Read abua 2 Sạmuel 17 Bible Online

2 Sạmuel 17 - abua bible

2 Sạmuel 17

¹Íbia ịpe phọ eten bọ bịn Ahitofel ạḅeni Ạbsalom, “Meera mị ụson ḍioph rꞌịyal ọonir awe, kụ ḍughul phọ arodon mị kamite ophorogh aDevid.

²Mị kazuom nyọdi ẹgham sịen aloor phọ ọdi medugh bọ ḅịle kẹn ologhi phọ ọdi maḅonyonu bọ. Aruugu kasiph ni nyọdi, ḅịle kẹn oomo awe phọ ọdi kosumughu ni. Mị kakiigh ọdaam mọ bịn,

³kụ mị ạsighe oomo awe phọ ọdi ạsighe aruom nyịna, ịdipho ạnir dị ratigheel kꞌolhom ọdi. Nạ rạwa oghiigh oniin oye bịn ịyaar kéḍighi bụeri phọ awe phọ.”

⁴Ịphen phọ ịghigh ni ogey oroma esi Ạbsalom rꞌoomo abuḍiemiom mọ Ịzirel.

⁵Kụ Ạbsalom ạḅem, “Nyịidipho ịmagh Husai, ọḅile ọnaghan aani ịlo ọdi ạḅem.”

⁶Mem dị aHusai aru bọ asi, Ạbsalom ạḅeni nyọdi, “Ọphon kụ oroma dị Ahitofel mụngo iyoor; yoor ọdaph ni ḍụghum? Eḍighi ịyaar dị nạ ạḅem mọ kụ́daph, pọ ụḅeni iyoor ịlo ẹkpe oḍighi.”

⁷Kụ aHusai ạphagharanaan, “Oroma phọ Ahitofel ạngo bọ nyịna egi phọ ẹphen ọ́nighe.

⁸Nạ alegheri ni mọ ọde phọ ạna Devid rꞌawe phọ ọdi oḍighi ni rephelegbe-ẹgham, ḅịle kẹn bịdi ọgam ịdipho onhiin ootiir dị momi nmụny phọ ọdi. Ọde phọ ạna ogbaany oye ẹgham ḅịle kẹn ọdi rạ́tolan ghan rꞌawe phọ ọdi mem aḍughul.

⁹Ịduon phọ nyịidipho phọ iini ọdi ạbooghian epogh eegum mụghumo ẹnon esi. Ịduon phọ aDevid kazuom bọ weye phọ ạna, tọrotoro oye lọ ạnaghan kạḅem ghan mọ ọdi mạkpar apu weye phọ ạna.

¹⁰Bịn ghạlamo arephelegbe phọ ạbuphe rókiilaan ghan bọ ịyaar ịdipho ạnam-dịka, bịn kokiilaan ni loor esi dị tọrotoro oye sịen Ịzirel alegheri ni mọ ọde phọ ạna ogbogh oye ẹgham ḅịle kẹn awe phọ ọdi ịgbagara awe ẹgham.

¹¹Oroma ạmi ạḅem mọ kpookpomoghi oomo Ịzirel esi, bịdi omuza ịdipho ịikpelem ọgbal ọphiiny, kụ nạ rꞌaloor aḍiemiom bịdi ạghi ẹgham mọ.

¹²Yira kọwa ni ọmiin Devid tọrotoro esi lọ ọdi odi, kụ ozuom nyọdi ẹgham ekperenom. Ọdi rꞌoomo awe phọ ọdi rꞌoniin yira rósugheeny.

¹³Eḍighi ịyaar lọ ọdi aghiil aḍigh ẹmha, awe phọ ayira kọki ọsighiogh iḍigh kụ ọkpooghi ẹmha phọ ọkogh osumeeny eḍiiny. Rꞌeniin ịyaar kósugheeny sịphe eegbolom mọ.”

¹⁴Ạbsalom rꞌoomo awe phọ Ịzirel ọḅem, “Oroma phọ aHusai kụ ạnighe apu nyọpo Ahitofel.” Ọmoogh-we phọ magbiighi ni amuneni mọ kụ́daph oroma phọ Ahitofel, pịdi ịkaraph esoroghuom Ạbsalom.

¹⁵Pọ kụ amem dị aHusai ạḅeni riil ạrikia phọ Zẹdok rꞌẠbayata ọdo oroma phọ ọdi mạngo bọ Ạbsalom rꞌabuḍiemiom mọ Ịzirel, ḅịle kẹn rꞌoroma phọ ọpo Ahitofel ạngo bọ.

