Read abua 2 Sạmuel 6 Bible Online

2 Sạmuel 6 - abua bible

2 Sạmuel 6

¹ADevid ạḅile kẹn aakpomoghi ikpolom awe ẹgham mọ Ịzirel, aḍita phọ ịman ịraardi ọonir awe,

²kụ ọdi aḍiemiom bịdi ọghi osi ẹpe Baala ẹpe Juda, ọsighe Igbe Ịyo phọ kꞌẸnaan, ọpo ọsighe bọ ḍien Ẹnaan Oomo Ịikpo phọ kụ ogholom, ọpo arugh bọ ịbaay ịyal ạruukpaany aghuḍuul phọ.

³Bịdi ụsighe ni igbe phọ ẹpe otu phọ Ạbinadab ạnyu eegbolom mọ kụ ọsighe ọsaany omoom oghuugh-ude. Uza ḅịle rꞌAhio, ạnmuny Ạbinadab kụ uulhemi ghan oghuugh phọ.

⁴Ahio odi risigh.

⁵ADevid rꞌoomo awe phọ Ịzirel rọmoor rọker rꞌoomo ịnyaam ạbidi oghueniom ghan Ọmoogh-we phọ. Bịdi uti ghan ni rẹne, rạkama, ịsagha, ḅịle rꞌịkpaalaam.

⁶Ịduon bịdi ọghi bọ osi sịphe ạNakon rạponyon ghan bọ ịbiakpa phọ, bịn ạsinam mọ ẹghorom kụ Uza akem ạpham Igbe Ịyo phọ.

⁷Egina amem bịn Ọmoogh-we Ẹnaan phọ ạghagh ologhi esi Uza bịn aghiigh nyọdi loor esi ẹ́logh eegu ịyaar phọ Uza. Uza amugh ni sịphe ọgbal Igbe Ịyo phọ.

⁸Kụ iḍighi kụ okol esi phọ ịpa phọ mọ Pẹrez Uza (“Ọliom Uza”) kꞌarodon. Iphin ni iboom ologhi aDevid loor esi dị Ọmoogh-we phọ mạlhiom Uza esi ọghagh ologhi.

⁹Pọ kụ amem dị aDevid aghiilaan Ọmoogh-we phọ kụ ạḅem mọ, “Mịna kạsighe bọ ika Igbe Ịyo phọ?”

¹⁰Kụ iḍighi kụ ọdi agbiighi mọ ọno kạ́sighe mun ásiemi Jeruselem; kpạripe ghụn ọdi ạgbatanuom ạsighe asiemi otu Obed Idom, oye ọlo ẹmha phọ ạGat.

¹¹Igbe phọ ịrol ẹpe ịraar ụnwanyu, kụ Ọmoogh-we phọ ạseph Obed Idom rꞌọto kꞌọdi.

¹²ADevid ọdaam mọ ạnaghan mọ loor esi Igbe Ịyo phọ Ọmoogh-we phọ mạseph ọto kꞌObed Idom rꞌoomo ịpe ọdi ạmoogh bọ; kụ iḍighi kụ ọdi ạsighe Igbe Ịyo phọ ẹpe otu phọ Obed Idom ạghi ẹpe Jeruselem rꞌoghur.

¹³Mem lọ awe phọ ạbuphe ọpham bọ Igbe Ịyo phọ ọgbatan odiiny ạrada, aDevid ạmeremi, kụ ọdi ạsighe ḍilephiri ạnam rꞌoophoony ọony ạnam ạphighironom ẹkia ạngo Ọmoogh-we phọ.

¹⁴Kụ aDevid amuuna ọyegheyeghe ukpe bịn, kụ ạgher ghan ịḅa rꞌoomo ịnyaam ọdi oghueniom Ọmoogh-we phọ.

¹⁵Ịduon kụ ịdi ọdi rꞌoomo awe phọ Ịzirel ọsighe bọ Igbe Ịyo phọ osiemi Jeruselem rꞌiboom iboh rꞌọyugh ḅịle rꞌẹḍogh ọkuodu.

¹⁶Ịdipho ọsighe bọ Igbe Ịyo phọ roḍighom ẹmha phọ, aMikal ọnyani phọ ạSol aphogh ni ẹpe eghuugh-ookuugh phọ amitiom kụ ạmiin Devid ọdaam mọ dị rạker rapeleghu esi ịḅa phọ kꞌẸnaan, kụ ạnir phọ ạḅitonaan nyọdi sịphe ologhi ọdi.

¹⁷Bịdi ụsighe ni Igbe phọ ọghi oseere sịphe oḍighinaan bọ nyọdi sịphe ogbogo phọ aDevid ạloghonaan bọ ịyaar phọ. Kụ ọdi ạphinyon rịkia ạngo Ọmoogh-we phọ.

¹⁸Mem dị ọdi ạmadan bọ ọphinyon ạrikia phọ, ọdi ạseph ni weye phọ esi aḍien Ọmoogh-we Oomo Ịikpo phọ

¹⁹kụ adiemi oomo ạbidi riiḍien. Ọdi ạngo ni tọrotoro oye mꞌolephiri ọony mꞌạnir-ephoph sịphe Ịzirel eniin eeḅoghoḍi ạbred, etigh ẹnam dị ọphoghi, rꞌẹezugh iimuma avain dị ọḅur. Kụ oomo awe phọ ogheleghu kꞌạbidi.

²⁰Roḍighipa, mem dị aDevid magheel ẹpe kꞌọdi ophogh ọto kꞌọdi, aMikal amite aru ạteeny nyọdi kụ ạḅeni mọ, “Ọdaam mọ Ịzirel amitiom ni ḍien rodon. Ọdi aafolomi loor ọdi ịdipho uwelologhi risigh ạnmanyaan-otu awe ịtooghi phọ ọdi.”

²¹Kụ aDevid ạphagharanaan mọ, “Mị ụgher ghan ịḅa aghueniom Ọmoogh-we phọ, ọpo ạwile bọ ọde phọ ạna rꞌeghunotu phọ ọdi kụ ụsaḅar ịmi aḍighi oḍiemiom awe phọ ọdi Ịzirel. Kụ mị kạker ri ạkiom risigh akueniom Ọmoogh-we phọ

²²kụ ạḅile aafolomi loor ạmi apuemi sịen. Nạ kagbi ghan mọ mị ụ́man mạar, kụ ọlo ạnmanyaan phọ ạbuphe phọ kuphogh ni ịmi ọbughe!”

²³AMikal ọnyani phọ ạSol mọony ọ́mar.