Read abua 1 Ạbudaam 18 Bible Online

1 Ạbudaam 18 - abua bible

1 Ạbudaam 18

¹Rebia ịminighan rẹman ịraar ạsia ịgbakuro ạmuum mọ kụ ekpo ọnhu Ọmoogh-we phọ eru ẹteeny Ilaija mọ, “Kịa aḍeenaan loor ạna Ehab ọdaam mọ. Mị kaseere ọlophia sịen aḅirini phọ.”

²Ilaija ạghi oḍeenaan aloor phọ ọdi Ehab. Ịgbakuro dị ẹrol Sameria ịphughan ni.

³Kụ Ehab ạmagh Obadaya, uwo ẹmhu sịphe ogiga phọ ọdi. (Obadaya rakiilaan ghan Ọmoogh-we phọ iboom.

⁴Mem mọ ạJezebel rạze bọ riil Ọmoogh-we phọ, Obadaya ạsighe oniin okuron ariil ạaghi, ooghdi epogh ude eegum ịnon ooghdi epogh ude eegum, kụ ạngo ghan bịdi eḍien rꞌạmuum.)

⁵Kụ Ehab ạḅeni Obadaya mọ, “Itu ọghi orelhe yogh ẹpe oomo ade ạmuum mọ, rꞌẹpe oomo iiḍiph phọ, ạgama, ịdipho oḍighom ịyaar, yira kọmiin ni rọogho ọsighe otu ọngo ịnam adool rꞌạrusu phọ ayira, ẹrol dị bịdi eḍum, ọbo rꞌeniin ẹnam mọ ayira kemugh ghan bọ.”

⁶Kụ bịdi odi de phọ ịpe bịdi kotelhe bọ; Ehab ạghi ạga ọlo ọdi, Obadaya ạghi ạga ọlo ọdi.

⁷Obadaya atelhe rạki bịn azuan Ilaija eten. Obadaya ạlogh ni nyọdi elegh, kụ ameel ezuemi kụ apuru mọ, “Ọphon ạna phọ ni, Ilaija ọde-otu ạmi?”

⁸Kụ ọdi ạphagharanaan nyọdi mọ, “Ạmi ni. Kịa ạḅeni ọde-otu phọ ạna mọ Ilaija masi sịen.”

⁹Kụ Obadaya ạḅeni nyọdi mọ, “Mịna ụpioman nyịna eeghe, kụ nạ ụḅogh bọ ịmina otelhedom mọ ạna rạngo Ehab?

¹⁰Ịdipho Ọmoogh-we Ẹnaan phọ ạna odi bọ ni, ẹmha ílho, eelhe ílho dị ọde-otu phọ ạmi kőrom mọ oru ọwa nyịna, kụ mem lọ bịdi ọḅem mọ ọdi ẹphen ólho, pọ ẹmha phọ ẹpe phọ rꞌeelhe phọ ẹpe phọ rꞌọdi kokiran ịyo mọ bụno nyịna ụ́miin.

¹¹Kụ nyịidipho nạ rụḅeni ghan ịmi mọ mị ụki ụḅeni ọde-otu phọ ạmi mọ Ilaija masi sịen.

¹²Mị ạwile bịn nyịna sịen phọ rạki ọḅeni bịn, Uwaloor Ọmoogh-we phọ mạsighe nyịna asomanam ekpisi dị mị kálegheri. Kụ mị ạḅeni Ehab kụ mị aru kụ nyịna kạ́miin bọ, pọ ọdi kughiigh ni ịmi. Kụ mị otelhedom mọ ạna rakiilaan ghan ni Ọmoogh-we phọ kꞌẹghoroghor ạmi.

¹³Kụ ọde-otu phọ ạmi ụ́ḅeni ịpe mị aḍighi bọ mem mọ ạJezebel rạze bọ riil Ọmoogh-we phọ, ịpe mị ạsighe bọ oniin okuron ariil Ọmoogh-we phọ ạaghi, ooghdi epogh ude eegum ịnon ooghdi epogh ude eegum, kụ mị ạngo ghan bọ bịdi eḍien rꞌạmuum?

¹⁴Kụ nyịidipho nạ rụḅeni ghan ịmi mọ mị ụki ụḅeni Ehab ọdaam mọ mọ Ilaija masi sịen, ẹrol dị ọdi ughiigh ịmi.”

¹⁵Kụ Ilaija ạḅem mọ, “Ịdipho Ọmoogh-we Ẹnaan Oomo Ịikpo phọ edi bọ ni, ọpo mị rakumu bọ, agey ni mị kaḍeenaan ni nyọdi risigh ạmi rodon.”

¹⁶Kụ Obadaya ạghi ạteeny Ehab kụ ạḅeni nyọdi, kụ Ehab aḅetenu ạghi azuan eten Ilaija.

¹⁷Kụ mem dị Ehab ạmiin bọ Ilaija, kụ Ehab ạḅeni nyọdi mọ, “Ọphon ạna phọ, ọpo rạaḅaghami bọ Ịzirel?”

