Read abua 1 Ạbudaam 11 Bible Online

1 Ạbudaam 11 - abua bible

1 Ạbudaam 11

¹Aruuruen ạnmariir ọḅeeraan Sọlomon igey ọḅaran rꞌọnyani ọdaam eelhe phọ Ijipt. Ọdi ạphomoghian nmạriir ạHitait ạbuo ạMoab rꞌAmon rꞌIdom rꞌaSaidon,

²sịphe ạramha phọ ịpe Ọmoogh-we phọ ạḅeni bọ we phọ Ịzirel mọ, “Kéeḍikuan bịdi. Bịdi kẹn inyina kíiḍikuan. Bịdi kokiton iloghi anyina nyina emeeraam rụmugh phọ ạbidi.” Kụ bịdi phọ kụ ạbudi ạSolomon ạphomoghian.

³ẠSolomon aphin bọ oḍual okuron ạnmariir, nmạnyaan ikpolom awe, rꞌịraar okuron ịyooyo. Kụ ạnmariir phọ ọdi okiton ologhi phọ ọdi.

⁴ẠSolomon rọkpo bịn ạnmariir phọ ọdi okiton ologhi phọ ọdi bịn ạdaph ạaḅereghi ghan ịnon ạrumugh, bịn ologhi phọ ọdi ọ́rol mun esi Ọmoogh-we Ẹnaan phọ ọdi, ịdipho ologhi aDevid ọde phọ ọdi ạrol bọ.

⁵ẠSolomon ạdaph Astarte, ẹya-eru phọ aSaidon rꞌạMolek ḅạphanya phọ Amon.

⁶ẠSolomon aḍighi ịkaraph egbodo Ọmoogh-we phọ, oomo ologhi ọdi ọ́rol mun esi Ọmoogh-we phọ ịdipho ologhi aDevid ọde phọ ọdi ạrol bọ.

⁷Kụ ạSolomon ạloghonaan Kemos ḅạphanya phọ ạMoab rꞌạMolek ḅạphanya phọ Amon esi dị ephoph ẹghi ạnyu sịphe ẹeḅaraph phọ ẹpe koten bọ kụ omite Jeruselem.

⁸Kụ ọdi ạtuugh oomo phọ ịphen phọ aḍighinaan ghan ruuruen ạnmariir phọ ọdi, bụdi ọsuughinaan ghan bọ ịmuwa ọphinyonaan ghan rịkia ọngo rụmugh phọ ạbidi.

⁹Kụ Ọmoogh-we phọ ạghagham ologhi Sọlomon, loor ịpe ologhi phọ ọdi mạḅitonaan bọ Ọmoogh-we Ẹnaan phọ Ịzirel, ọpo amite bọ esi ọdi egaan ịyal amem mọ.

¹⁰Kụ ọdi ạlogh ni ologh ạngo ọdaam mọ ịlo ạraraar phọ ịphen phọ mọ ọdi kụ́uḅereghi ịnon ạrumugh. Kụ ạSolomon ọ́daph ịpe Ọmoogh-we phọ ạḅeni bọ nyọdi.

¹¹Esi ịphen phọ kụ Ọmoogh-we phọ ạḅeni Sọlomon mọ, “Loor ịphen nạ aḍighi yogh bọ kụ nạ ịyo phọ ạmi úuko bọ, rꞌịtooghi phọ ạmi ịpe mị ạlogh bọ ologh ạngo nyịna, mị kạar ri nyịna ọda eelhe phọ ạsighe ạngo otelhedom ạna.

¹²Kụ ọlo mị káḍighi ịphen phọ sịen asuḍughul-otu phọ ịphen ạna, loor ẹmhu aDevid ọde phọ ạna; kụ mị kabuemi ni ḍịghaagh ọony ạna.

¹³Kụ ọlo mị kábuemi oomo areelhe phọ ịpe nạ ạda bọ. Mị kạngo ni mọony ạna eniin eelhe, loor ẹmhu aDevid otelhedom mọ ạmi rꞌaloor ẹmhu aJeruselem mọ mị ạsaḅar bọ.”

¹⁴Ọmoogh-we phọ amitiom oye dị kazuom ẹgham Sọlomon, Hadad ọlo Idom; ọdi ọlo ịsiphe eghun ọdaam mọ ạḍua sịphe kụ amite ẹpe Idom.

¹⁵Mem mọ aDevid ạrol bọ ẹpe Idom kụ aJoab uwo ẹmhu ạbuo ẹgham mọ ạghi bọ oḍiighi ạbuphe ọze bọ, ọdi ạze oomo alephiri ạnmuny phọ Idom.

