Read abua 2 Sạmuel 13 Bible Online

2 Sạmuel 13 - abua bible

2 Sạmuel 13

¹Ạbsalom ọony phọ aDevid ạmoogh ni umor ạnir-ephoph dị ạnighe iboom kụ ilhom kạ̋al kụ oghol mọ ạTamar. Amnon, ọnon ọony aDevid, ạphomoghian ọnyani phọ.

²Loor esi ẹphomoghian phọ ọdi ạmoogh bọ esi ọnyani phọ, kụ ọdi ạrol émoon, loor esi dị ọdi agbiighi bọ ịlo ọteeny ọnyani phọ ọrolan esi ị́tol; ịdipho ọnyani phọ aḍighi bọ esina, úmeera ghan mọ ọdi atuman lephiri ạnmuny.

³Kụ ọlo ọony phọ ạmoogh ni ọyaghiri dị ạsu ologhi iboom, dị oghol mọ ạJonadab, ọony umor aDevid dị oghol mọ Sama.

⁴ẠJonadab ạḅeni Amnon mọ, “Nạ kụ ọony ọdaam mọ kụ tọrotoro aḍio mị rạmiin ghan dị nạ rạkooraan amiteghu ịduon. Eeghe kụ ịiḅaghami phọ?” “ẠTamar ụḅeeraan ịmi, umarani Ạbsalom ọony ọde phọ ạmi.”

⁵ẠJonadab ạḅeni nyọdi mọ, “Kue bịn ạḅem mọ aloor ạna ị́nighe bịn ạghi ạmina. Mem lọ ọde phọ ạna aru ophogh ạna, ḅẹni nyọdi mọ, ‘Seseeny, ḅẹni umarani phọ ạmi mọ ọdi aru ụngo ịmi eḍien. Mị rạwa mọ ọdi aru sịen kụ ạsa pịdi mị ạmiin ghan nyọdi, ḅịle ọdi kẹn kụ ạḅamaghi kụ mị ale.’”

⁶Kụ iḍighi kụ Amnon akue bịn mọ aloor ọno ị́nighe bịn ạghi ạmina. ADevid ọdaam mọ ạghi ophogh ọdi, kụ Amnon ạḅeni nyọdi mọ, “Seseeny meera ạTamar aru sịen mị rạmiin bọ, ụsaanaan ịmi eḍien, kụ ọdi rꞌaloor ụḅamaghinaan ịmi eḍien phọ.”

⁷Kụ iḍighi kụ aDevid arom ọghi ẹpe otu ọdaam mọ ọḅeni Tạmar mọ, “Kịa ẹpe otu phọ Amnon ạsaanaan nyọdi eḍien.”

⁸Ọdi aten ạghi kụ ạmiin dị oye phọ ạmina sịphe ẹmina phọ. Kụ ọnyani phọ ạsighe eḍien ạmeeny aghum ạḅologh sịphe risigh ọdi kụ ạsighe ạgbaghaḍi. Kụ ọnyani phọ rọsa rọmadan

⁹kụ ạsighe ạsagharan esi kụ ạngo mọ ọdi ale, kụ ọlo ọdi ómeera ole. Kụ ọdi ạḅeni ọnyani phọ mọ porogh oomo awe lọ odi sịen phọ, kụ oomo phọ awe phọ ogheleghu.

¹⁰Kụ ọdi agbi nụun ọḅeni ọnyani phọ mọ, “Sịghe eḍien phọ aru sịen ẹmina phọ ạmi kụ ụngo ịmi rꞌaloor ạna.” Ọnyani phọ ạsighe eḍien phọ ạghi ạteeny nyọdi.

¹¹Ịdipho ọnyani phọ asele bọ eḍien phọ ạngo nyọdi, bịn ọdi asiph ọnyani phọ kụ ạḅeni mọ, “Tue ọrolan esi.”

¹²Kụ ọnyani phọ ómeera mọ, “Eeye, ịmi kụ́kpaariom oḍighi ịyaar dị eeph ịdipho! Ịpe phọ ebeeph ni iboom!

