Read abua 1 Ạbudaam 13 Bible Online

1 Ạbudaam 13 - abua bible

1 Ạbudaam 13

¹Oniin oyil loor ikpo ọnhu Ọmoogh-we phọ ạḍua ni ẹpe Juda ạghi asi Bẹtel. AJeroboam ọdaam mọ ạmeera sịphe enmeny ạrikia phọ rạsuughi ghan ịnsens.

²Kụ oyil phọ ạlooghi ikpo ọnhu Ọmoogh-we phọ asueniom enmeny phọ kụ ạḅem ghan mọ, “Enmeny ạrikia, enmeny ạrikia, Ọmoogh-we phọ ạḅem ịduon mọ ‘Kọmar ri mọony sịphe ọto kꞌaDevid; ḍien ọdi kokol mọ aJosaya. Ọdi kạsighe bụphe rọpinyon ghan bọ rịkia aruru ẹpe arenmeny phọ ạḅam ẹmhu ạna ạpighironom ẹkia. Kọsighe ịḅarara awe oguom nịan ọḅam ẹmhu ạna.’”

³Kụ ọdi amitiom eḍeenaan eniin phọ aḍio phọ kụ ạḅeni mọ, “Kogunyon ni enmeny ạrikia phọ kụ ọsighe ọoru phọ odi bọ sịphe ạnyu phọ ozuughi ạwai. Ịduon kụ nạ kalegheriom mọ mị ạkaraghi ni rạkaaphaan Ọmoogh-we phọ.”

⁴Mem dị aJeroboam ọdaam mọ ạnaghan bọ ịpe oyil phọ ạghaaph bọ, ọpo ạlooghi bọ asueniom enmeny ạrikia nyẹpe ạBetel, aJeroboam ạsighe rạghaagh phọ ọdi sịphe enmeny ạrikia phọ, kụ ạḅeni mọ, “Isiph nyọdi.” Kụ ạḍighaagh phọ ọdi ḍịphe ọdi asele bọ asumeriom nyọdi emugh, bịn ọdi órue mun ọkul ḍịghaagh phọ.

⁵Enmeny ạrikia phọ kẹn eḅonyonu kụ ọoru phọ ạrol bọ sịphe enmeny ạrikia phọ azuughian ude ạwala, ọdaph eḍeenaan phọ oyil phọ Ẹnaan amitiom bọ, esi ikpo ọnhu Ọmoogh-we phọ.

⁶Kụ ọdaam mọ ạphagharanaan kụ ạḅeni oye phọ Ẹnaan mọ, “Seseeny, ḍighi ịdi Ọmoogh-we Ẹnaan phọ ạna kụnma ịmi ighirigiir. Ughol ịmi ạaḅereghi ạḍighaagh phọ ạmi emoon ẹrol ịdipho ẹrol ghan bọ.” Kụ oyil ịmiin phọ ạmagh Ẹnaan, kụ ạḍighaagh ọdaam mọ emoon ẹrol ịdipho ẹrol ghan bọ.

⁷Kụ ọdaam mọ ạḅeni oyil phọ Ẹnaan mọ, “Tue ọghi osi otu alhe eḍien, mị aanmo nyịna ruunmo.”

⁸Kụ oyil phọ Ẹnaan ạḅeni ọdaam mọ mọ, “Ghạlamo nạ kụ ụngo ịmi pạkiri ẹelha phọ ạna, mị rạ́daph nyịna kạghi, mị rále eḍien, ḅịle kẹn mị rạ́pughol miim esi phọ ẹphen;

⁹ịdi eḍighi bọ ọphon phọ ologh dị ikpo ọnhu Ọmoogh-we phọ ẹlhogh ịngo ịmi mọ mị kúlhe eḍien, ḅịle kẹn mọ mị kụ́pughol mụum, mọ mị kúkiton mun eten phọ ẹpe mị ạḍua bọ kụ ạghi.”

