Read abua 2 Sạmuel 18 Bible Online

2 Sạmuel 18 - abua bible

2 Sạmuel 18

¹ADevid ọdaam ẹmha phọ aakpomoghi ni oomo awe phọ ọdi, kụ adi weye phọ sita dị iniin oniin ọonir awe, iniin oniin okuron awe, kụ ọdi ạmaaghi buḍiemiom dị kopogh ghan bịdi.

²Kụ ọdi arom ịraar asita mọ ọghi, aJoab rꞌAbisai umor phọ aJoab ḅịle rꞌItay oye ọlo ạGat phọ, oye ye ạbidi aḍiemiom ghan ḍita awe. Kụ ọdaam mọ ạḅeni weye phọ ọdi, “Mị rꞌaloor ạmi katu aani ni.”

³“Nạ rꞌayoor kụ kọ́ki,” bịdi ọphagharanaan. “Kẹ́kigh ịyaar esi ẹpomoghian phọ eḍighi ịyaar dị yoor ooghiraan bịn osumughu, mụghumo kẹn oolemi odi awe phọ ayoor kụ bịdi ọze; kụ ọlo nạ ạman ni ḍioph ọonir ayoor. Kẹnighe ghụn eḍighi ịyaar dị nạ ạrol sịen ẹmha phọ kụ ạngo ghan rạraar mọ ọsighe uruom iyoor.”

⁴“Mị kaḍighi ni tọrotoro ịlo nyina egbiighi mọ ẹnighe,” ọdaam mọ ạphagharanaan. Kụ ọdi ạmeera ọgbal ọnhu-aḍibuo phọ kụ awe phọ ọdi oten romite aḍita oniin ọonir etum ḍita oniin okuron.

⁵Kụ ọdi ạto ạḅeni Joab rꞌAbisai rꞌItay, “Loor ẹmhu ạmi oye kúḍighi ịyaar onyugheel phọ Ạbsalom.” Kụ oomo awe ẹgham mọ ụnaghan ni mem mọ aDevid ạto bọ ịduon phọ ạḅeni bụo ịtooghi phọ.

⁶Awe ẹgham mọ aDevid ụghi ni osi ẹpe ọgbal ẹmha phọ kụ eenan ẹgham rꞌawe Ịzirel phọ ẹpe ẹekpua phọ Ifraim.

⁷Awe phọ aDevid ọkpar opu weye phọ Ịzirel iboom; ịyaldi ọonir awe kụ ẹdi bịdi ọze ḍio phọ ạḍiphe phọ.

⁸Ẹgham mọ ẹwalala eleeny oomo eelhe phọ, kụ awe dị omugh ẹpe ẹekpua phọ upu ni bụphe ẹgham mọ ẹze bọ.

⁹Ekperenom bịn Ạbsalom azuan buniin awe aDevid. Ạbsalom aḍigh ẹnam adool, kụ ịduon ẹnam mọ eḅugh bọ oniin oboom oreeny ạḍiogh reten bịn, ạsilaal ẹmhu Ạbsalom ẹphiiny ịla oreeny phọ. Ẹnam adool phọ eghiil eten bịn Ạbsalom rạaghelaan.

¹⁰Oniin oye phọ aDevid ạmiin nyọdi kụ ạghaaph ạḅeni Joab, “Oye phọ, mị ụmiin Ạbsalom rạaghelaan ạnyu oreeny!”

¹¹Kụ aJoab ạphagharanaan, “Eḍighi ịyaar dị nạ ạmiin nyọdi, eeghe kụ iḍighi bọ kụ nạ óghiigh bọ nyọdi sịphe phọ? Mị rꞌaloor ạmi mụkuom ni nyịna ḍioph ipoḍi asilva rꞌokuughaam.”

