Read abua 2 Sạmuel 3 Bible Online

2 Sạmuel 3 - abua bible

2 Sạmuel 3

¹Elephiri phọ ẹpe awe phọ ạbuphe oḍighan bọ ọto kꞌạSol rꞌawe phọ ạbuphe oḍighan bọ Devid eeghi bọ ibia ni iboom. Kụ ịdipho aDevid rạkpar ghan bọ ḍio etum ḍio phọ; ẹpomoghian phọ ọdi rodugh ghan ḍio etum ḍio.

²Odiiny phọ ạnmuny phọ ạbuen kụ ẹdi aDevid ạmar ẹpe Hẹbron, oniin aruom nyoniin: Amnon, onhiin phọ ọdi ughol mọ Ahinoam, ọlo ẹpe Jẹzreel;

³Kileab, onhiin phọ ọdi ughol mọ Abigel, ekpukele ạnir phọ aNebal ọlo ẹpe Kạrmel; Ạbsalom, onhiin phọ ọdi ughol mọ aMaaka, ọnyani aTalmai ọdaam mọ aGesur;

⁴Adonaija, onhiin phọ ọdi ughol mọ aHagit; Sefataya, onhiin phọ ọdi ughol mọ Abital;

⁵Itriam, onhiin phọ ọdi ughol mọ Egla. Oomo ạnmuny phọ ạbuen phọ ụmar ẹpe Hẹbron.

⁶Ịdipho elephiri phọ rẹki bọ ni risigh igbo awe ẹgham mọ aDevid rꞌawe ẹgham mọ ạbuphe oḍighan bọ ọto kꞌạSol, Ạbner ạrol li rꞌawe phọ ạSol bịn ạmoogh iboom ịikpo.

⁷Eniin aḍio kụ Isboset ọony phọ ạSol ạgbaanaan Ạbner mọ ạtolan esi rꞌọgaanyeen ạSol dị oghol mọ aRizpa, ọnyani Aya.

⁸Ịphen phọ iphin ni ologhi Ạbner iboom. Kụ ọdi ạḅem mọ, “Nạ ragbiom ghan mọ mị katue ni aakeleghi Sọl ḍụghum? Nạ ạkaraghi ni ragbiom ghan mọ mị rakumu ni Juda? Kꞌemiighom mọ mị rạloghonaan ghan ḍịghaagh tọrotoro ịyaar ọde phọ ạna Sọl, rꞌabumor ọdi ḅịle rꞌạrighiri ọdi, ḅịle kẹn mị mạphel li nyịna, mị úmeera mọ aDevid ạkpar apu nyịna; kụ rodon nạ rụgbaanaan ghan ịmi ịkaraph loor ẹmhu ạnir-ephoph.

⁹Ọmoogh-we phọ aguanaan ni Devid mọ ọdi kạsighe ni eelhe phọ ḍịghaagh ạSol rꞌẹemara ẹemara phọ ọdi kụ ạsighe Devid aḍighi ọdaam mọ Ịzirel rꞌaJuda, emiigh eniin eekuna eelhe phọ kụ ẹghi esi ẹpheri phọ. Nyịidipho phọ Ẹnaan ịgur ịmi eghiigh eḍighi ịyaar dị mị úḍighi ịphen phọ úmitiom!”

¹¹Isboset ịyaar ọ́ḅem loor esi dị ọdi aghiilaan ni Ạbner iboom.

¹²Ạbner arom ni sidom ạghiomonaan Devid ẹpe Hẹbron phọ ọdi ạrol ghan bọ, kụ ạḅeni mọ, “Ạnhian kụ kạda bọ de phọ ạḍien? Ịyal ayira oghiran ịyo. Mị kạloghonaan ni nyịna ḍịghaagh, mị aḍighi ịdi oomo Ịzirel koḍighan nyịna.”

¹³“Ẹnighe ni,” aDevid ạphagharanaan. “Mị rꞌạna kokiran ni ịyo phọ. Kụ eniin ịyaar bịn kụ ẹdi mị rạwa esi ạna. Nạ risigh ạmi kạ́miin emuton dị nạ ạsighe Mikal ọnyani phọ ạSol uruom ịmi mem lọ nạ ratu ọmiin ạmi.”

