Read abua 2 Sạmuel 1 Bible Online

2 Sạmuel 1 - abua bible

2 Sạmuel 1

¹ẠSol romugh bọ kụ aDevid arigheel esi ẹgham mọ ọdi ạghi bọ kụ ạkpar bọ apu weye Ạmalek phọ, kụ ọdi ạrol esi Zịklag ịyal aḍughul-otu.

²Aḍio dị etum pạ kụ oniin onyugheel ọony ạḍua ẹpe amarugh ẹgham mọ ạSol aru. Esi oḍeenaan ịpe rẹeḅaghami bọ nyọdi, ọdi mạphanyi rukpe phọ, ọdi ạḅile ạsighe ịikpelem agbula ẹmhu ọdi. Kụ ọdi ạghi ạteeny Devid kụ azuman asi ude ọngo arughuenian.

³Kụ aDevid apuru nyọdi mọ, “Nạ ụḍua ẹghen kụ ratu bọ?” Kụ ọdi ạphagharanaan mọ, “Mị ụḍua marugh ẹgham Ịzirel kụ mị asuma.”

⁴Kụ aDevid ạḅeni mọ, “Ụḅeni ịmi ịpe emite bọ.” Kụ ọdi ạphagharanaan mọ, “Awe ẹgham mọ ayira mosumughu ẹpe. Mọze ịbadi awe ayira. Okiighom Sọl, ḅịle kẹn rꞌọony phọ ọdi Jọnatan.”

⁵ADevid apuru mọ, “Nạ uḍighi ika kụ alegheri bọ mọ ạSol rꞌạJonatan momugh?”

⁶Kụ ọdi ạphagharanaan mọ, “Iizuanaan dị mị ạrol ẹpe eegbolom mọ aGilboa, kụ mị ạmiin dị ạSol ạminanam ọsoph phọ ọdi sịphe phọ, kụ ẹpomoghian phọ bụdi oḍiku rughuugh ẹgham rꞌawe dị rokiilom rụsu mọghi ọkpaariom nyọdi.

⁷Kụ ọdi aaghiraan kụ ụmiin ịmi, kụ ụmagh ịmi. Kụ mị ameera mọ ‘Ii, oye phọ.’

⁸Kụ ọdi upuru ịmi mọ, ‘Nạ ạnhian?’ Kụ mị ạḅeni nyọdi mọ, ‘Mị ọlo ẹpe Ạmalek.’

⁹Kụ ọdi ạḅem mọ, ‘Tue ẹphen ughiigh ịmi! Bịdi muḍighi ịmi eboom ịyaar, kụ mị rạwa omugh.’

¹⁰Kụ iḍighi kụ mị ạghi ạteeny nyọdi, kụ mị aghiigh nyọdi, ịdi eḍighi bọ mị ulegheri ni mọ ọdi kamugh ni mem mọ ọpo ọdi ameelom bọ ọsoph phọ. Kụ mị ạsighe eghoony ọdaam ẹmha phọ sịphe ẹmhu phọ ọdi, ḅịle rꞌokuughaam sịphe ạḍighaagh phọ ọdi, kụ aruom nyịna, oye phọ.”

¹¹ADevid ạphanyi ni ạsuoma phọ ọdi loor esi ọto, ḅịle oomo phọ awe phọ ọdi uḍighi aani kẹn iniin phọ.

¹²Kụ bịdi okururu yogh kụ ọrolom rꞌizin ọḅile ọkaagh ẹḍogh tụtu kꞌadulhe loor ẹmhu ạSol rꞌạJonatan rꞌỊzirel, awe Ọmoogh-we phọ, loor esi dị mọze ịbadi ẹpe ẹgham mọ.

¹³Kụ aDevid apuru ọony phọ aru bọ ạghaaph ọghaaph phọ mọ, “Nạ ọlo ẹghen?” Kụ ọdi ạphagharanaan mọ, “Mị ọlo Ạmalek, kụ ọlo mị odi ghan sịen ẹmha phọ anyina.”

¹⁴ADevid apuru nyọdi mọ, “Iḍighi ika kụ nạ arue bọ ni bịn aghiigh ọolha-ẹmha dị Ọmoogh-we phọ kụ ạsaḅar?”

¹⁵Kụ aDevid ạmagh oniin oye phọ ọdi kụ ạḅeni mọ, “Kiigh nyọdi.” Kụ oye phọ ọphon aben oye ọlo Ạmalek phọ ẹlem aḍuugh-aḍuugh.

¹⁶Kụ aDevid ạḅeni oye ọlo Ạmalek phọ mọ, “Nạ kụ ụsighe ni ịphen phọ ạngo loor phọ ạna. Nạ kụ usoph ni ọoruen phọ aphume loor phọ ạna mem mọ nạ ameera bọ mọ nạ kụ ughiigh oye phọ Ọmoogh-we phọ kụ ạsaḅar bọ mọ aḍighi ọolha-ẹmha phọ.”

¹⁷ADevid ạmoor ḍụor emoghi phọ ạḍien loor ẹmhu ạSol rꞌọony phọ ọdi ạjonatan.

¹⁸Kụ aDevid ạto mọ ọtughemi ḍụor phọ we phọ aJuda. (Ọge ni ọlogh sịphe ạḍinya ạJasar.)

¹⁹“Ạnyu aroogbolom mọ Ịzirel kụ ẹdi abuḍiemiom mọ ayira omugh bọ! Ọkaraghi arephelegbe awe ẹgham mọ ayira momeel!

²⁰Kẹ́kaaph ghan ịphen phọ ẹḅeni Gạt mụghumo ẹpe areten Askelon. Kéḍighi ịdi iloghi ạnmariir phọ aFilistia kẹḅaalogh; ọbo ạnmanyaan ạbuo eḍuna phọ kọsar ghan bọ igiri!

²¹“Ọlophia rꞌooto kúsoor mun roogbolom aGilboa, iizo ọdi kíḍum mun! Loor esi dị ịsuaram ạruukpara phọ emeleghu sịphe aafola; ọsuaram mọ ạSol úgbul mun elho.

²²“Ạkumugh phọ ạJonatan aḍighi ni ịyaar aḍuugh-aḍuugh. Elhool ẹgham mọ ạSol ị́moogh ghan ọnma ighirigiir, iben ghan ọokpara bịn eler, eghiigh ghan ẹpomoghian phọ.

²³“ẠSol rꞌạJonatan, ịikia ịma awe dị ọphomoghian. Bịdi ụḅoph ni ọrol, ọḅoph omugh; ukem ghan opu uga, ọkpar opu ạnam-dịka.

²⁴“Nmạriir Ịzirel, imoghi ni Sọl; ọdi ịkpologhi ni inyina igey ịtogh-tọgh ạrusuoma, ạḅile iinmenemiom inyina ịbekulari rꞌasigol.

²⁵“Arephelegbe awe ẹgham mọ momeleghu, mọze bịdi erugh ẹgham, ẠJonatan ạmina dị moghiigh ẹpe aroogbolom mọ.

²⁶“Mị ramoghinaan ni nyịna, Jọnatan umor phọ ạmi. Nạ ụman ni mạar iboom esi ạmi, Ẹpe ẹghen ẹekia ẹphomoghian dị nạ ạmoogh esi ạmi, ịnighe epu ẹphomoghian ạnmariir.

²⁷“Arephelegbe awe ẹgham mọ momeleghu, motebeneghi reenema ẹgham mọ ạbidi bịn ị́moogh mun ịyaar oḍighinom.”