Read abua 2 Sạmuel 10 Bible Online

2 Sạmuel 10 - abua bible

2 Sạmuel 10

¹Ịphen phọ reru reten kụ aNahas ọdaam mọ Amon amugh kụ aHanun ọony ọdi aḍighi ọdaam.

²ADevid ọdaam mọ ạḅem mọ, “Mị kạtolom ni ḍigey ạdol Hanun ọony phọ aNahas, ịdipho esi aḍuugh ọde phọ ọdi ụrolom bọ ịmi ḍigey ạdol.” Kụ iḍighi kụ aDevid arom butelhedom mọ ọdi mọ ọghi ọodereghi nyọdi loor ọde phọ ọdi. Mem dị bịdi ọghi bọ osi Amon,

³abuḍiemiom awe phọ Amon ọḅeni ọdaam mọ mọ, “Nạ ragbiom ghan mọ esi arughuenian ọde phọ ạna kụ ẹdi aDevid arom bọ weye phọ ạbuen mọ oru ọḅeni nyina mọ oloḍio phọ ḍụghum? Kị́dipho. Ọdi atom weye phọ ạbuen phọ mọ oru oḅiligha ọmiin ịlo ẹmha phọ edi, pịdi atu uzuom iyira ẹgham akpobiom.”

⁴Kụ aHanun asiphi butelhedom mọ aDevid, ạboor ḍiniin ạḍighaagh ọleem mọ ạbidi, kụ aagbo ogboku ạrusuoma phọ ạbidi asiemi ẹphen ude kụ ạḅeni bịdi mọ ogheel.

⁵Bịdi útue úsi ologhi otu esi umugholoor. Mem dị aDevid ạnaghan bọ ịphen memite bọ, ọdi arom ni dom mọ bịdi ọrol ẹpe Jeriko mọ kútigheel tụtu ạreleem mọ ạbidi ẹḅile esiighi.

⁶Awe phọ Amon uloghoma ni mọ bụno mọpioman ropur ẹkaraph eḍu esi aDevid, kụ iḍighi kụ bịdi ọghi ophir ịyaldi ọonir awe ẹgham bụo ạSiria ẹpe Betrehob rꞌaZoba, ḍioph rꞌịyal ọonir bụo ẹpe Tob, ḅịle kẹn kꞌọdaam Maaka ophir oniin ọonir awe.

⁷ADevid ạnaghan ni ịphen phọ kụ arom Joab rꞌoomo awe ẹgham mọ ọdi mọ ọghi eenan rꞌạbidi.

⁸Awe phọ Amon ugbiriph ni ọghi ọsighe dọl ạbidi ẹpe eḍighom ẹmha phọ aRaba, ẹkpana ẹmha phọ ạbidi, kụ ạbueri phọ, bụphe ọḍua bọ Sịria ḅịle rꞌawe phọ ạbuphe aTob rꞌaMaaka, ọsighe dọl ạbidi ẹpe ẹyaghaghaany esi.

⁹AJoab ạmiin ni mọ awe ẹgham ẹpomoghian phọ ạbuno kọḍua risigh rꞌọman kụ otu ozuom ạbuno ẹgham mọ, kụ ọdi ạson ọkar igey awe ẹgham mọ Ịzirel kụ asereghi riisi dị ẹkar ẹda weye ạSiria.

¹⁰Kụ ọdi ạsighe bụeri phọ asita awe phọ ọdi ạḅogh ạlogh ḍịghaagh Abisai umor ọdi, kụ Abisai ạsighe bịdi asereghi riisi dị ẹdaanaan rꞌawe Amon phọ.

¹¹AJoab ạḅeni nyọdi mọ, “Eḍighi ịyaar dị nạ ạmiin mọ awe ạSiria phọ mọkpar rupu ịmi, pọ tue ụlhoghonaan ịmi ḍịghaagh, ḅịle kẹn eḍighi ịyaar dị awe phọ Amon mọkpar ropu nyịna, pọ mị katu ni ạloghonaan nyịna ḍịghaagh.

¹²Mạar ạkpar ḅịle kẹn kákiil eepuph. Yira kobe ni rꞌịikpo, loor ẹmhu awe phọ ayira rꞌạramha phọ Ẹnaan phọ ayira. Ọmoogh-we phọ aḍighi ni ịpe ẹnighe bọ esi ọdi!”

¹³AJoab rꞌawe phọ ọdi oḍuraan ọobeeph ozuom ẹgham, kụ awe phọ ạSiria osumughu ọḍua egbodo ọdi.

¹⁴Mem dị awe phọ Amon ọmiin mọ awe ạSiria phọ rokiil kosumughu, bịdi kẹn oghiilaan Abisai osumughu oḅula ẹpe ẹmha phọ. Kụ aJoab aḅula ạghi ẹpe Jeruselem.

¹⁵Awe phọ ạSiria uloghoma ni mọ awe Ịzirel phọ mọkpar opu bụno, kụ bịdi ọmagh oomo awe ẹgham mọ ạbidi ookpomoghi.

¹⁶AHadadezer ọdaam mọ ạmagh ni weye phọ ạSiria phọ bụphe ọrol bọ ẹpe Ọphiiny aYufratis ḍịghaagh phọ ạḍiphe erumuḍio phọ remite ghan bọ kụ bịdi oru osi Helam ọdaph ghan ịtooghi aSobak, uwo ẹmhu awe ẹgham aHadadezer ọdaam mọ aZoba.

¹⁷Kụ mem dị ọghaaph bọ ịphen phọ ọḅeni Devid, ọdi aakpomoghi ni oomo Ịzirel egina esi; kụ ọḅeeny Jọdan ophun, kụ ogbiriph ọghi osi Helam; ịpa phọ kụ ẹdi awe phọ ạSiria ọsighe sịdol osoman nyọdi. Elephiri phọ emiigh

¹⁸kụ ạbuo ẹgham Ịzirel phọ ophorogh we ẹgham ạSiria oḅulemi ọman. ADevid rꞌawe ọdi ụze oḍual okuron awe ạSiria bụo oghiilom arughuugh-ude ḅịle rꞌinyadi ọonir awe dị rokiilom ghan ạsu. Bịdi uḍighi ni ịyaar Sobak uwo ẹmhu awe ẹgham ạSiria kụ ọdi amugh ni ẹpe erugh ẹgham mọ.

¹⁹Mem dị ạbudaam mọ ạbuphe ọrol ghan bọ eeḍian aHadadezer ologhoma bọ mọ awe Ịzirel mọkpar opu bụno, bịdi ọwa ẹepho esi aDevid kụ ọrolan ghan eeḍian ọdi. Bịn awe ạSiria oghiilaan ọḅile ọloghonaan ạḍighaagh weye phọ Amon.