¹³Kụ umugholoor nyọon ạmi mịna kạsighe ạki ẹghen? Kụ nạ — nạ kạkaraghi ni kụ amutonaan eephoogh sịen Ịzirel. Seseeny, ḅẹni ọdaam mọ loor esi dị ọdaam mọ ịmi kúmirighan mọ mị kutu.”

¹⁴Kụ ọlo ọdi ọ́naghanan ọnyani phọ; kụ loor esi dị ọdi kụ ạkpar bọ ịikpo apu ọnyani phọ, ọdi aḅol li ọnyani phọ abiighi.

¹⁵Ẹpe kụ esi dị Amnon ạlogh ḍien ọnyani phọ ateneghi; kụ ạmulogh-ḍien phọ dị ạlogh bọ ọnyani phọ apu ịpe ọdi ạphomoghian bọ nyọdi, kụ Amnon ạḅeni ọnyani phọ mọ, “Mite sịen!”

¹⁶“Eeye,” ọnyani phọ ạphagharanaan. “Ophorogh ạmi ịduon phọ ebeeph ghụn epu ịphen pụruku nạ aḍighi bọ!” Kụ ọlo Amnon ọ́naghanan ọnyani phọ;

¹⁷ọdi ạmagh otelhedom ọdi kụ ạḅeni mọ, “Sịghe ọnyani phọ ọphon amitiom ẹpe mị kụ́miin mun nyọdi! Siph amitiom ẹpe ạkasi eghuugh phọ.”

¹⁸Otelhedom mọ asiph ọnyani phọ amitiom kụ ạkasi eghuugh phọ. ẠTamar ạkpologhian ghan ọodoony ạsuoma dị ạmoogh ịidoony ạraghaagh; ịphen kụ iinmenan ạnmanyaan ọdaam lọ ilhom kạ̋al mem mọ ọpo phọ.

¹⁹Ọnyani phọ ạsighe ọoru kụ agbula ẹmhu ọdi, ạphanyi ọodoony ạsuoma phọ dị ạkpologhian bọ, aroola rạghaagh ọdi ẹmhu, kụ amite amoghi rakeel.

²⁰Mem dị Ạbsalom umor phọ ọdi ạmiin bọ nyọdi, apuru ni mọ, “Amnon mophogh iniin aḍighi nyịna ḍụghum? Seseeny ni, umarani ạmi, ịphen phọ nyịna kị́iḅaghami iboom. Ọdi phọ ọony ọde ạna, kụ iḍighi kụ kạ́ḅeni oye ịphen phọ!” Kụ ạTamar arugh ḍịo ọdi, dịadi ạnir lọ oseere sịphe otu Ạbsalom umor phọ ọdi.

²¹Mem dị aDevid ọdaam mọ ạnaghan bọ ịphen emite bọ, iphin ni ologhi ọdi iboom.

²²Kụ Ạbsalom ạlogh ḍien Amnon iboom loor esi ịduon ọdi abiighi bọ Tạmar umarani phọ ọdi dị tụtu bịdi ụ́ḅaanaan ghan.

²³Ịyal ạsia reten kụ Ạbsalom ạmoogh we dị rokulogh ghan suphuugh iyool-ịga ọdi ẹpe Baal Hazor, etuman ẹmha phọ Ifraim, kụ ọdi ạmagh aani oomo phọ ạnmuny ọdaam mọ mọ ọghi aani.

²⁴Ọdi ạghi ạteeny Devid kụ ạḅeni mọ, “Ogbogh Ọdaam, mị rakulogh suphuugh iyool-ịga phọ ạmi. Nạ rꞌawe ịtooghi phọ ạna kotue ni otu aani ole ẹyaal phọ ḍụghum?”

²⁵“Eeye, mọony ạmi,” ọdaam mọ ạphagharanaan. “Adool phọ kẹpughan ni eḍighi ịyaar dị oomo ayoor kụ oru.” Ạbsalom ạkpaariom ni, kụ ọlo ọdaam mọ ómeera, kụ ọdi ạḅeni Ạbsalom mọ ạḍua.