¹⁴Ḅịle kẹn aDevid arom ni sidom ạghiomonaan Isboset ạḅeni mọ, “Ḅulemi ạnir phọ ạmi Mikal ụngo ịmi. Mị ụsighe oniin okuron oodu awe aFilistia kụ aphinom bọ nyọdi.”

¹⁵Kụ iḍighi kụ Isboset ạsighe ọnyani phọ ḍịghaagh olhom mọ ọdi Pạltiel ọony aLais.

¹⁶APaltiel ạdaph ni ọnyani phọ tụtu ạghi asi ẹmha dị oghol mọ aBahurim, ramoghi ghan ịduon phọ ọdi rạki bọ. Kụ ọlo mem dị Ạbner ạḅeni bọ nyọdi mọ aḅula, ọdi aḅula ni.

¹⁷Kụ Ạbner ạghi ạteeny buḍiemiom awe phọ Ịzirel kụ ạḅeni mọ, “Mebia ni nyina rẹwa ghan bọ mọ aDevid kụ aḍighi ọdaam mọ anyina.

¹⁸Nyịidipho ọgel mamite. Ịitughian mọ Ọmoogh-we phọ ạḅem ni mọ, ‘Mị kạsighe otelhedom mọ ạmi Devid kụ ạpelom weye phọ ạmi Ịzirel ḍịghaagh awe aFilistia rꞌạḍighaagh oomo ẹpomoghian phọ ạbidi.’”

¹⁹Ạbner ạḅaanaan kẹn ni eghun phọ ạBenjamin kụ ọdi agbi ọghi ạHebron ọḅeni aDevid ịpe awe phọ ạBenjamin rꞌawe phọ Ịzirel momeeraam bọ oḍighi phọ.

²⁰Mem dị Ạbner ạghi bọ ạteeny Devid ẹpe Hẹbron ọdi ạphamam ịyaldi awe. ADevid ạko ni bịdi iboom igoni.

²¹Kụ Ạbner ạḅeni Devid mọ, “Mị kạki aḍighi ịdi oomo Ịzirel kọdaph nyịna ọdaam mọ. Bịdi kọsighe nyịna oḍighi ọdaam, bịn nạ mạmoogh ịpe nạ ạwa ghan bọ, ḅịle kẹn nạ kạda ni oomo phọ ade phọ.” Kụ aDevid ạḅeni Ạbner mọ ịyaar nyọdi kéḍighi kụ Ạbner anyeene ogheel.

²²Mọony amem kụ aJoab rꞌạbunon awe ịtooghi phọ aDevid origheel ẹgham dị ọghi, ọphamam iboom ạraraar dị bịdi ozirion ẹpe phọ. Ạbner, kụ ọlo, ọ́rol mun ẹpe Hẹbron rꞌaDevid, loor esi dị aDevid mạḅeni mọ ọdi agheel mọ ịyaar nyọdi kéḍighi.

²³Mem dị aJoab rꞌawe phọ ọdi origheel bọ, ụghaaph ni ọḅeni mọ Ạbner aru ni ạteeny Devid ọdaam mọ kụ mọḅeni mọ agheel mọ ịyaar nyọdi kéḍighi.

²⁴Kụ iḍighi kụ aJoab ạghi ạteeny ọdaam mọ kụ ạḅeni nyọdi mọ, “Ịphen nạ aḍighi bọ ịghen? Ạbner kụ aru ạteeny nyịna — iḍighi ika kụ nạ ameera bọ mọ ọdi agheel ịdipho bịn?

²⁵Ọdi aru sịen ookeleghi ạna ḅịle rꞌọwa olegheri oomo ịlo nạ raḍighi rꞌạtorotoro esi lọ nạ rạki. Agey phọ ni nạ alegheri ni!”

²⁶AJoab rọḍua kꞌaDevid bịn arom butelhedom mọ ọghi osiph Ạbner, kụ bịdi ọteeny nyọdi ẹpe aghuḍia phọ aSira, kụ ọsighe oḅulemi; kụ ọlo aDevid ólhegheri ịphen bịdi oḍighi bọ.

