Read abua 1 Ạbudaam 15 Bible Online

1 Ạbudaam 15 - abua bible

1 Ạbudaam 15

¹AJeroboam ọony phọ aNebat rọda bọ Ịzirel rẹman ḍioph rꞌọphaanya ạsia, kụ Abaija amiigh ọda aJuda.

²Kụ ọdi ạda ẹpe Jeruselem ịraar ạsia. Ḍien onhiin ọdi ughol mọ aMaaka ọnyani Ạbsalom.

³Kụ ọdi ạdaph oomo ịkaraph phọ ịpe ọde phọ ọdi aḍighi yogh ghan bọ kụ aḍighi yogh ghan. Ologhi ọdi óseleman esi Ọmoogh-we Ẹnaan phọ ọdi, ịdipho ologhi aDevid ọde-oko phọ ọdi aseleman bọ.

⁴Ọ́tuan ịpe phọ, loor ẹmhu aDevid, Ọmoogh-we Ẹnaan phọ ọdi ạngo ni Abaija mọony mọ ạmu ịdipho ọtozi ạda ạḅile asereghi ịka ịlo ẹgham mem mọ ọdi amugh bọ ạkparamiom Jeruselem;

⁵ịdi eḍighi bọ aDevid aḍighi ni ịpe eru bọ ịne riḍien Ọmoogh-we phọ. Ọdi ọ́gumom ọman rꞌeniin ịyaar sịphe oomo iilogh phọ Ọmoogh-we phọ ạlogh bọ ạngo nyọdi oomo asuḍughul-otu aghuḍum mọ ọdi omuton ḍighiton phọ aYuraya ọlo ạHitait phọ.

⁶ARehoboam rꞌaJeroboam ịyal phọ ạbidi eeghi ghan ẹgham oomo asiḍughul-otu aghuḍum mọ Abaija.

⁷Ịnon ịlo Abaija rꞌiiḍighi phọ ọdi ịpe esugha bọ, ọsighe ni ọge sịphe ạḍinya ịpe emiteghu bọ mem ạbudaam mọ aJuda.

⁸Kụ Abaija amugh ạtuonom bụrude phọ ọdi, kụ bịdi oḍi nyọdi ẹpe ẹmha phọ aDevid. Kụ Ạsa ọony phọ ọdi ạsighe esi phọ ọdi ạda.

⁹AJeroboam rọda bọ Ịzirel rẹman ịyaldi ạsia, kụ Ạsa amiigh ọda aJuda.

¹⁰Ọdi ạda ẹpe Jeruselem inyadi rꞌoniin ạsia. Ḍien onhiin oko phọ ọdi ughol mọ aMaaka ọnyani phọ Ạbsalom.

¹¹Ạsa aḍighi ni ịdi eru ịne riḍien Ọmoogh-we phọ ịdipho aDevid ọde-oko phọ ọdi aḍighi ghan bọ.

¹²Kụ ọdi aphorogh oomo ạnmuny dị ọminian ghan rịiniom mọ rꞌạnmariir dị olhe ghan ẹmha phọ sịphe ade phọ ạsighiogh; kụ ọdi ạsighiogh oomo ạrumugh phọ ịpe ạburude phọ ạbidi ọkaaghi bọ aroḅologhi.

¹³Kẹn rꞌaMaaka onhiin oko phọ ọdi bịn ọdi aphorogh ni mọ ọdi kúḍighi ukueni-ạnir dị kạda eelhe, ịdi eḍighi bọ ọdi ạkan igbudu um-ạke Asera. Kụ Ạsa ạghi agunyon igbudu phọ ọdi aguom nịan ẹpe okol ạmuum mọ ạKidron.

¹⁴Kụ ruutu ịiḅereghi aruru phọ bịdi ọloghoḍi bọ ọdi ólhereghi ọman. Tọrobo ịpe ẹrol bọ, ologhi Ạsa aseleman ni esi Ọmoogh-we phọ oomo asuḍughul-otu phọ ọdi.

¹⁵Kụ ọdi ạlogh pạ Otu Ịiḅereghi phọ ịgiata rꞌagol rꞌoomo ạraraar arukumuan phọ, ọdi rꞌọde phọ ọdi oghononomiom bọ oseere iigbia.

¹⁶Kụ Ạsa rꞌaBaasa ọdaam mọ Ịzirel eeghi yogh ghan ẹgham oomo asuḍughul-otu phọ ạbidi.

¹⁷ABaasa ọdaam mọ Ịzirel ạghi azuom Juda ẹgham kụ ạlogh Rama ạkparami asophoghom mọ kúmeera oye ạḍua amite ḅịle kẹn oye ạḍua aḍigh ẹpe eelhe Ạsa ọdaam mọ aJuda.

¹⁸Kụ Ạsa ạghi ạsighiogh ịgiata phọ rꞌagol phọ ịpe esugha bọ sịphe Otu Ịiḅereghi phọ rꞌịpe esugha bọ sịphe ogiga ọdaam mọ, ạsighe ạngo butelhedom mọ ọdi. Kụ Ạsa ọdaam mọ arom mọ ọghi ẹpe Dạmaskos kꞌạBen Hadad ọdaam mọ ạSiria ọony phọ aTabrimon ọony-oko phọ ạHezion ọḅeni mọ,

¹⁹“Ịyo phọ oghiran bọ edi ni ogbo ạmi rꞌạna rꞌogbo ọde phọ ạmi rꞌọde phọ ạna. Mịin, mị ạsighe ọgiata rꞌagol aruom nyịna. Kịa aagbonyon ịyo phọ aBaasa ọdaam mọ Ịzirel rꞌạna ọbo ọdi ụkporion ịmi rạghaagh.”

