ịga phọ rꞌạrutu-ịga phọ ạna, rꞌạsinam mọ rꞌoomo aruphua phọ ạna.

¹¹Nạ katugh pạ, kụ mị aako ghan nyịna, ẹḅile bọ esugha oogh ạsia ịgbakuro, ọbo nạ rꞌọto ạna rꞌoomo aruphua phọ ạna, ekpetenaan dọl ịminimiin.’

¹²“Ịnaghan, oomo phọ anyina rꞌạna ạBenjamin ọony onhiin phọ ạmi, rẹmiin ni mọ ọkaraghi ạJosef rꞌọnhu ạmi kụ rịḅaanaan bọ ni inyina.

¹³Mesi, ịkaaph ịlo oomo arughuenian phọ ạmi ẹphen Ijipt ẹḅeni ọde phọ ạmi, rꞌoomo ịphen nyina rẹmiin bọ. Iigborion egheel ẹghi ẹsighe ọde phọ ạmi iruom.”

¹⁴Ọdi ạghi aghinighi orum ạBenjamin phọ umor phọ ọdi kụ amoghi, kụ ạBenjamin amoghi aani.

¹⁵Kụ ạkpunogh oomo phọ abumor phọ ọdi kụ ramoghi; kụ abumor phọ ọdi rꞌọdi ọghaaphan.

¹⁶Ọdu ịphen phọ ạghi ni ạteeny ọdaam eelhe phọ, kụ ọḅeni mọ abumor ạJosef moru. Kụ ẹḅeeraan ọdaam eelhe phọ rꞌawe iiḍighi phọ ọdi.

¹⁷Ọdaam eelhe phọ arom ạghiom Jọsef kụ ạḅem mọ, “Ḅẹni bumor phọ ạna mọ, ‘Ịsaany sidool phọ anyina loor ịnam adool phọ anyina egheel ẹpe Kenan,

¹⁸ẹsighe ọde phọ anyina rꞌọto anyina ẹsighe iruom. Mị kịngo inyina ẹeḍiom ade phọ Ijipt, kụ nyina ele ẹnuum ade phọ.

¹⁹Ḅẹni bịdi mọ iḍighi ịduon. Ịsighe iniin arughuugh-ude phọ edi bọ ẹphen Ijipt, ẹpham ẹghimom ẹsaanyom ịbam ạnmuny phọ rꞌạnmariir phọ anyina, ẹphamam ọde phọ anyina iruom.

²⁰Kẹ́eḅaghamian loor ịlo aruphua phọ anyina, ịdi eḍighi bọ ẹeḍiom ade phọ Ijipt ẹlo anyina.’”

²¹Ạnmuny phọ Ịzirel ụtuugh ni ịpe ọdi ạḅem bọ oḍighi. ẠJosef ạsighe rughuugh-ude phọ ạngo bịdi ịdipho ọdaam eelhe phọ ạḅem bọ, ạḅile ạngo bịdi eḍien lọ bịdi kole eten.

²²Kụ ọdi ạngo oye ye ạbidi reenmenemineen. Bẹnjamin, ọdi ạngo ịraar okuron ipoḍi asilva, rꞌoogh ọdo areenmenemineen.

²³Ọde phọ ọdi, ọdi ạngo ḍioph ịnam adool dị kọsaanyom igey ạraraar phọ edi bọ Ijipt; ạsighe ḍioph ịya ịnam adool ạsaany ịbiakpa, rꞌeḍien rꞌịnon ạraraar ịlo ọde phọ ọdi katelhiom eten.

²⁴Kụ ọdi ạḅeni bumor phọ ọdi mọ ikeel. Bịdi oḅetenu rokeel kụ ọdi ạḅeni bịdi mọ, “Kẹ́tuanagh ẹpe eten phọ.”

²⁵Bịdi ọḍua ẹpe Ijipt ogheel osi Kenan ọteeny Jẹkob ọde phọ ạbidi.

²⁶Kụ bịdi ọḅeni nyọdi mọ ạJosef odi ni ómugh, mọ ọdi kụ ạda ẹpe eelhe phọ Ijipt. Kụ oḅio ạJekob ạsalaan, ịdi eḍighi bọ ọdi ómeeraam ịpe bịdi rọkaaph bọ.

²⁷Mem dị bịdi ọghaaph oomo ịpe ạJosef ạghaaph bọ ạḅeni nyọdi, ạḅile bọ ạmiin rughuugh-ude phọ ạJosef ạngo bọ mọ oru ọsaanyom nyọdi, kụ oḅio ạJekob ọde phọ ạbidi asoor.

²⁸Kụ Ịzirel ạḅem mọ, “Mị malhegheri akuphom owol mọ ạJosef ọony phọ ạmi odi ni. Mị kạki ni ạmiin nyọdi kụ mị agbi omugh.”