Read abua Emiighom 6 Bible Online

Emiighom 6 - abua bible

Emiighom 6

¹Mem dị awe omiigh ọmaraghian omuzeḍi aḅirini phọ kụ ọmaraghiom nmạnyaan.

²Kụ buniin ạnmuny phọ Ẹnaan ọmiin ẹnighe ạnmanyaan awe ịsien aḅirini phọ kụ bịdi ọsighiogh nmạnyaan bụphe ọḅeeraan bọ bịdi ophinogh.

³Kụ Ọmoogh-we phọ ạḅem mọ, “Mị kạ́ngo mun ọgel awe ọrol kꞌagee-pọ, ịdi eḍighi bọ bịdi iphulupul. Emiigh nyịidipho kụ ẹghiom bịdi kọ́tol ghan mun opele oniin okuron rꞌịyaldi ạsia.”

⁴Riiḍio phọ ịpe phọ, kụ ọghiom kẹn ni ghisigh, ikakara awe ụrol li sịen ade phọ. Bụen phọ ẹemara ẹemara awe phọ ạnmanyaan awe ọmaraghinaan bọ nmụny phọ Ẹnaan. Bịdi kụ arephelegbe dị ooleghaan geediidi phọ.

⁵Mem dị Ọmoogh-we phọ ạmiin bọ ịdi ạsipioghom awe melheeny sịen ade phọ, ḅịle mọ ịitughian ạbidi eḍighi ịkaraph ịkaraph oomo amem,

⁶ịiḅaghami ni nyọdi ịpe eḍighi bọ kụ ọdi ạlhem bọ we aseere sịen aḅirini phọ, kụ ẹeḅaghami nyọdi iboom.

⁷Kụ Ọmoogh-we phọ ạḅem mọ, “Mị kapiemi we phọ ạbuen mị ạlhem bọ, we rꞌịnam, rꞌoomo ịpe rekuura bọ sịen ade phọ, rꞌịnun okuaḍio phọ. Mị rạkunu ni mọ mị ạtuan eeghe kụ ạlhem bọ ọnyo ạbidi.”

⁸ANoa bịn kụ aseleman risigh Ọmoogh-we phọ.

⁹Ọphon ọghaaph aNoa. Ọdi ạmar ịraar alephiri ạnmuny, ạSem, rꞌạHam rꞌaJafet. ANoa ọ́moogh esi ọḍagha ḅịle kẹn ọdi bịn kụ aḍighi ogey oye sịphe oghiil phọ ọdi. Ẹnaan rꞌaNoa uuḍikuan ni.

¹¹Kụ ọlo oomo ạbunon awe ụphu ni risigh Ẹnaan, ḅịle ọwa sighiton bịn kụ aapaany.

¹²Ẹnaan ekiton ephogh kụ ẹmiin mọ aḅirini phọ mạphu. Oomo areten awe sịen aḅirini phọ mẹphu.

¹³Kụ Ẹnaan ẹḅeni Noa mọ, “Mị magbiighi amuneni, mị kapiemi oomo awe phọ odi bọ sịen aḅirini phọ. Ọwa sighiton rꞌạraagham bịn kụ memuza sịen aḅirini phọ. Mị kapiemi bịdi rꞌaḅirini phọ.

¹⁴Sịghe ogeny oreeny ạkaam oghuugh ạna, adoghoḍi iisoph kụ ạza ạgalaga azuom kụ agbul mạyagh oreeny ologhi phọ rꞌọman phọ.

¹⁵Ịduon kụ ịdi nạ kạka bọ oghuugh phọ: ạḍidoony phọ eḍighi ịnya okuron ịraardi rꞌọphaanya ạrada, ẹreghe phọ eḍighi oḍualdi rꞌịyal ạrada, aḍiphoph phọ inyadi rꞌịraar ạrada.

¹⁶Zạ ạgalaga oghuugh phọ; kụ asugheeny eephoghi dị ẹman eniin ẹda rꞌegbem, igbo ạgalaga phọ rꞌịigaany ooghironom oghuugh phọ. Sịphe ologhi oghuugh phọ ịraar ẹedaneen kụ ẹrol. Kụ ạlogh eghuugh ọogaany phọ.

¹⁷Mị katom mụum-aḍigho ạsighe atu sịen ade phọ ophiemiom ạtorotoro ịyaar dị ẹmoogh ḍiphooghu. Tọro ịyaar sịen ade phọ kemugh ni,

¹⁸kụ ọlo mị kakiran ịyo rꞌạna. Iḍigh ologhi oghuugh phọ, nạ rꞌạnir ạna, rꞌạnmuny ạna, rꞌạnmariir ạbidi.

¹⁹Sịghe ạloghom ologhi sịphe oghuugh phọ ẹya rꞌelephiri ạtorobo ọdo ẹnam rꞌẹnun, ọbo bịdi ọtol eye.

²¹Sịghe ạloghom ọdo kịrokiro ariiḍien lọ nyina rꞌạbidi kole ghan.”

²²Kụ aNoa ạtuugh oomo ịpe Ẹnaan ẹḅeni bọ nyọdi aḍighi.