Read abua 1 Ạbudaam 14 Bible Online

1 Ạbudaam 14 - abua bible

1 Ạbudaam 14

¹Mem mọ ạmuphe phọ Abaija ọony phọ aJeroboam ómoon.

²Kụ aJeroboam ạḅeni ạnir phọ ọdi mọ, “Seseeny, ḅetenu anmeeghian loor ạna ọbo kólegheri ghan bọ mọ nạ ạnir aJeroboam, ạghi Sailo. Ahaija oyil phọ, ọpo ụḅeni bọ ịmi mọ mị kaḍighi ọdaam awe phọ ạbuen, odi ni ẹpe.

³Pạm ḍioph iiḅoghoḍi ạbred rꞌẹphurukpu ạkikia rꞌizoki ẹnuum aḍiowo kụ ạghimom. Puru, ọdi kạḅeni ni nyịna ịpe keḍighi bọ mọony phọ.”

⁴Kụ ạnir phọ aJeroboam ạtuugh ịphen phọ aḍighi; aḅetenu ạghi asi Sailo, ạghi asi kꞌAhaija. Kụ Ahaija ọ́miin mun eten, ịdi eḍighi bọ ariḍien phọ ọdi meḅaaghaph loor esi dị ọdi mạkpo.

⁵Kụ Ẹnaan mẹḅeni Ahaija mọ, “Ạnir aJeroboam ratu ni opuru ạna ịlo ọony phọ ọdi, ịdi eḍighi bọ ọdi ómoon. Ịduon kụ ịdi nạ kạḅeni nyọdi, kụ mem dị ọdi katu bọ aḍigh otu kanmeeghian ni aḅo dịadi ọnon ạnir ri.”

⁶Kụ mem dị Ahaija ạnaghan bọ ḍịgum aruwol ạnir phọ sịphe ọnhu-aḍibuo otu phọ, kụ ọdi ạḅeni mọ, “Ḍigh otu, nịr aJeroboam. Esi ika kụ ịdi nạ ạtu bọ kụ anmeeghian bọ aḍighi ịdi nạ ọnon ạnir ri? Murom ịmi ọḅeni ạna ịkaraph ịinaghan.

⁷Keel ạḅeni Jeroboam mọ Ọmoogh-we Ẹnaan phọ Ịzirel ạḅem mọ, ‘Mị uphoophe nyịna, sịphe ogbo awe phọ aḍighi nyịna oḍiemiom awe phọ ạmi Ịzirel.

⁸Mị adi eelhe phọ ạar kꞌaDevid kụ ạngo nyịna, kụ ọlo nạ ọ́rol ịdipho aDevid otelhedom mọ ạmi ọpo aako ghan bọ iilogh phọ ạmi kụ ạsighe bọ oomo ologhi phọ ọdi kụ ụdapham ghan ịmi, aḍighi ghan ịpe eru bọ ịne sịphe ariḍien phọ ạmi,

⁹kụ ạsipioghom ịlo ạna mepu ịlo oomo ạbuḅel awe phọ: nạ ạkaaghi rụmugh kịrokiro, ạḅologh igbudu dị rẹkagh ologhi ạmi, nạ ụgumom ịmi ọman.

¹⁰Loor esi ịphen phọ mị kaḍighi ni ẹemara phọ aJeroboam ịdi ị́nighe. Mị kapiemi ni oomo alephiri ạnmuny, mꞌẹbene mꞌọnyo arisigh, sịphe Ịzirel. Mị kapiemi ni ọto kꞌaJeroboam ịdipho roḅeer ghan bọ rịir ịnam, ịyaar rósugheeny ghan bọ.

¹¹Tọrobo ọlo amugh sịphe kꞌaJeroboam sịphe ẹmha phọ, asuogh kụ kẹba ghan; tọrobo ọlo amugh ologhi eḍum, ạredelhe phọ ịpe rẹpeeph bọ ẹpe ạnyu phọ kụ kẹba ghan. Ọmoogh-we phọ kụ ạḅem ịphen phọ.’”

¹²Kụ Ahaija ạḅeni ạnir phọ aJeroboam mọ, “Ḅetenu agheel kꞌạna. Tụtu nạ rasi ẹpe ẹmha phọ ạna, ọony phọ ạna mamugh.

¹³Kụ oomo Ịzirel komoghi nyọdi. Sịphe kꞌaJeroboam ọdi bịn kụ ẹdi kokughuḍi oḍi, ịdi eḍighi bọ ọmiin dị ạmoogh eḍighinom ịyaar dị ẹḅeeraan Ọmoogh-we Ẹnaan phọ Ịzirel.

¹⁴Ọmoogh-we phọ kamitiom ni ọdaam dị kạda Ịzirel. Ọdi kasoph oḍigh ẹdaam mọ kꞌaJeroboam akpere.

¹⁵Ọmoogh-we phọ kaporogh Ịzirel akilom ịdipho ikpu lọ edi ọphiiny. Ọdi katuphuron Ịzirel ạsighe sịphe aḍiiḅi ade phọ ḍịphe ọdi ạngo bọ bụrude phọ ạbidi, kụ ạawalami ẹpe ẹḅeenyom ọphiiny phọ aYufratis, ịdi eḍighi bọ igbudu um-ạke Asera phọ bịdi oḅol bọ rẹkagh ni ologhi Ọmoogh-we phọ.