¹⁶(Odiiny ụnwanyu kụ ịdi aJoab rꞌoomo awe phọ Ịzirel ọrol bọ ẹpe, tụtu dị ạze bọ oomo alephiri ạnmuny phọ Idom.)

¹⁷Kụ ọlo aHadad asuma agheel Ijipt, ọdi rꞌabuniin awe ạbuo Idom, abutelhedom ọde phọ ọdi. Mem mọ ạmuphe phọ aHadad ẹphurukpu ọbumoony.

¹⁸Kụ bịdi ọḍua ẹpe Mịdian ọghi osi Pạran, kụ bịdi ọsighe we ẹpe Pạran ọpham ọghi osiom Ijipt, osi kꞌọdaam eelhe phọ Ijipt. Ọdaam eelhe phọ ạngo nyọdi otu ạḅeni mọ ịngo nyọdi eḍien, ạḅile ạngo nyọdi de.

¹⁹AHadad ạmoogh oboom ạghusan esi ọdaam eelhe phọ rꞌọnma ighirigiir. Ọdaam eelhe phọ ạsighe umarani phọ ọdi ạngo mọ ọdi aphin; umarani aTapenes ukueni phọ ạda bọ eelhe phọ.

²⁰Kụ umarani phọ aTapenes ạmaranaan nyọdi mọony dị oghol mọ aGenubat. ATapenes ạrol kꞌọdaam eelhe phọ aakonom aghine mạmaam. AGenubat ạrol sịphe kꞌọdaam eelhe phọ ogbo alephiri ạnmuny phọ ọdi.

²¹Mem dị aHadad ạrol bọ ẹpe Ijipt kụ ạnaghan mọ aDevid mamugh ạtuonom bụrude phọ ọdi, ḅịle kẹn, mọ aJoab uwo ẹmhu awe ẹgham mọ mamugh aani, kụ aHadad ạḅeni ọdaam eelhe phọ Ijipt mọ, “Ụwile ịmi mị ukeel eelhe ayoor.”

²²Kụ ọdaam eelhe phọ Ijipt apuru nyọdi mọ, “Eeghe ịyaar kụ ikuom nyịna sịen kꞌạmi, dị nạ ụ́moogh, kụ nạ rạwa bọ ogheel eelhe phọ anyina?” Kụ aHadad ạḅeni nyọdi mọ, “Ụwile ịmi mị ukeel.” Kụ ọwile ọdi agheel eelhe ọdi. AHadad ạda bọ Idom ạlogh ḍien Ịzirel bịn ạkpaariom.

²³Kụ Ẹnaan ẹḅile kẹn emitiom ọnon oye dị kạkpiloghom Sọlomon, Rezon ọony phọ Ẹliada, ọpo asuma bọ kꞌọde-otu phọ ọdi ạḍua kꞌaHadadezer ọdaam mọ aZoba.

²⁴Kụ ọdi aakpomoghi we ạngo nyọdi; kụ ọdi aḍighi uwo ẹmhu ạbuo ọkaraph otul, mem mọ aDevid mạze bọ Hadadezer rꞌạbuo ạSiria aḍighom bọ nyọdi. Bịdi ọḍua ogheel Dạmaskos kụ orugh sịphe, kụ oḍighi Rezon ọdaam ạSiria.

²⁵Kụ aRezon aḍighi oye dị ạlogh ḍien Ịzirel oomo asuḍughul-otu phọ ạSolomon, aḍighi yogh ghan ọdo kịrokiro ịkaraph, ọḅaram ịpe aHadad aḍighi yogh bọ.

²⁶Kụ aJeroboam ọony phọ aNebat ọlo aZereda, ẹmha sịphe eelhe eghun phọ Ifraim, otelhedom ạSolomon, ḍien onhiin phọ ọdi ughol mọ aZerua ekpukele ạnir, kụ ọdi aḅetenu azuom ẹgham ọdaam mọ.

²⁷Ẹmhu ịyaar phọ ọdi ạtu bọ kụ ạnyaam bọ ọdaam mọ, ịduon. ẠSolomon aselemi ghan iikpe ẹmha phọ ạlogh Milo asophoghom emitenom ẹmha phọ aDevid ọde phọ ọdi.

²⁸AJeroboam ophelegbe oye arukumuan kụ ạSolomon ạmiin mọ onyugheel oye phọ ọphon oye arukumuan kụ ạsighe aḍighi uwo ẹmhu aweye eepua oḍighi phọ ẹpe ạramha phọ ạbuo ạManase rꞌIfraim.

²⁹Kụ ẹghi ẹteeny mem mọ aJeroboam ạḍua bọ Jeruselem, kụ Ahaija oyil ọlo aSailo ạmiin nyọdi eten kụ ạsighe omoom ạsuoma ạkpologhian, kụ ịyal phọ ạbidi bịn ọrol gem ẹpe eḍum mọ.