¹⁸Kụ ọdi ạphagharanaan mọ, “Mị kọ̋oḅaghami ghan Ịzirel. Nạ ghụn ni rꞌọto kꞌọde phọ ạna; ịdi eḍighi bọ nạ maghel iilogh Ọmoogh-we phọ, ẹḅile rẹdaph ghan Baal.

¹⁹Kụ nyịidipho tom ạghiom aakpomoghi oomo awe phọ Ịzirel bịdi oru ẹpe Eegum ạKarmel ụteeny ịmi, rꞌinya okuron rꞌooghdi ariil phọ aBaal rꞌinya okuron ariil um-ạke Asera phọ, bụphe rolhe ghan bọ eḍien sịphe ịdaabili phọ ạJezebel.”

²⁰Kụ Ehab arom ạghiom oomo awe phọ Ịzirel, kụ aakpomoghi riil aruru phọ ẹpe Eegum ạKarmel.

²¹Kụ Ilaija ạghi ạteeny we phọ Ịzirel, kụ ạḅeni bịdi mọ, “Kꞌạpur amem kụ ẹdi iloghi phọ anyina kẹbile bọ oyeela phọ? Eru mạar dị Ọmoogh-we phọ kụ aru Ẹnaan, pọ ịdaph nyọdi; kụ eru Baal, pọ ịdaph nyọdi.” Kụ awe phọ nyọdi ụ́pagharanaan.

²²Kụ Ilaija ạḅeni we phọ mọ, “Mị phọ ọphon bịn kụ ogina oyil Ọmoogh-we phọ dị asugha; kụ ariil ạbuo aBaal phọ ọman bọ inya okuron rꞌooghdi.

²³Ịki ẹsighe ịyal alephiri ạnmuny ạsinam eru ịngo iyoor. Bịdi ọsighe ḍiniin ọkanyan ọsighe ọḅam ạnyu ịpe bịn nịan kụ́logh; kụ mị kạsighe ḍịeri phọ ạkanyan ạsighe ạḅam aani ạnyu ịpe phọ, kụ nịan mị kạ́logh.

²⁴Kụ ẹmagh ḍien ẹmugh phọ anyina, kụ mị kạmagh ḍien Ọmoogh-we phọ; kụ ẹpe kẹsighe bọ nịan kụ ẹpagharanaan, pọ ọdi kụ Ẹnaan phọ.” Kụ oomo awe phọ Ịzirel ọphagharanaan mọ, “Ẹnighe ni ịphen nạ ạghaaph bọ.”

²⁵Kụ Ilaija ạḅeni riil phọ aBaal mọ, “Nyina ịpur ẹsighe ḍiniin ẹkanyan, ịdi eḍighi bọ nyina aḍita. Kụ ẹmagh ghan ḍien ẹmugh phọ anyina ị́logh ghan nịan.”

²⁶Kụ bịdi ọsighe ḍịo ạbidi ọkanyan oselemi ọḅam ạnyu ịpe phọ. Kụ bịdi omiigh kꞌạḍiroor ẹteeny kꞌootaany ọmagh ghan ḍien phọ aBaal, kụ ọḅem ghan mọ, “Baal, ụphagharanaan iyoor.” Ẹḍogh ụ́naghan ọ́phagharanaan bịdi, kụ bịdi opeleghu ọsiiny ạnyu enmeny ạrikia phọ bịdi ọkan bọ.

²⁷Kụ rẹteeny ootaany kụ Ilaija ạnmoghoghoom bịdi kụ ạsighe ọnhu ịgilaam kụ ạḅeni bịdi mọ, “Ịlooghi emitiom. Ọdi ẹmugh ni. Iini ọdi odi esi ịitughian, iini ramunum munum, iini rạki erelhe, iini rạnaani. Ịsumeeny.”

²⁸Kụ bịdi ọlooghi rꞌeboom ẹḍogh ọsighe rolhool rꞌạsileke obenegha siloor ạbidi, ọdaph eḍighinom ịyaar ạbidi, tụtu ịḅaal emiteghu siloor ạbidi.

²⁹Ootaany roten bịn bịdi omiigh ọmiinogh ịmiin tụtu ẹteeny mem mọ ọpo rọpinyon ghan bọ ẹkia adulhe phọ, ẹḍogh ụ́naghan, ọlo ạphagharanaan ólho, ụ́naghan ịyaar.

³⁰Kụ Ilaija ạḅeni oomo awe phọ Ịzirel mọ, “Itu ituman ịmi.” Kụ oomo awe phọ ọghi otuman nyọdi. Kụ ọdi aselemi enmeny ạrikia Ọmoogh-we phọ olhereghi bọ.

³¹Ilaija ạsighe ḍioph rꞌịyal ạrana ạdaph ọnhu arughunughun phọ ạnmuny phọ ạJekob ẹman bọ, ọpo ikpo ọnhu ọghaaph Ọmoogh-we phọ ẹghi bọ ẹḅeni mọ, “Ḍien ạna kokol mọ Ịzirel.”

³²Kụ ọdi ạsighe sighiigh phọ ạkanam enmeny ạrikia esi aḍien Ọmoogh-we phọ, aguph esi phọ ịdi ạmuum kakoroghan; esi dị kẹpam ni mụum dị ạghiom ḍioph rꞌinya aruuku.