¹²Kụ oye phọ ạphagharanaan, “Ghạlamo nạ ụngo ịmi oniin ọonir ipoḍi asilva, mị kásoghoghomi ḍịghaagh ápoghomiom ọony ọdaam mọ. Yoor ụnaghan ni dị ọdaam mọ ạto bọ ạngo nyịna rꞌAbisai ḅịle rꞌItay mọ, ‘Loor ẹmhu ạmi oye kúḍighi ịyaar onyugheel ọony phọ Ạbsalom.’

¹³Kụ ọlo eḍighi ịyaar dị mị ụ́naghanan ọdaam mọ kụ aghiigh Ạbsalom, ọdaam mọ mụnaghan ni — ọdi rạnaghan ghan ni oomo ịlo remite — kụ nạ mútue úkikima ịiḅaghami lọ retu ọteeny ạmi.”

¹⁴“Mị kátoph mun mem sịen rꞌạna,” aJoab ạḅem. Ọdi ạsighe ịraar ịsoph ạpham kụ agim akputon ekpom Ạbsalom, sịphe phọ ọdi kőmugh bọ kụ odi bọ rạaghelaan sịphe ạḍiogh phọ.

¹⁵Pọ kụ amem dị ḍioph awe ẹgham mọ aJoab oḍighom kụ oko Ạbsalom okitonom ọgurogh nyọdi oghiigh.

¹⁶Kụ aJoab ạto ạḅeni mọ ophula ọkuodu phọ osophe ẹgham mọ kúbe mun, kụ awe ẹgham mọ ọdi oḅula úporogh mun weye phọ Ịzirel.

¹⁷Kụ bịdi ọsighe ḍizu phọ Ạbsalom oroph osumeeny ooni dị ạkel ude agey ẹpe ẹekpua phọ kụ ọsighe rạna ookpereghiom nyọdi. Oomo awe phọ Ịzirel osumughu uwo kꞌọdi agheel kꞌọdi.

¹⁸Kꞌamem dị Ạbsalom odi ni eye ọdi ạka ni ịyaar dị kọsighe ọotughianam nyọdi ạmeremi ẹpe Eḍiiny Ọdaam mọ, loor esi dị ọdi ọ́mar olephiri lọ kạmeera ḍien phọ ọdi. Kụ iḍighi kụ ọdi ạsighe ḍien phọ ọdi kụ aghol ịyaar phọ, kụ kꞌarodon okol ịyaar phọ mọ Ịyaar Ọotughianam Ạbsalom.

¹⁹Pọ kụ amem dị Ahimaaz ọony phọ ạZedok ạḅeni Joab, “Mị kakiil li ạki ạḅeni ọdaam mọ ooḅi ọghaaph phọ mọ Ọmoogh-we phọ mạphel nyọdi ḍịghaagh ẹpomoghian phọ ọdi.”

²⁰“Eeye,” aJoab ạḅeni, “rodon nạ kạ́ki ọghaaph ooḅi ọghaaph. Ẹnon aḍio kụ ạghi, károdon, loor esi dị ọony ọdaam mọ mamugh.”

²¹Kụ ọdi ạḅeni ẹbene ọdi ọlo ạSudan, “Kịa ạḅeni ọdaam mọ ịphen nạ mạmiin bọ.” Ẹbene phọ azuman ạngo rughuenian kụ aghiil anyeene.

²²Ahimaaz ạkonoghian ni ọghi aani phọ, ọdi mọ, “Tọro ịlo emite, ẹnighe ni; meera mị ụki aani dom mọ.” AJoab apuru, “Mọony ạmi, eeghe kụ iḍighi kụ nạ rạwa bọ ọghi aani phọ? Nạ kạ́moogh ruunmo dom mọ ạḍien.”

²³Kụ Ahimaaz ạḅem, “Tọrotoro ịlo eḍighi, mị kạki ni.” “Pọ kịa-aa,” aJoab ạḅem. Kụ iḍighi kụ Ahimaaz aghiil asoor eten akiton ẹpe Eḍiiny phọ ạJodan, bịn íbia bịn ọdi atenom ẹbene phọ.