²⁶Kụ ọlo Ạbsalom ạḅem mọ, “Ẹnighe ni-aa, kụ ghạlamo ịduon phọ ni, nạ kameera ni umor phọ ạmi Amnon aru ḍụghum?” Ọdaam mọ apuru mọ, “Kạtuan eeghe kụ atu bọ?”

²⁷Kụ ọlo Ạbsalom ạaḅereghian ni tụtu aDevid ameera mọ Amnon rꞌoomo phọ ạbueri phọ ạnmuny phọ ọdi ọdaph Ạbsalom ọghi. Ạbsalom aakolobian igoni dị ẹkpianaan ọko ọdaam

²⁸kụ ọdi ạḅeni butelhedom ọdi mọ, “Ịmaar egon mem lọ Amnon mạphughol miim dị mạphughan, kụ mị rọto rịḅeni inyina bịn eghiigh nyọdi. Kékiilaan. Mị katool li ịiḅaghami lọ eru rꞌaloor ạmi. Ịmoogh ạkpo ologhi. Képogh ọman!”

²⁹Kụ iḍighi kụ abutelhedom mọ ọdaph ịpe Ạbsalom ạḅeni bọ bịdi kụ oghiigh Amnon. Oomo ạbueri phọ ạnmuny phọ aDevid uḍiku ni ịnam adool ạbidi kụ osumughu.

³⁰Mem dị bịdi odi eten dị rokeel otu, ụḅeni ni Devid mọ, “Ạbsalom mạze oomo ạnmuny phọ ạna — rꞌoniin ósugheeny!”

³¹Kụ ọdaam mọ aḅetenu ạmeera, ạphanyi ạsuoma ọdi loor esi ọto, kụ aḅololo ude. Abutelhedom dị ọrol sịphe rꞌọdi ụphanyi aani kẹn ni rụsuoma ạbidi.

³²Kụ ọlo ạJonadab, ọony umor aDevid dị oghol mọ aSama, ạḅem mọ, “Nạ Ogbogh Ọdaam, ụ́ze oomo ạnmuny phọ ạna. Amnon bịn kụ amugh. Nạ aphogh Ạbsalom nạ katue ni alegheri mọ ọdi ạnya ni oḍighi ịphen phọ emiigh mem mọ ọpo Amnon abiighi umarani phọ ọdi Tạmar.

³³Kụ iḍighi kụ kámeeraam ọghaaph phọ ọḅem bọ mọ oomo ạnmuny phọ ạna momuughu; ogina Amnon bịn kụ ẹdi oghiigh.”

³⁴Mem mọ ạmuphe phọ Ạbsalom masuma. Pọ kụ amem dị oye ẹgham dị rakori bọ ẹmha phọ ạmiin ḍigbogh aḍita awe dị ọḍua ẹpe eten aHoronaim ẹpe eegbolom mọ kụ osoor rotu kụ ọdi ạghi ạteeny ọdaam mọ kụ ạḅeni ịpe ọdi ạmiin bọ.

³⁵ẠJonadab ạḅeni Devid mọ, “Bụphe phọ rotu bọ ạnmuny phọ ạna phọ ni, ịdipho mị ạḅem bọ mọ bịdi kotu phọ.”

³⁶Ọdi rạmadan bọ ọghaaph phọ bịn, ạnmuny phọ aDevid oru osi; bịdi owagharan romoghi, ḅịle kẹn aDevid rꞌawe ịtooghi phọ ọdi romoghi aani.

³⁷Ạbsalom asuma ni ạghi ạteeny ọdaam mọ aGesur, Talmai ọony Amihud, kụ ọdi ạrol ẹpe phọ ịraar ạsia. ADevid amoghi mọony phọ ọdi ọphon phọ ebia iboom,

³⁹Kụ uwaloor aDevid ọdaam mọ ạatughian ghan ịlo ọghi ọtuonom Ạbsalom. Kụ rọodereghi ghan nyọdi ịlo aḍuugh phọ Amnon, kụ ạri ọdi mamugh.