³³Kụ ọdi ạsighe ịpe phọ ạmaar atumughi, kụ ạsighe ḍilephiri ạnam mọ ạkanyan, ạkiriph ạḅamaghi ạnyu ịpe phọ. Kụ ạḅeni bịdi mọ, “Ịsighe inya aroko eḍuughi mụum emuzeḍi ẹsighe eekuom ạnyu ịyaar aghuḍum mọ rꞌịpe phọ.”

³⁴Kụ ọdi ạḅeni bịdi mọ, “Ịtuugh ịdipho phọ eḍighi emuneni ịyal amem.” Kụ bịdi oḍighi omuneni ịyal phọ amem mọ. Kụ ọdi ạḅeni bịdi mọ, “Ịtuugh eḍighi emuneni ịraar amem.” Kụ bịdi oḍighi omuneni ịraar phọ amem mọ.

³⁵Kụ ạmuum mọ akilogh aleeny oomo enmeny ạrikia phọ rꞌoomo ariisi phọ oguphogh bọ.

³⁶Kụ ẹteeny mem mọ rọpighiron ghan bọ ẹkia adulhe phọ, kụ Ilaija oyil phọ Ẹnaan ạghi atuman kụ ạḅem mọ, “Nạ Ọmoogh-we Ẹnaan phọ Ebraham rꞌẠizik rꞌạJekob, ḍighi rodon ịdi kolegheri mọ nạ kụ Ẹnaan phọ Ịzirel, mọ mị kụ otelhedom mọ ạna, mọ oomo ịphen phọ mị raḍighi bọ mị ụsighe ịdipho nạ ạghaaph bọ kụ raḍighinom bọ.

³⁷Ụphagharanaan ni ịmi, ụphagharanaan ịmi ẹrol dị awe phọ ạbuen olegheri mọ nạ kụ Ọmoogh-we Ẹnaan phọ, mọ nạ makiton iloghi phọ ạbidi ạmagh aḅulemi.”

³⁸Kụ ạnian kꞌỌmoogh-we phọ emeleghuom ịyaar aghuḍum oguom ạnian phọ elhe ẹkia ẹmadan, ẹḅaram ịpe phọ rꞌasighiigh phọ; kụ ọoru phọ ạmooph oomo ạmuum mọ ạrol bọ sịphe phọ.

³⁹Kụ mem dị oomo awe phọ ọmiin bọ, kụ bịdi omeleghu ezuemi. Kụ bịdi ọḅem ghan mọ, “Ọmoogh-we phọ, ọdi kụ Ẹnaan phọ. Ọmoogh-we phọ, ọdi kụ Ẹnaan phọ.”

⁴⁰Kụ Ilaija ạḅeni bịdi mọ, “Isiphi oomo ariil phọ aBaal. Kémeera rꞌoniin ikpetenaan inyina.” Kụ bịdi osiphi riil phọ. Kụ Ilaija ạsighe bịdi ạpham ạghi asiom ẹpe okol ạmuum mọ ạKison, kụ ạze bịdi.

⁴¹Kụ Ilaija ạḅeni Ehab mọ, “Ḅetenu alhe ạphughol. Ạke phọ rạḅaaghi ịdi kạloph.”

⁴²Kụ Ehab ạsiiny ẹpe ạnyu phọ olhe eḍien rꞌọphughol, kụ Ilaija ạghi ạsiiny ạnyu Eegum ạKarmel. Kụ ọdi azumeri ghisigh ọdi ạlogh ipholophool ọdi, kụ ạsighe ghisigh phọ ọdi ạḅam loor aruukum mọ ọdi.

⁴³Kụ Ilaija ạḅeni otelhedom mọ ọdi mọ, “Kịa nyịidipho aphogh ọphiiny phọ.” Kụ ọdi ạghi aphogh, kụ ạḅeni mọ, “Ịyaar ílho.” Kụ ọdi ạḅeni nyọdi mọ, “Kịa amuneni oḍual amem.”

⁴⁴Kụ rẹman oḍual phọ amem mọ, kụ ọony phọ ạḅem mọ, “Pogh. Ẹnum ọotu dị ạghigh ḍịghaagh oye ạḍua ni sịphe ọphiiny phọ amite.” Kụ ọdi ạḅeni mọ, “Kịa ạteeny Ehab ạḅeni mọ, ‘Kookolobian aḍigh oghuugh-adool phọ ạna asoor agheel, ọbo ọlophia kasophoghom ghan bọ nyịna.’”

⁴⁵Ị́man mem bịn aḍio phọ eghire, okuaḍio phọ awil, oghim rakim, bịn oboom ọlophia asoor rạloph. Kụ Ehab aḍigh oghuugh-adool phọ ọdi agheel Jẹzreel.

⁴⁶Ịikpo Ọmoogh-we phọ ẹrol loor Ilaija, kụ ọdi ạkparamian ukpe phọ ọdi kụ aghiil atenom Ehab asi eḍighom ạJezreel.