¹⁶Kụ aHusai ạloghom, “Ikem nyịidipho! Itom dom ẹghiomonaan Devid ẹḅeni mọ ọdi kụ́mina sịphe esiḍia phọ rọḅeenye ghan bọ weye phọ ẹpe ẹdala phọ, ọdi ạḅeeny Jọdan phọ egina amem, pịdi kosiph ghan bọ nyọdi rꞌawe phọ ọdi ọze.”

¹⁷Ọony phọ Ạbayata Jọnatan rꞌọony phọ ạZedok Ahimaaz ukori ghan ni sịphe okol ạmuum mọ En Rogel, ẹpe ọgbal ẹmha phọ aJeruselem, loor esi dị bịdi ụ́wa mọ aweye ọmiin bụno sịphe ologhi ẹmha phọ. Ọnyani-otu ạghi ghan ni oomo amem ạḅeni bịdi ịlo remite, kụ bịdi ọki ọḅeni Devid ọdaam mọ.

¹⁸Kụ ọlo eniin aḍio oniin ọony ạmiin bịdi, bịn ạghaaph ạḅeni Ạbsalom; kụ iḍighi kụ bịdi oogborion ọghi ạaghian kꞌoniin oye ẹpe Bahurim. Oye phọ ạmoogh ni ghuḍia dị atuman otu phọ ọdi, kụ bịdi osoor ologhi aghuḍia phọ.

¹⁹Kụ ạnir oye phọ ạsighe ekpereghi, akpereghiom ọnhu aghuḍia phọ bịn ạsighe ikpo ịbiakpa ạatarion sịphe ekpereghi phọ, pịdi oye kálegheri ghan bọ.

²⁰Awe ịtooghi phọ Ạbsalom oru osi sịphe otu phọ kụ opuru ạnir phọ, “Ahimaaz rꞌạJonatan odi ẹghen?” “Bịdi mọḅeeny ọphiiny phọ,” ạnir phọ ạphagharanaan. Awe phọ ụwa ni bịdi kụ ụ́miin, kụ bịdi oḅula ẹpe Jeruselem.

²¹Bịdi rọḍua, kụ Ahimaaz rꞌạJonatan ophunughu sịphe aghuḍia phọ kụ ọghi ọghaaph ọḅeni Devid ọdaam mọ. Bịdi ọḅeni nyọdi ịpe Ahitofel magbiighi bọ oḍighi ọdi kụ bịdi ọḅem, “Kem ạḅeeny ọphiiny phọ.”

²²Kụ iḍighi kụ aDevid rꞌawe phọ ọdi omiigh ọḅeeny ọphiiny phọ ạJodan, kụ tụtu rẹḅaal bọ oomo ạbidi mọḅeeny.

²³Mem dị Ahitofel ạmiin bọ mọ oroma phọ ọno ụ́sighe phọ, ọdi ạsighe ẹnam adool ọdi bịn aḍigh bịn agheel ẹmha ạbidi. Ọdi rọḅoonomi rạraar ọdi bịn ạghi asina. Uḍi ni nyọdi sịphe oḍi eghun phọ.

²⁴Amem mọ aDevid masi bọ ẹpe Mahanaim iḍighi amem dị Ạbsalom rꞌawe phọ Ịzirel mọḅeeny Jọdan phọ.

²⁵(Ạbsalom mạsighe Amasa aḍighi oḍiemiom ẹgham ạsighe esi phọ aJoab. Amasa phọ aḍighi ọony ạJeter ọlo kꞌỊsmael; onhiin phọ ọdi ughol mọ Abigel, ọnyani aNahas ḅịle rꞌumarani onhiin phọ aJoab dị oghol mọ aZeruya.)

²⁶Ạbsalom rꞌawe phọ ọdi udoghoḍi rugbogo ẹgham ẹpe ade phọ ạGiliad.

²⁷Mem dị aDevid asi bọ ẹpe Mahanaim, awe phọ ạbuen kụ ụghi ọteeny nyọdi: aSobi ọony aNahas ọlo ẹmha phọ aRaba ẹpe eelhe Amon, rꞌaMakir ọony Ạmiel ọlo ạLodebar, rꞌaBazilai ọlo aRogelim ẹpe Gịliad,

²⁸Bịdi ụsighe oruomonaan Devid rꞌawe phọ ọdi sịgbagba, suugh, rꞌarukpe ode ẹmina, ḅịle rꞌeḍien: ikpo ịbiakpa, abali, ịbiakpa dị ọgbe rꞌịdi ọphoghi, rꞌẹkiḍi, rꞌẹnuum aḍiowo, rꞌạmamaam ạnam dị maniir, rꞌiyool-ịga. Bịdi ulegheri ni mọ bịdi kọtol li ọkoony eḍien rꞌạmuum ḅịle kẹn asiloor medugh ẹpe ẹdala phọ.