Read abua 2 Sạmuel 8 Bible Online

2 Sạmuel 8 - abua bible

2 Sạmuel 8

¹Rẹsighe mem kụ aDevid ạḅile azuom ẹgham weye aFilistia phọ, ạkpar apu bịdi, bịn akunughi ịtooghi phọ ạbidi sịphe ade phọ.

²Kụ ọdi kẹn ạkpar apu weye ạMoab. Ọdi aḍighi ịdi awe phọ ạbuphe ọdi asiphi bọ ọmina yogh ude kụ tọrotoro ịraar awe ọdi ạze ghan ịyal awe.

³Kụ ọdi ạkpar apu Hadadezer ọony aRehob ọdaam mọ aZoba, mem dị ọdi akiton ẹpe ọphiiny phọ aYufratis rạki ọḅile ọkparami ịtooghi phọ ọdi ẹpe eelhe phọ.

⁴ADevid asiphi ni ḍioph rꞌoḍual okuron awe phọ ọdi dị rokiilom ghan ạsu ḅịle rꞌịyaldi ọonir awe ẹgham mọ ọdi dị rotelhe ghan ude. Ọdi aseerian ni ịbadi ạsu dị ketue ni ẹkasian oghiilom oniin okuron arughuugh-ude kụ ọdi aḅonyon ruwol ịpheri phọ.

⁵Mem dị awe ạSiria phọ bụphe ẹpe Dạmaskos ọlogh weye ẹgham mọ ọghi ọloghonaan ḍịghaagh aHadadezer ọdaam mọ, aDevid azuom ni ẹgham bịdi kụ ạze ịyaldi rꞌịyal ọonir awe.

⁶Kụ ọdi adoghoḍi simarugh kụ asereghi weye ẹgham ẹpe areelhe phọ ạbidi, kụ bịdi ọrol ghan eeḍian ọdi kụ osogh ghan iisogh ọngo nyọdi. Ọmoogh-we phọ ạngo ghan ni Devid ọkpar opu tọrotoro esi.

⁷ADevid azirion ạanyi rụsuaram mọ oḍighinom bọ sigol phọ ịpe awe ịtooghi phọ aHadadezer orool bọ kụ ọdi ạsighe ạghi ẹpe Jeruselem.

⁸Ọdi ạḅile kẹn ni ạsighiogh eboom enaba ẹpe Beta rꞌaBerotai, rạmha dị aHadadezer kụ ạda ghan.

⁹AToi ọdaam mọ ạHamat ạnaghan ni mọ aDevid mạkpar apu oomo awe ẹgham mọ aHadadezer.

¹⁰Kụ iḍighi kụ ọdi arom Jọram ọony ọdi mọ ạghi ạseph Devid ạḅeni mọ maḍighi ịduon ọdi mạkpar bọ apu Hadadezer, ịdi eḍighi bọ aToi rꞌạbidi meeghi ghan ni rạagham ịbadi amem. ẠJoram ạpham ni ruunmo asilva rꞌagol rꞌenaba kụ ạghiomonaan Devid.

¹¹ADevid ọdaam mọ ạḅogh ni rạraar phọ ịphen mọ ọsighe ghan ọphamam ịiḅereghi, kụ ọdi ạḅaram kẹn silva rꞌagol phọ ọdi ạsighiogh bọ ḍịghaagh areelhe phọ ịpe ọdi mạkpar bọ apu —

¹²Idom, Mọab, Amon, Filistia rꞌẠmalek.

¹³Bịn ọdu phọ aDevid aaleghaan iboom mem mọ ọdi arigheel bọ ẹpe ọdi ạze bọ ḍioph rꞌọphaanya ọonir awe Idom ẹpe Eḍiiny Aboph phọ.

¹⁴Ọdi adoghoḍi ni rugbogo ạḅile asereghi weye ẹgham oomo eelhe phọ Idom, bịn awe ẹpe phọ ọrol eeḍian ịtooghi phọ ọdi. Ọmoogh-we phọ ạngo ghan ni Devid ọkpar opu tọrotoro esi.

¹⁵ADevid ạda ni oomo Ịzirel kụ ạwa ghan ni ạmiin mọ awe phọ ọno odi ni ḍigey ạdol dị iigbegheḍiom ílho.

¹⁶AJoab, ọpo onhiin phọ ọdi oghol bọ mọ aZeruya, kụ aḍighi ghan uwo ẹmhu awe ẹgham; ạJehosafat ọony phọ Ahilud kụ aphogh ghan ịgeeghian ẹmha phọ.

¹⁷ẠZedok, ọony phọ Ahitub, rꞌẠhimelek ọony phọ Ạbayata kụ uḍighi bụpinyon rịkia phọ; aSeraya kụ ọgeeghia;

¹⁸aBenaya ọony phọ ạJehoyada kụ uwo ẹmhu ạbuphe okori ghan bọ Devid; kụ ạnmuny phọ aDevid oḍighi bụpinyon rịkia.