Read abua 2 Sạmuel 2 Bible Online

2 Sạmuel 2 - abua bible

2 Sạmuel 2

¹Ịphen phọ reten, kụ aDevid apuru Ọmoogh-we phọ mọ, “Mị ụki ni ụsighe eniin ẹmha sịphe ạramha phọ aJuda ḍụghum?” Kụ Ọmoogh-we phọ ạphagharanaan mọ, “Ii.” Kụ aDevid apuru mọ, “Ẹghen?” Kụ ọdi ạḅeni nyọdi, “Hẹbron.”

²Kụ iḍighi kụ aDevid ạghi ẹpe Hẹbron. Ọdi ạphamam ni ịyal phọ ạnmariir phọ ọdi, Ahinoam ọlo ẹpe Jẹzreel, ḅịle rꞌAbigel ekpukele ạnir phọ aNebal ọlo ẹpe Kạrmel.

³Ọdi ạphamam kẹn ni weye phọ ọdi rꞌạnmariir rꞌạnmuny ạbidi, kụ bịdi orughogh rạmha phọ ịpe ekitonom bọ Hẹbron.

⁴Kụ awe phọ aJuda oru ẹpe Hẹbron kụ ọsighe mụnum-ịko ọsagharan ẹmhu Devid oḍighi nyọdi ọdaam aJuda. Mem dị aDevid ạnaghan bọ mọ awe phọ aJabes ẹpe Gịliad mokughuḍi Sọl,

⁵ọdi arom buniin awe mọ ọghi ẹpe phọ rꞌadom mọ ạḍien: “Ọmoogh-we phọ ịseph inyina ịduon nyina eḍeenaan bọ ẹphomoghian phọ anyina esi ọdaam mọ anyina kụ eḍi bọ nyọdi.

⁶Kụ nyịidipho phọ Ọmoogh-we phọ ạmoogh ghụsan esi anyina ḅịle inyina kíbi! Mị phọ kẹn kịpham ni inyina ịdi ẹnighe loor esi ịphen phọ nyina meḍighi bọ.

⁷Ịmaar ẹkpar ẹḅile ẹmoogh ạkpo ologhi! ẠSol ọdaam mọ anyina mamugh, kụ awe phọ aJuda mụsighe ịmi oḍighi ọdaam mọ ạbidi.”

⁸Ạbner ọony phọ ạNer, uwo ẹmhu awe ẹgham mọ ạSol, mạdaph Isboset ọony phọ ạSol bịn asuma ạḅeeny ọphiiny phọ ạJodan akeel ẹpe Mahanaim;

⁹Ẹpe phọ Ạbner ạsighe Isboset aḍighi ọdaam areelhe phọ ạGiliad, Ạsa, Jẹzreel, Ifraim, Bẹnjamin ḅịle rꞌoomo Ịzirel.

¹⁰Ọdi ạman inyadi ạsia kụ ogbi bọ oḍighi ọdaam mọ Ịzirel kụ ọdi ạda bọ ịyal ạsia. Kụ ọlo eghun phọ aJuda ụphomoghian ọnaghanan Devid,

¹¹kụ ọdi ạrol ghan ẹpe Hẹbron kụ ạda aJuda oḍual ạsia rꞌạpakiri.

¹²Ạbner rꞌạbuo ịtooghi phọ Isboset ụḍua ni ẹpe Mahanaim ọghi ẹpe ẹmha phọ ạGibion.

¹³AJoab, ọpo onhiin phọ ọdi ughol bọ mọ aZeruya, ḅịle rꞌạbueri phọ ạbuo ịtooghi phọ aDevid ụteeny bịdi ẹpe ọodu phọ, dị ọrologhu ude, buniin ọtol ḍiniin ạḍighaagh ạbunon ọtol ḍịeri phọ ạḍighaagh ọodu phọ.

¹⁴Kụ Ạbner ạḅeni Joab mọ, “Ọson ugheel ạnmuny ịyal phọ ạga phọ kụ bịdi eeghi ẹgham mọ ịdipho ẹmha rꞌẹmha rọgba ghan bọ ịnugh.” Kụ aJoab ạphagharanaan mọ, “Ẹnighe ni.”

¹⁵Kụ iḍighi kụ ḍioph rꞌịyal awe ọḍua ḍịghaagh Isboset rꞌeghun phọ ạBenjamin omite, kụ eenan rꞌawe phọ aDevid.