³⁰Kụ Ahaija ạpham omoom ạsuoma phọ ọdi ạkpologhian bọ ạphanyi ḍioph rꞌịyal ịpherepe.

³¹Kụ ọdi ạḅeni Jeroboam mọ, “Sịghe ḍioph ịpherepe ạmoogh. Ọmoogh-we Ẹnaan phọ Ịzirel ạḅem ịduon mọ, ‘Mị kạpaar ri ạsighe ọda eelhe phọ ạSolomon, kụ mị ạngo nyịna ḍioph arughunughun.

³²ẠSolomon kạmoogh eniin eghun bịn, loor ẹmhu aDevid otelhedom mọ ạmi rꞌaloor ẹmhu aJeruselem ẹmha phọ nyẹpe mị ạsaḅar bọ sịphe oomo arughunughun phọ Ịzirel.

³³Ịyaar phọ eḍighi bọ bịdi mughel ịmi ọḅile rọoḅereghi ghan Astarte ẹya-eru phọ aSaidon rꞌaKemos ẹmugh phọ ạMoab rꞌạMolek ẹmugh phọ Amon, ụ́daph mun reten phọ ạmi kụ rotelhe ghan, ọbile oḍighi ghan ịpe ẹḅeeraan bọ riḍien phọ ạmi rꞌooko ghan ịtooghi phọ ạmi rꞌịiruen phọ ạmi, ịdipho aDevid ọde phọ ọdi.

³⁴Kụ ọlo mị kạ́boor nyọdi oomo areelhe phọ ịpe ọdi ạda bọ ạ́madan. Mị kaḍighi ni nyọdi uwo ẹmhu oomo asuḍughul-otu aghuḍum mọ ọdi, loor ẹmhu aDevid otelhedom mọ ạmi, ọpo mị ạsaḅar bọ, ọpo aako ghan bọ iilogh phọ ạmi rꞌịtooghi phọ ạmi.

³⁵Ịdi keḍighi bọ mị kạboor ri ọda eelhe phọ ḍịghaagh ạnmuny ọdi, kụ mị ạsighe ḍioph arughunughun ạngo nyịna.

³⁶Kụ mị kạngo eniin eghun mọony phọ ọdi, ọbo aDevid otelhedom mọ ạmi ạmoogh ḍịḅaal oomo amem mọ esomanan ạmi ẹpe Jeruselem ẹmha phọ mị ạsaḅar bọ aseerian bọ ḍien phọ ạmi.

³⁷Kụ mị ạsighe nyịna kụ aḍighi ọdaam esi oomo ịpe ologhi phọ ạna rạatughian bọ; kụ nạ aḍighi ọdaam Ịzirel.

³⁸Eru mạar dị nạ kạnaghanan ni oomo ịpe mị kạtooghi bọ ạngo nyịna, kụ nạ kạdaph ghan reten phọ ạmi kụ atelhe ghan kụ nạ aḍighi ghan ịpe eru bọ ịne riḍien ạmi, kụ aako ghan ịtooghi phọ ạmi rꞌiilogh phọ ạmi, ịdipho aDevid otelhedom mọ ạmi aḍighi ghan bọ, pọ mị kạrolonaan ni nyịna kụ mị ạngo nyịna ọophi oḍuom ologhi ịdipho mị ạngo bọ Devid, kụ mị aḍighi nyịna ọdaam eelhe Ịzirel.

³⁹Loor esi ịphen phọ mị kasooromi ni oghiil aDevid iikoma, kụ kẹ́tol kꞌagee-pọ.’”

⁴⁰ẠSolomon aasophoghian ịlo oghiigh aJeroboam, kụ aJeroboam asuma agheel Ijipt kꞌaSisak ọdaam mọ Ijipt, kụ ọdi ạrol ẹpe Ijipt tụtu ạSolomon amugh.

⁴¹Kụ ịpheri phọ eḍighinom ạraraar phọ ạSolomon rꞌoomo ịpe ọdi aḍighi bọ, rꞌolegheri ịyaar phọ ọdi, ụ́ge sịphe ạḍinya iiḍighi phọ ạSolomon ḍụghum?

⁴²Ạsia phọ ạSolomon ạda bọ Jeruselem aphogh bọ oomo eelhe phọ Ịzirel ẹman bọ inyadi ạsia.

⁴³Kụ ạSolomon amugh ạtuonom bụrude phọ ọdi, kụ oḍi nyọdi ẹpe ẹmha phọ aDevid ọde phọ ọdi, kụ aRehoboam ọony phọ ọdi ạsighe dọl phọ ọdi ạda.