Read abua 1 Ạbudaam 10 Bible Online

1 Ạbudaam 10 - abua bible

1 Ạbudaam 10

¹Mem dị ukueni-ạnir ọpo ạda bọ Siba ạnaghan bọ ọdu phọ ạSolomon ịlo aḍien Ọmoogh-we phọ, kụ ạghi ọdeghogh ọdi opuru yogh ọdi ịikpara asipuru.

²Kụ ọdi ạghi asi Jeruselem, rꞌaḍita awe dị ọphughan rꞌạsikamel dị erool ọdo kịrokiro ạraraar eḍu rꞌagol rꞌiimuma ọzaamian aloor. Mem dị ạnir phọ ạghi ạteeny Sọlomon, kụ ọdi ạghaaph oomo ịpe ẹrol bọ ologhi phọ ọdi, ạḅeni nyọdi.

³Kụ ạSolomon ạphanyanaan oomo asipuru phọ ịpe ọdi apuru yogh bọ nyọdi. Ịyaar dị ạaghian esi ọdaam mọ ị́tol, dị ọdi ụ́kaaph ụḅeni ạnir phọ.

⁴Kụ mem dị ukueni-ạnir phọ ạda bọ Siba ạmiin bọ oomo olegheri-ịyaar phọ ạSolomon, rꞌotu phọ ọdi ạlogh bọ,

⁵rꞌeḍien phọ edi bọ sịphe ạnyu ịdaabili phọ ọdi, rꞌạdol awe iiḍighi phọ ọdi rꞌeḍighinom ạraraar abutelhedom mọ ọdi, rꞌibura phọ ạbidi ạbumeleghiom mọ ọdi, rꞌạrikia oguom ạnian phọ ịpe ọdi ạphighironaan bọ sịphe Otu Ịiḅereghi phọ, bịn ạnir phọ amaghagha.

⁶Kụ ạnir phọ ạḅeni ọdaam mọ mọ, “Ọkpe ólho ịpe ụḅeni bọ ịmi eḍighinom ạraraar phọ ạna rꞌolegheri ịyaar phọ ạna.

⁷Tọrobo ịpe ẹrol bọ mị úmeeraam ghan ịpe bịdi ọghaaph ghan bọ, tụtu mị aru bọ ạsighe riḍien ạmi ạmiinom. Kụ ọlo, bịdi ụ́kaaph rꞌoolemi-odi ụ́ḅeni ịmi. Olegheri-ịyaar phọ ạna rꞌẹelha phọ ạna epu ịpe bịdi ọghaaph bọ ụḅeni ịmi.

⁸Ọḅaal ologhi ạrolonaan we phọ ạna! Ọḅaal ologhi ạrolonaan butelhedom mọ ạna, bụphe odi ghan bọ ghisigh ạna oomo amem rꞌạbuphe rọnaghan ghan bọ olegheri-ịyaar phọ ạna!

⁹Ạḍiseph ẹrolonaan Ọmoogh-we Ẹnaan phọ ạna ọpo ạmoogh bọ ḍịḅeeraan esi ạna, kụ ạrolomi bọ nyịna ạgada ọda Ịzirel; ịdi eḍighi bọ Ọmoogh-we phọ ạpomoghian Ịzirel kꞌagee-pọ, ọdi maḍighi nyịna ọdaam eelhe phọ, oogboom ịiruen rꞌạdol aruukuan.”

¹⁰Ạnir phọ ạsighe inya ọonir igbogh ịtoom ẹemor agol ạngo ọdaam mọ, rꞌịminighan ọdo kịrokiro ạraraar rꞌịma ạrana ḍi ẹman ḍighi. Ọdo kịrokiro ạraraar dị ukueni-ạnir phọ ạda bọ Siba ạngo Sọlomon ọdaam mọ dị eḍiza ịduon kọ̋miin ghan mun kꞌarodon.

¹¹(Ḅịle kẹn ạrunwunyaru aHiram dị ẹsaany gol ẹpe Ofir, erumom ẹpham ịminighan ạsipo oreeny ụphogh ẹpe Ofir, rꞌạrana dị ẹman ḍighi iboom.

¹²Kụ ọdaam mọ ạsighe sịphe oreeny ụphogh phọ ạka rọko ạloghom sịphe Otu Ịiḅereghi phọ rꞌịsiphe ogiga ọdaam mọ; ạsighe iniin aḍighinom rugumogum ịlo ạbuo ạsuor phọ, rꞌaruuḍue. Ọdo phọ oreeny ụphogh phọ ọpo phọ ólho mun, rọ́miin ghan mun kꞌarodon.)

¹³Kụ ạSolomon ọdaam mọ ạngo ukueni phọ ọpo ạda bọ Siba oomo ạraraar dị ẹḅeeraan ạnir phọ; tọrobo ẹlo ạnir phọ ạwa omuton ịpe ạSolomon ạsighe bọ sịphe aruphua phọ ọdi ạngo. Kụ ạnir phọ aḅula agheel ẹpe eelhe phọ ọdi, ọdi rꞌabutelhedom mọ ọdi.