¹⁶Ọdi kạnyagharanaan ni Ịzirel aseere loor ịkaraph phọ aJeroboam, ọpo aḍighi bọ ịkaraph, dị Ịzirel ọtuan oḍighi yogh ghan ni ịkaraph.”

¹⁷Kụ ạnir phọ aJeroboam aḅetenu agheel ạghi asi Tirza; kụ ạnir phọ rạki osi ịsiphe ọnhu-aḍibuo otu phọ bịn ọony phọ amugh.

¹⁸Kụ oomo Ịzirel okughuḍi mọony phọ rꞌọto, ọsighe mọony phọ oḍi, ọdaph ịpe Ọmoogh-we phọ ạghaaph bọ ạḅeni Ahaija oyil phọ otelhedom mọ ọdi.

¹⁹Ịnon ịlo aJeroboam rꞌạraagham mọ ọdi eeghi bọ rꞌịpe ọdi ạda bọ, ọsighe ni ịphen phọ ọge sịphe ạḍinya ịpe emiteghu bọ mem ạbudaam mọ Ịzirel.

²⁰AJeroboam ạda bọ Ịzirel ịyaldi rꞌịyal ạsia kụ ọdi amugh ạtuonom bụrude phọ ọdi. Kụ ạNadab ọony phọ ọdi ạsighe dọl phọ ọdi ạda.

²¹ARehoboam ọony phọ ạSolomon ạman inyadi rꞌoniin ạsia kụ amiigh bọ ọda aJuda. Ọdi ạda bọ ḍioph rꞌoḍual ạsia ẹpe Jeruselem, ẹmha phọ nyẹpe Ọmoogh-we phọ ạsaḅar bọ mọ oomo arughunughun phọ Ịzirel ọsighe ḍien phọ ọno oseere sịphe. Ḍien onhiin phọ ọdi ughol mọ aNaama ọlo ẹemara Amon.

²²AJuda uḍighi ịkaraph egbodo Ọmoogh-we phọ, kụ ịkaraph phọ bịdi oḍighi bọ kụ ẹghagh ologhi ọdi, loor esi dị ịkaraph phọ bịdi oḍighi bọ ipu oomo ịpe ạburude phọ ạbidi oḍighi yogh bọ.

²³Kụ bịdi ọḅile kẹn odoghoḍi riisi ooseeny ẹpe aroogbolom mọ, rꞌịkaaghineen ạrumugh rꞌigbudu um-ạke Asera ạnyu ạtorobo eegbolom rꞌazin ạtorobo oreeny lọ azughuman.

²⁴Aḍeeriom mọ ạnmuny dị ọminian ghan rịiniom rꞌạnmariir dị olhe ghan ẹmha ụrol ghan ni riisi ịiḅereghi aruru; bịn awe phọ aJuda ọdaph oḍighi yogh aani ugbini ugbini phọ rꞌạsiḅaphanya kịrokiro phọ, ọdo ịpe ạramha phọ osumughu ghan bọ mem mọ ạnmuny Ịzirel ọboi bọ roḍigh reelhe phọ.

²⁵ARehoboam ạda bọ rẹman oogh ạsia, kụ aSisak ọdaam mọ Ijipt ạnyaaghian ạghi azuom ẹgham Jeruselem.

²⁶Kụ ọdi arool oomo ikpoki phọ ẹrol bọ sịphe Otu Ịiḅereghi ạsighiogh, rꞌoomo ikpoki ịlo ịsiphe otu ọdaam mọ ạsighiogh, rꞌoomo ịsuaram mọ ịpe Sọlomon ọdaam mọ ạsighe bọ gol kụ alhemighom.

²⁷Kụ aRehoboam ọdaam mọ ạḅile ạsighe enaba aḍighinom ịnon ịsuaram, ạsighe ạngo bụo ạrumhu ạbuphe rokori ghan bọ esomanan ogiga ọdaam mọ.

²⁸Kụ tọro amem dị ọdaam mọ rạki ẹpe Otu Ịiḅereghi phọ, bụphe rokori ghan bọ otool ọkimom ọḅile otool oḅulolom oseere sịphe osoph ạbuphe rokori bọ.

²⁹Ịnon ịlo aRehoboam rꞌiiḍighi phọ ọdi ịpe esugha bọ, ọsighe ni ọge sịphe ạḍinya phọ ịpe emiteghu bọ mem ạbudaam mọ aJuda.

³⁰Kụ aRehoboam rꞌaJeroboam eeghi yogh ghan rạagham oomo asuḍughul-otu phọ ạbidi.

³¹Kụ aRehoboam amugh ạtuonom bụrude phọ ọdi. Ọsighe nyọdi oḍi sịphe oḍi bọ bụrude phọ ọdi ẹpe ẹmha phọ aDevid. Ḍien onhiin phọ ọdi ughol mọ aNaama ọlo Amon. Kụ Abaija ọony phọ ọdi ạsighe dọl phọ ọdi ạda.