¹⁰Kụ ọdi akiton ẹnon eten; ọdi ókiton mun eten phọ nyẹpe ọdi ạḍua bọ kụ ạghi Bẹtel.

¹¹Mem mọ ạmuen phọ okumoor oyil ạrol li ẹpe Bẹtel, kụ ạnmuny ọdi ọghi ọḅeni nyọdi oomo iiḍighi phọ ịpe oyil phọ ạḍua bọ ẹpe Juda kụ aru aḍighi yogh bọ ḍio phọ ạḍiphe phọ ẹpe Bẹtel rꞌịpe ọdi ạghaaph bọ ạḅeni ọdaam mọ.

¹²Kụ ọde phọ ạbidi apuru bịdi mọ, “Ọdi akiton nyẹghen eten?” ịdi eḍighi bọ ạnmuny phọ ọdi ụmiin ni eten phọ nyẹpe oyil ọlo aJuda phọ akiton bọ.

¹³Kụ ọdi ạḅeni nmụny phọ ọdi mọ oseleminaan nyịno ẹnam adool phọ ọno. Kụ bịdi oseleminaan nyọdi ẹnam adool phọ ọdi kụ ọdi aḍigh ạḍua.

¹⁴Kụ ọdi ạtuonom oyil ọlo aJuda phọ kụ ạmiin nyọdi dị ạrol ude zin ạḍiogh. Kụ ọdi apuru nyọdi mọ, “Nạ kụ oyil ọlo aJuda phọ?” Kụ ọdi ameera mọ, “Mị ni.”

¹⁵Kụ oyil phọ ạḅeni nyọdi mọ, “Ụdaph ịmi ọghi osi ologhi otu alhe eḍien.”

¹⁶Kụ oyil ọlo aJuda phọ ạḅeni nyọdi mọ, “Mị rạ́daph nyịna kaḅula. Mị rạ́daph nyịna kạghi kꞌạna alhe eḍien. Kẹn mị mụum ekpisi phọ ẹphen rạ́pughol.

¹⁷Ọmoogh-we phọ ạghaaph ụḅeni ịmi mọ, ‘Kále eḍien; ḅịle kẹn, kạ́pughol mụum ekpisi phọ ẹpe phọ. Ḅịle kẹn mọ mị ụ́ḅile ukiton eten phọ nyẹpe mị ạḍua bọ kụ ạghi.’”

¹⁸Kụ okumoor oyil ọlo ạBetel phọ ạḅeni nyọdi mọ, “Mị phọ oyil aani ni ịdipho ạna, kụ ọokpaany kꞌẸnaan kụ ụḅeni ịmi mọ mị ụpam nyịna usiom otu alhe eḍien, ạphughol mụum.” Ịphen ọdi ạghaaph bọ ạḅeni nyọdi ọkpe ni.

¹⁹Kụ oyil ọlo aJuda phọ ạdaph okumoor oyil phọ ạghi asi otu, alhe eḍien phọ, ạphughol mụum.

²⁰Kụ ịyal phọ ạbidi odi sịphe ịdaabili phọ role ghan eḍien, kụ ikpo ọnhu ọghaaph Ọmoogh-we phọ eḍigh rụru okumoor oyil phọ ọpo ạpham bọ nyọdi aḅulanam.

²¹Kụ ọdi ạmagh oyil ọlo aJuda phọ kụ ạḅeni mọ, “Ịphen kụ ịdi Ọmoogh-we Ẹnaan phọ ạna mạḅem. Ịdipho nạ úmeera bọ ọnaghan ịpe ọdi ạghaaph bọ, kụ nạ óoko iilogh phọ ịpe ọdi ạlogh bọ ạngo nyịna,

²²kpạripe ghụn ạdaph aḅula ạghi alhe eḍien ạphughol mụum ekpisi phọ ẹpe ọdi ạḅeni bọ nyịna mọ kále eḍien kạ́pughol mụum, pọ ḍizu phọ ạna kóḍi aani ẹpe iiḍi ạburude phọ ạna.”