¹⁶Kụ awe phọ oniin ạpham ghan ẹmhu oniin, ạḅile agim ghan elhool ẹgham mọ ịkpurugaany oniin, bịn kụ eḍighi ịdi oomo phọ 24 phọ ạbidi omeleghu bịn omuughu. Kụ iḍighi kụ esi phọ sịphe phọ ẹpe Gịbion okol mọ “Ade arolhool ẹgham.”

¹⁷Kụ egbogh ẹgham emite, kụ aDevid rꞌawe phọ ọdi ọkpar opu ạbner rꞌawe phọ Ịzirel.

¹⁸Kụ ịraar phọ ạnmuny phọ aZeruya ụrol li ẹpe phọ: aJoab rꞌAbisai rꞌẠsahel. Aruwol Ạsahel ikem ghan ịdipho ịlo ọoroogh.

¹⁹Kụ ọdi amiigh ophorogh Ạbner, mꞌophorogh rꞌọteeny ọdi.

²⁰Kụ Ạbner aphogh ọman kụ ạḅem mọ, “Ọpo ạna phọ ni Ạsahel?” Kụ ọdi ạphagharanaan mọ, “Ii.”

²¹Ạbner ạḅem mọ, “Ịmi kúphorogh mun. Porogh oniin oye ẹgham mọ, kụ aziton ịyaar lọ ọdi ạpham.” Kụ ọlo Ạsahel aphorogh ni nyọdi ạkpaariom.

²²Kụ Ạbner ạḅile ạḅeni nyọdi mọ, “Ịmi kụ́daph mun. Gbạani dị ạna. Uḍighi ika kụ nạ rụkpuughiom bọ ịmi oghiigh ạna? Mịna kạmeera bọ ika risigh umor phọ ạna, Joab?”

²³Kụ ọlo Ạsahel ómeera ọ́wile; ẹpe kụ esi dị Ạbner ạsighe ẹdume ọsoph phọ ọdi agim ọkuruḅaka Ạsahel akputon ọman ọdi. Kụ Ạsahel ameel ude amugh, kụ tọrotoro oye lọ ạghi asi esi phọ ọdi ameel bọ ạmeera ghan ni.

²⁴Kụ ọlo aJoab rꞌAbisai umiigh ni ophorogh Ạbner, kụ erumuḍio remeel ighool bịn bịdi ọghi osi eegbolom phọ Ama, ẹmha dị edi ḍịghaagh phọ ạḍiphe erumuḍio phọ rẹḍua ghan bọ kemite etuman Gia ẹpe eten ẹdala phọ ạGibion.

²⁵Awe eghun phọ ạBenjamin ụḅile kẹn ni ookpomoghan okitonom Ạbner kụ ọmeregha riisi phọ ạbidi sịphe eegbolom mọ.

²⁶Kụ Ạbner ạlho ạmagh Joab mọ, “Yira kobe ni ịduon phọ bịn kꞌagee-pọ ḍụghum? Oomo ayira ạbuo eniin eelhe. Kꞌạpur amem kụ ẹdi nạ kạḅeni weye phọ ạna mọ ọwile ophorogh ayoor?”

²⁷Kụ aJoab ạphagharanaan mọ, “Mị akunya rꞌaḍien Ẹnaan phọ ẹpe edi ghan bọ bịn mọ mụghumo nạ mụ́ḅa bọ awe phọ ạmi muphorogh ni nyịna tụtu kꞌạḍiroor iḍueneen.”

²⁸Kụ aJoab aphula ọkuodu phọ ạngo eḍeenaan mọ awe phọ ọno kúporogh mun weye Ịzirel phọ; kụ elephiri phọ emuneen.

²⁹Ạbner rꞌawe phọ ọdi orelhe ẹpe eḍiiny phọ ạJodan oomo aḍughul phọ. Bịdi ọḅeeny ọphiiny phọ Jọdan kụ bịdi rọḅile rorelhe oomo phọ ạḍieri phọ ạḍiroor phọ kụ bịdi ọghi Mahanaim.

³⁰Mem mọ aJoab ạwile bọ ophorogh awe phọ, ọdi aakpomoghi ni oomo awe phọ ọdi kụ ạmiin mọ ḍioph rꞌesugha ạbidi mophe, ọḅaram Ạsahel.

³¹Awe phọ aDevid mọze 360 awe phọ Ạbner dị ọḍua eghun phọ ạBenjamin.

³²AJoab rꞌawe phọ ọdi ọsighe ḍizu phọ Ạsahel ọghi oḍi ẹpe oḍi eghun phọ ạbidi ẹpe Bẹtilihem. Kụ bịdi orelhe oomo phọ aḍughul phọ kụ rekpoghoronu bịn ọḅile osi Hẹbron.