²⁷Mem mọ Ạbner asi bọ Hẹbron, aJoab ạsighe ni nyọdi atenom ọgbal ẹpe ọnhu-aḍibuo phọ ẹghigh mụdi ọdi rạwa ọḅeni ịyaar ọgbal, kụ ẹpe phọ kụ ẹdi ọdi agim ẹleke ọkuruḅaka oye phọ. Ịduon kụ ịdi oghiigh bọ Ạbner loor esi dị ọdi maghiigh Ạsahel umor phọ aJoab.

²⁸Mem dị aDevid ạnaghan bọ ịphen phọ emite bọ, ọdi ạḅem mọ, “Ọmoogh-we phọ alegheri ni mọ awe phọ ạmi rꞌạmi úḍighan aani oghiigh Ạbner.

²⁹Ịikpia phọ ẹrol ẹmhu aJoab rꞌọto kꞌọdi! Tọrotoro oghiil awe lọ omite, oye ạrol li sịphe kꞌọdi dị ạmoogh agonoria mꞌẹkaraph ẹzegh aḍizu, mụghumo oye dị kaḍighi ghan iiḍighi ạnmariir bịn, mụghumo oye dị kokiigh erugh ẹgham, mụghumo oye dị kạ́moogh ghan ịyaar ole!”

³⁰Ịduon kụ ịdi aJoab rꞌumor phọ ọdi Abisai oḅulemian bọ Ạbner ịpe ọdi aghiigh bọ umor phọ ạbidi Ạsahel ẹpe ẹgham mọ ẹpe Gịbion.

³¹Kụ aDevid ạto ạngo Joab rꞌawe phọ ọdi mọ ọphanyi rụsuoma ạbidi, ọkpologhian rukpe-ọto, kụ omoghinaan Ạbner. Kụ ẹpe amaḍi phọ aDevid ọdaam mọ rꞌaloor ọdi arelhe ni ạdaph ghan igbe oḍim mọ.

³²Uḍi Ạbner ẹpe Hẹbron, kụ ọdaam mọ amoghi ni amitiom ẹpe oḍi phọ, ḅịle kẹn oomo phọ awe phọ umoghi ni.

³³ADevid ạmoor ḍụor phọ aḍien amoghiom Ạbner: “Iḍighi ika kụ Ạbner amugh bọ ịdipho uwelologhi?

³⁴Ụ́paḍi rạghaagh phọ ọdi; ruwol phọ ọdi ụ́paḍi; ọdi amugh ịdipho oye dị ạrookom-enu kụ oghiigh!” Kụ awe phọ ọḅile kẹn omoghinaan nyọdi.

³⁵Oomo aḍio phọ awe phọ ọkpuughiom ghan Devid olhe ịyaar, kụ ọlo ọdi aghunya ni mọ, “Ẹnaan ịgur ịmi eghiigh eḍighi ịyaar dị mị ale eḍien kụ egbi oghul!”

³⁶Awe phọ ọnaghan bọ ịphen phọ ịḅeeraan ni bịdi iboom. Ọkar agey, tọrotoro ịyaar lọ ọdaam mọ aḍighi ịḅeeraan ghan ni weye phọ.

³⁷Oomo phọ awe phọ aDevid rꞌoomo phọ awe phọ Ịzirel ụnaghanan ni mọ ọdaam mọ óḍighan aani oghiigh Ạbner.

³⁸Kụ ọdaam mọ ạḅeni weye ịtooghi phọ ọdi mọ, “Nyina ílegheri mọ rodon phọ ạḍien ogbogh oye dị aḍighi oḍiemiom sịen Ịzirel mamugh?

³⁹Ghạlamo ịduon mị kụ aḍighi bọ ni ọdaam ẹmha dị Ẹnaan kụ ẹsaḅar, aloor ạmi edugh ni rodon phọ. Ạnmuny phọ aZeruya phọ ạbuen rọgam kọphughan esi ạmi. Ọmoogh-we phọ ạliom ni rọokom-enu phọ ạbuen ịpe ẹkpianaan bọ!”