²⁰Kụ ạBen Hadad ọdaam mọ ạnaghanan ịpe Ạsa ạghaaph bọ. Kụ ọdi arom bụo ạrumhu awe ẹgham mọ ọdi mọ ọghi ozuom ẹgham rạmha phọ Ịzirel, kụ ụkpar ri opu Ijon rꞌạDan rꞌEbel Bẹt Maaka rꞌoomo eelhe phọ etuman bọ Ọphiiny aGalili rꞌoomo ade phọ ạNaftalai.

²¹Kụ mem dị aBaasa ạnaghan bọ ịphen phọ kụ ọdi ạwile ọ́lhogh mun ọkparami ịka ẹgham Rama, kụ ọdi ạghi arugh ẹpe Tirza.

²²Kụ Ạsa ọdaam mọ agbeel ẹpe oomo aJuda oye úmuton, kụ bịdi ọghi orool ọsighiogh oomo asighiigh phọ rꞌoomo ireeny phọ ịpe aBaasa ạlogh bọ ạkparamiom ịka ẹgham mọ Rama. Ạsa ọdaam mọ ạsighe ịpe phọ kụ ạloghom bọ Geba ẹpe ạBenjamin rꞌaMizpa.

²³Kụ ịnon ịlo Ạsa rꞌiiḍighi phọ ọdi ịpe esugha bọ rꞌịikpo phọ ọdi rꞌạramha phọ ịpe ọdi adoghoḍi bọ, ọsighe ni ọge sịphe ạḍinya ịpe emiteghu bọ mem ạbudaam mọ aJuda. Ẹzegh eḍighi ịyal phọ aruwol phọ ọdi mem mọ dị mạkpo bọ.

²⁴Kụ Ạsa amugh ạtuonom bụrude phọ ọdi, kụ oḍi nyọdi sịphe oḍi bọ bụrude phọ ọdi ẹpe ẹmha phọ aDevid. Kụ ạJehosafat ọony phọ ọdi ạsighe esi phọ ọdi ạda.

²⁵Ạsa rọda bọ Juda rẹman ịyal ạsia, kụ ạNadab ọony phọ aJeroboam amiigh ọda Ịzirel kụ ọdi ạda ịyal ạsia.

²⁶Kụ ọdi ạdaph reten ọde phọ ọdi, aḍighi yogh ịkaraph dị ị́nighe risigh Ọmoogh-we phọ. Kụ ịkaraph phọ ịpe ọdi aḍighi yogh bọ ẹphuenom Ịzirel.

²⁷ABaasa ọony phọ Ahaija ọlo eghun kꞌỊsaka abian we ọghi ozuom Nạdab ẹgham, kụ aghiigh nyọdi ẹpe Gibeton ẹlo ẹpe ạbuo aFilistia phọ, mem mọ ạNadab rꞌoomo Ịzirel ozuom ẹgham Gibeton.

²⁸ABaasa aghiigh Nạdab kụ ạsighe esi phọ ọdi ạda mem dị Ạsa aJuda mạda ịraar ạsia.

²⁹Ọdi rọda bọ ẹmha phọ bịn dị ạze oomo ọto kꞌaJeroboam ạmadan; ọdi rꞌoniin oye ósugheeny, aphiemi oomo ọto kꞌaJeroboam, ạdaph ịpe Ọmoogh-we phọ ạḅeni bọ Ahaija oyil ịmiin phọ ọdi ọlo aSailo.

³⁰Ạtuan ịkaraph phọ ịpe aJeroboam aḍighi yogh bọ, aḍighi ịdi Ịzirel ọdaph nyọdi bịn oḍighi yogh ịkaraph; eḍighinom mọ ọdi ẹghagh ologhi Ọmoogh-we Ẹnaan phọ Ịzirel.

³¹Kụ ọghaaph ạNadab rꞌiiḍighi phọ ọdi esugha bọ, ọsighe ni ịphen phọ ọge sịphe ạḍinya phọ ịpe emiteghu bọ mem ạbudaam mọ Ịzirel.

³²Kụ Ạsa rꞌaBaasa ọdaam mọ Ịzirel eeghi ghan ẹgham oomo asuḍughul-otu phọ ạbidi.

³³Ạsa ạda bọ Juda rẹman ịraar ạsia, kụ aBaasa ọony phọ Ahaija amiigh ọda oomo Ịzirel ẹpe Tirza. Kụ ọdi ạda ni bịdi ịyaldi rꞌinya ạsia.

³⁴Kụ ọdi ạdaph oomo areten phọ ịpe aJeroboam, ịkaraph phọ ịpe ọdi aḍighi bọ ạphuenom Ịzirel; kụ ọdi aḍighi yogh ghan ịkaraph dị ị́nighe risigh Ọmoogh-we phọ.