²³Kụ rolhe eḍien phọ rọphughol mụum, kụ okumoor oyil phọ aseleminaan oyil ọlo aJuda phọ ẹnam adool phọ ọdi.

²⁴Ọdi aten rakeel bịn ạnam-dịka rꞌọdi eezuanaan ẹpe eten phọ, bịn ạnam-dịka phọ eghiigh nyọdi, etebeeny ḍizu phọ ọdi sịphe eten phọ, kụ ẹnam adool phọ ọdi ẹmeera ịigaany phọ ọdi; ạnam-dịka phọ ẹmeera kẹn etuman ḍizu phọ ọdi.

²⁵Kụ awe dị rotelhe sịphe eten phọ ọmiin ḍizu phọ ọdi dị emeel sịphe eten phọ, kụ ạnam-dịka phọ ẹmeera kẹn etuman ḍizu phọ ọdi. Kụ ọghi ọghaaph ịpe bịdi ọmiin bọ ọḅeni we ẹmha phọ ẹpe okumoor oyil phọ arugh bọ.

²⁶Kụ mem dị okumoor oyil phọ ạnaghan bọ, kụ ọdi ạḅem mọ, “Ọphon phọ oyil phọ ikpo ọnhu ọghaaph Ọmoogh-we phọ ụ́naghanan bọ kụ iḍighi kụ Ọmoogh-we phọ ạḅogh bọ nyọdi ạngo ạnam-dịka phọ kụ ẹphanyi nyọdi eghiigh, ọdaph ikpo ọnhu phọ Ọmoogh-we phọ ạḅeni bọ nyọdi.”

²⁷Kụ ọdi ạḅeni nmụny phọ ọdi mọ, “Iseleminaan ẹnam adool phọ ọdi iruom ịmi”, kụ bịdi oselemi.

²⁸Kụ ọdi ạghi ạmiin ḍizu phọ ọdi dị emeel sịphe eten phọ, kụ ẹnam adool phọ ọdi rꞌạnam-dịka phọ ẹmeregha etuman ḍizu phọ odi, ḅịle kẹn íkiigh ẹnam adool phọ ọdi.

²⁹Kụ okumoor oyil phọ ạsighe ḍizu phọ ạḅam ạnyu ẹnam adool phọ ọdi, ạpham agheel ẹpe ẹmha phọ ạBetel akughuḍi aḍi.

³⁰Kụ ọdi ạsighe oḍim mọ aḍi oḍi ọlo ọdi, kụ bịdi okughuḍi oḍi nyọdi kụ ọḅem ghan mọ, “Seseeny, umor ạmi.”

³¹Kụ ọdi roḍi bọ oye phọ reten, kụ ọdi ạḅeni nmụny phọ ọdi ịduon mọ, “Mem lọ mị amugh, ịsighe ịmi eḍi sịphe oḍi bọ nyọdi, ẹsighe ịḅarara phọ ạmi eseere etumeriom ịḅarara phọ ịpe ọdi.

³²Ikpo ọnhu Ọmoogh-we phọ ịpe ọdi ạghaaph bọ ạlooghi asumeriom enmeny ạrikia phọ ẹpe Bẹtel rꞌoomo ariisi ịiḅereghi phọ edi bọ ẹpe ạramha phọ aSameria, ịpe phọ kụ ịdi kẹtuugh ni emite.”

³³Kụ ịphen phọ emiteghu bọ eten, aJeroboam ọ́wile ịkaraph areten eḍighinom ạraraar phọ ọdi. Ạḅile ni ạmaaghi riil ạrikia igbo aḍita awe dị útu bụo kꞌaLivai. Tọrobo ọlo aḍighan nyọdi, ọdi ạsighe aḍighi oyil ạrikia ẹpe arenmeny ạrikia phọ ọdi ạkanagh bọ eelhe phọ.

³⁴Ạsipioghom mọ ịphen aJeroboam kụ ịdi eḍighi ịdi koogulemi bọ ẹkpigh phọ ọdi opiemi sịen aḅirini phọ.