Read abua Emiighom 9 Bible Online

Emiighom 9 - abua bible

Emiighom 9

¹Kụ Ẹnaan ẹseph Noa rꞌạnmuny phọ ọdi kụ ẹḅeni bịdi mọ, “Ịmaraghian ẹbughe emuzeḍi sịen aḅirini phọ.

²Oomo ịnam, rꞌịnun, rꞌina, kighiilaan ghan inyina: mị mạḅogh bịdi ạlogh ḍịghaagh anyina.

³Nyịidipho nyina ketue ni ẹba ghan bịdi, ẹḅile ele ghan oomo ịizupha. Mị mịngo inyina oomo phọ ịphen mọ eḍighi eḍien anyina.

⁴Eniin ịyaar dị nyina kẹ́ba, ẹnam dị emughom ịḅaal, mị agbi ni loor esi dị ịḅaal phọ kụ aghuḍum mọ.

⁵Tọrobo oye lọ aphiemi ghuḍum oye kọliom ni. Mị kạliomom ḍuugh tọrobo ẹnam lọ ephiemi ghuḍum oye.

⁶Tọrobo oye lọ azu ịḅaal oye, pọ ọnon oye kakiigh aani ni nyọdi, ịdi eḍighi bọ Ẹnaan ịlhem oye ẹghighima loor.

⁷“Kụ nyina, ịmaraghi emuzeḍi eleenye aḅirini phọ.”

⁸Ẹnaan ẹḅeni Noa rꞌạnmuny phọ ọdi mọ,

⁹“Mị rakiran ịyo phọ ạmi rꞌanyina, ḅịle rꞌẹemara ẹemara anyina,

¹⁰ḅịle rꞌoomo ạraraar dị ẹmoogh ḍiphooghu — oomo ịnun, rꞌịnam — rꞌạtorobo ịyaar dị ẹḍua sịphe ologhi oghuugh phọ kụ emite.

¹¹Rꞌikpo ọnhu phọ ịphen mị rakiran ịyo rꞌanyina. Mị raguanaan mọ amem kẹ́tol mun dị ạmuum-aḍigho kapiemi oomo ạraraar dị ẹmoogh ḍiphooghu; amem kẹ́tol mun dị ạmuum-aḍigho kapiemi de phọ.

¹²Ẹphen kụ eḍeenaan ịyo kꞌagee-pọ phọ mị rꞌanyina rekiran bọ rꞌoomo ịpe ẹmoogh aani bọ ḍiphooghu.

¹³Mị raseere ghozogh oburukeeny ẹpe ạnyu okuaḍio phọ. Ọdi kaḍighi eḍeenaan ịyo phọ ạmi rꞌaḅirini phọ.

¹⁴Tọrobo amem lọ mị ạsighe ọotu aakpereghiom okuaḍio phọ kụ aghozogh oburukeeny phọ amite,

¹⁵bịn mị mạatughian oguanaan phọ ạmi esi anyina rꞌịnam mọ mꞌaḍigho képiemi mun oomo ạraraar phọ ịpe ẹmoogh bọ ḍiphooghu.

¹⁶Mem lọ aghozogh oburukeeny phọ amite ẹpe okuaḍio phọ mị kạmiin ni kụ mị ạatughian ịyo kꞌagee-pọ phọ mị aghiran bọ rꞌoomo ạraraar dị ẹmoogh ḍiphooghu.

¹⁷Ẹphen phọ kụ eḍeenaan oguanaan phọ ạmi esi oomo ạraraar dị ẹmoogh ḍiphooghu.”

¹⁸Bụen kụ ạnmuny phọ aNoa omite bọ sịphe oghuugh phọ: ạSem rꞌạHam rꞌaJafet. ẠHam kụ ọde aKenan.

¹⁹Ịraar phọ ạnmuny phọ aNoa ạbuen phọ kụ ạburude ạburude oomo awe phọ odi bọ sịen aḅirini phọ.

²⁰ANoa aḍighi oḅephom ozo. Ọdi kụ ọḅel oye dị ạzuph ireeny avain.

²¹Mem dị ọdi mạphughol miim dị aghiigh nyọdi, ọdi ạkatanaan ukpe ọdi ạrol ẹdaḅa ologhi otu ọdi,

²²Mem dị ạHam ọde phọ aKenan ạmiin bọ mọ ọde phọ ọno odi ẹdaḅa, ọdi ạghi kụ ạḅeni ịyal phọ abumor phọ ọdi.

²³Kụ ạSem rꞌaJafet ọghi ọsighe ukpe kụ ọpham ọpha ạbidi kụ orelhiom ẹgum ọman ọghi sịphe otu phọ kụ ozuom ọde phọ ạbidi. Bịdi ụgbole ni sighisigh ạbidi ọbo bịdi kọmiin ghan bọ ẹdaḅa ọde phọ ạbidi.

²⁴Mem dị aNoa malhoghoma loor, kụ alegheri ịpe emite bọ rꞌịpe ọkaraghi ọbam ọony phọ ọdi aḍighi bọ nyọdi,

²⁵ọdi ạḅem mọ, “Itulughian ẹrolonaan Kenan. Ọdi kaḍighi ẹbene abumor phọ ọdi.

²⁶Iboom ni Ọmoogh-we Ẹnaan phọ ạSem, aKenan kụ kaḍighi ẹbene ạSem.

²⁷Ẹnaan eḍume bụo Jafet! Ẹemara ẹemara ọdi orughan rꞌawe ạSem! AKenan kụ kaḍighi ẹbene aJafet.”

²⁸Aḍigho phọ eru bọ eten, aNoa ạḅile ạrol ịraar okuron rꞌooghdi ạsia,

²⁹ọḅar ọḅophoghi aNoa ạrol esugha okuron rꞌooghdi ạsia kụ agbi omugh.