Read abua Emiighom 7 Bible Online

Emiighom 7 - abua bible

Emiighom 7

¹Ọmoogh-we phọ ạḅeni Noa mọ, “Nạ rꞌoomo ọto kꞌạna, ịki eḍigh sịphe ologhi oghuugh phọ. Mị mạwa ạmiin mọ ogina ạna bịn kụ oye sịen oghiil phọ ọphon dị raḍighi ghan ịdi ẹnighe.

²Kịa ạsighe oḍual ạtorotoro ọdo ẹnam dị eseleman, ẹya rꞌelephiri, ạḅile ạsighe ịyal ọdo ẹnam lọ íseleman, ẹya rꞌelephiri,

³ạḅile kẹn ạsighe oḍual ạtorotoro ọdo ẹnun ẹya rꞌelephiri. Ḍighi ịduon phọ ọbo tọrotoro ẹnam rꞌẹnun ẹtol dị kẹmar ẹḅile eseere sịen ade phọ.

⁴Esi oḍual aḍughul-otu mị kaseere ọlophia dị kạloph sịen aḅirini phọ inyadi aḍughul-otu. Mị kapiemi oomo ạraraar phọ ịpe ẹmoogh bọ ghuḍum mị ạlhem bọ edi bọ sịen aḅirini phọ.”

⁵Kụ aNoa ạtuugh oomo ịpe Ọmoogh-we phọ ạto bọ ạḅeni nyọdi aḍighi.

⁶ANoa mạman odiiny okuron ạsia, kụ aḍigho phọ eḍigh bọ de phọ.

⁷Ọdi rꞌạnir ọdi, rꞌạnmuny ọdi, rꞌạnmariir ạbidi kụ uḍigh bọ ologhi oghuugh phọ, okpetenaan ạmuum-aḍigho phọ.

⁸Ịnam mọ, ịpe eseleman bọ rꞌịpe íseleman bọ, rꞌịnun phọ, rꞌoomo ịpe rekuura ghan bọ sịen ade phọ,

⁹ịyal yạl ẹya rꞌelephiri, kụ iḍigh bọ sịphe ologhi oghuugh phọ ẹtuonom Noa ịdipho Ẹnaan ẹto bọ ẹḅeni nyọdi.

¹⁰Oḍual aḍughul-otu phọ reten bọ kụ ạmuum-aḍigho phọ amiigh oḍigh ookpereghiom aḅirini phọ.

¹¹Mem dị aNoa mạman odiiny okuron ạsia, ḍioph rꞌoḍual aḍughul-otu ụnwanyu dị amuneniom ịyal, oomo asikol ạmuum ọlha-ude phọ ekpuphaan, kụ arughuugh ạrunhu-aḍibuo aḍigho ẹpe kꞌạke phọ eghunyonu.

¹²Kụ ọlophia ạloph inyadi aḍughul-otu sịen aḅirini phọ.

¹³Eniin phọ aḍio phọ kụ ẹdi aNoa rꞌạnir phọ ọdi, rꞌịraar phọ ạnmuny phọ ọdi Sẹm rꞌạHam rꞌaJafet rꞌạnmariir phọ ạbidi, oḍigh bọ oghuugh phọ.

¹⁴Eḍigh aani bọ tọrobo ẹnam ẹlo orughom, rꞌịlo elegheḍum, rꞌạtorobo ẹnun, ịbam rꞌigbogh.

¹⁵Ẹya rꞌelephiri ạtorobo ịyaar dị ẹmoogh ghuḍum kụ iḍigh bọ ologhi oghuugh phọ ẹtuonom Noa,

¹⁶ịdipho Ẹnaan ẹḅeni bọ nyọdi. Kụ Ọmoogh-we phọ aghughi oghuugh phọ aNoa.

¹⁷Aḍigho phọ iru ni ẹbugh esi inyadi aḍughul-otu, kụ oghuugh phọ aphooph ạnyu ạmuum mọ.

¹⁸Kụ ạḍikel ạmuum mọ ẹbugh kụ oghuugh phọ aphooph,

¹⁹ạmuum mọ ạtophoron, ạminoghom ruugum dị ooleeny ịtol,

²⁰tụtu apeleghiom ạnyu aruugum mọ ịdi rẹkiom ni ịyaldi rꞌịraar ạrada ḍịkel.

²¹Tọrobo ịyaar dị ẹmoogh ghuḍum sịen ade phọ imugh ni; tọrobo ẹnun rꞌẹnam rꞌoye.

²²Tọrobo ịyaar dị ẹmoogh ḍiphooghu sịen ade phọ imugh ni emuneen.

²³Ọmoogh-we phọ aphiemi ni oomo ạraraar dị ẹmoogh ghuḍum sịen ade phọ: we rꞌịnam rꞌịnun. Awe dị osugha uḍighi Noa rꞌạbuphe rꞌọdi oḍigh bọ oghuugh phọ bịn.

²⁴Ạmuum mọ ómiigh osoorom tụtu ẹman oniin okuron rꞌooghdi aḍughul-otu.