²⁴ADevid ạrol ude igbo ọnhu-aḍibuo ologhi phọ rꞌọpo erugh ẹmha phọ. Okoriom eghuugh phọ ạsiiny ạnyu iikpe phọ kụ ạdagh ạnyu otu phọ; ọdi aphogh kụ ạmiin oniin oye dị ogina ọdi kụ aghiil ratu.

²⁵Ọdi ạlho ạḅeni ọdaam mọ, kụ ọdaam mọ ạḅem, “Eḍighi ịyaar dị eḍighi ogina ọdi, pọ ọdi ạpam ni ooḅi ọghaaph kụ ratumom.” Ọpo rakiil bọ aḍuraan ạabeeph.

²⁶Kụ ọpo rakori bọ ạḅile ạmiin ọnon oye dị ogina ọdi kẹn kụ rakiil, kụ ọdi ạlho ạmagh oye phọ ọpo rakori bọ ọnhu-aḍibuo phọ, “Mịin, ọnon oye rakiil kẹn ni!” Kụ ọdaam mọ ạphagharanaan, “Ọphon phọ kẹn ạsighe ni ooḅi ọghaaph kụ ratu.”

²⁷Kụ ọpo rakori bọ ạḅem, “Mị ạmiin ni mọ ọḅel oye phọ rakiil ịdipho Ahimaaz.” Kụ ọdaam mọ ạḅem, “Ọdi ogey oye ni kụ ọdi ratumom ni ogey ọghaaph.”

²⁸Ahimaaz ạlho ni ạmagh ọdaam mọ, kụ ọdi ameel ude sịphe risigh ọdaam mọ kụ ạḅem, “Boom Ọmoogh-we Ẹnaan phọ ạna, ọpo mạngo bọ nyịna ọkpar opu esi awe phọ ạbuphe oruphiom bọ nyịna ẹgham, nạ Ogbogh Ọdaam mọ!”

²⁹Ọdaam mọ apuru mọ, “Onyugheel ọony phọ Ạbsalom odi ni agey ḍụghum?” Ahimaaz ạphagharanaan, “Oye phọ, mem mọ oye ịtooghi phọ ạna Joab urom bọ ịmi dom mọ, mị ụmiin dị esi phọ regirigiri, kụ ọlo mị úlegheri ịyaar phọ.”

³⁰Ọdaam mọ ạḅem, “Mẹera ẹpe.” Kụ ọdi aten ạghi ẹpe phọ ạmeera.

³¹Kụ ẹbene ọlo ạSudan phọ aru asi kụ ạḅeni ọdaam mọ, “Mị ạmoogh ooḅi ọghaaph ọḅeni Ogbogh Ọdaam mọ. Rodon Ọmoogh-we phọ mạngo nyịna ọkpar opu esi oomo ạbuphe oruphiom bọ nyịna ẹgham mọ!”

³²Ọdaam mọ apuru mọ, “Onyugheel ọony phọ Ạbsalom odi ni agey ḍụghum?” Kụ ẹbene phọ ạphagharanaan, “Mị rạwa mọ ịpe emitenaan bọ nyọdi kụ emitenaan oomo ẹpomoghian phọ ạna, oye phọ, ḅịle rꞌoomo awe lọ oruphiom nyịna ẹgham.”

³³Ọto amuza loor ọdaam mọ. Kụ ọdi aḍigh osoph dị odi atuman ọnhu-aḍibuo phọ kụ amoghi. Ọdi ramoghi kụ ạlho, “Sey, ọony ạmi Ạbsalom! Ọony phọ ạmi Ạbsalom! Ạbsalom ọony phọ ạmi! Kpạripe mịna kụ umugh ghụn lọ nạ kụ kámugh. Sey, ọony phọ ạmi, ọony phọ ạmi Ạbsalom!”