¹⁴Ẹemor agol dị ọngo Sọlomon ḍiniin ạlha ẹman bọ ịyaldi rꞌịraar ịtoom.

¹⁵Úgbiom ịpe abumuul ḍighi phọ rꞌịpe ạbuo aruphua aḍighi phọ ọdo kịrokiro ạraraar phọ, rꞌịpe oomo ạbudaam mọ Arebia rꞌạbuphe ropogh bọ rịikpigh phọ Ịzirel, ọngo bọ nyọdi.

¹⁶ẠSolomon ọdaam mọ ạazaghami ạlhemom ịyal okuron ịsuaram dị ẹmanam, oḍual igbogh ịtoom ẹemor agol oniin ọsuaram.

¹⁷Kụ ọdi ạazaghami gol phọ ạlhemom bọ ịraar okuron ịbam ịsuaram, ịyal igbogh ịtoom ẹemor agol oniin ọsuaram. Ọdaam mọ ạsighe ạghi ạlogh ẹpe oghol bọ mọ Ẹekpua ạLebanon phọ.

¹⁸Ọdaam mọ ạḅile kẹn ạlhem ạgada ọdaam eelhe dị, ạga eḍighi ạagba, kụ ạga ọdamaghi ogey agol.

¹⁹Ạgada phọ ạmoogh bọ odiiny ẹedaneen, kụ aaghiraan ẹpe eekuna ọman ẹtolom mọ, kụ ạmoogh ịyal phọ ạga phọ; kụ ịyal ạnam-dịka ẹmeregha ọman ẹtolom mọ. Ḍioph rꞌịyal ạnam-dịka ẹmeera oniin ạga, ḍịeri phọ ịdipho kẹn odiiny ẹedaneen. Kụ ẹnon eelhe dị ọdo phọ ạrol ílho.

²¹Kụ oomo ạraraar phọ ịpe ạSolomon ọdaam mọ rạpugholom ghan bọ miim ụlhemom gol; kụ oomo ạraraar erughotu phọ ọdi edi bọ ẹpe Ogbotu Ẹekpua ạLebanon ụlhemom ogey agol; ọlo oḍighinom silva ọ́rol. Asilva ọ́man ịyaar mem mọ ạSolomon.

²²Ọdaam mọ ạmoogh rụnwunyaru ẹpe aTasis dị ọḅaram ịpe aHiram; ịraar ạsia mem, ạrunwunyaru phọ ịphen aTasis ịsighe ghan agol rꞌasilva rꞌạraphaal ọoma rꞌạrepeleeny rꞌọkolobu keruom ọdaam mọ.

²³Ẹelha rꞌolegheri ịyaar ạSolomon ọdaam mọ epu ẹelha rꞌolegheri ịyaar oomo ạbudaam ịsien aḅirini phọ.

²⁴Kụ oomo awe aḅirini phọ ụghi ghan kꞌạSolomon ọnaghan aani olegheri-ịyaar phọ ọdi ọpo Ẹnaan ẹlhogh bọ sịphe ologhi phọ ọdi.

²⁵Kụ tọrobo oye ạpham ghan ruunmo ịlo oonmo ọdi, rạraar arukumuan dị oḍighinom gol, rꞌịdi oḍighinom silva, rꞌiinmenan, rꞌịinya ẹgham rꞌarolho kịrokiro, rꞌạrusu rꞌịnam adool. Bịdi ụpham ghan ịphen phọ ạlha etum lhạ.

²⁶ẠSolomon aakpomoghi rughuugh-ude phọ ọdi rꞌạrusu phọ ọdi egina esi. Ọdi ạmoogh bọ oniin ọonir rꞌinya okuron arughuugh-ude rꞌiḍioph rꞌịyal ọonir awe dị rokiilom ghan bọ rụsu phọ. Buniin ọdi asereghi ẹpe Jeruselem, bụeri phọ ọdi asereghi ẹpe ạramha phọ arughuugh-ude phọ ediighi bọ.

²⁷Kụ ọdaam mọ ạsighe silva amuzeḍi ẹpe Jeruselem dịadi ịkpingba; aḍighi ịdi ọsaga aatura ịdipho ạḍiphuuny eḍiza bọ ẹpe eḍiinyaan bọ aḍiza.

²⁸Kụ ạSolomon ạmoogh ịnam-ạsu dị ẹḍua ghan ẹpe Ijipt rꞌaKilisia kụ eru. Abumuul ḍighi ọdaam mọ rọdaph ghan ịpe ẹrol bọ kụ kạar ọmur; ḍita ịlo edi esi ọnhu ịpe ẹman bọ kụ kọsighe.

²⁹Oghuugh-ude lọ ogho ẹpe Ijipt rạman ghan bọ odiiny okuron ipoḍi asilva. Oniin ạsu rạman ghan oniin okuron rꞌooghdi ipoḍi asilva. Ịduon kụ ịdi bịdi ọsighe ghan rọkiomonaan ghan oomo ạbudaam mọ ạHitait rꞌoomo ạbudaam mọ ạSiria.